އެމެރިކާ އާއި އިޒްރޭލްއާ ގުޅުން އޮންނަ މީހުންނަށް އެއްވެސް ދޫ ދިނުމެއް ނޯންނާނެ: އީރާންގެ އުއްތަމަ ފަނޑިޔާރު

އެމެރިކާ އާއި އިޒްރޭލްއާ ގުޅުން އޮންނަ ފަރާތްތަކާ ދެކޮޅަށް ޝަރީއަތް ހިންގައި، ޙުކުމް ތަންފީޒު ކުރުމުގައި އެއްވެސް ލަސް ކަމެއް ނުވަތަ ދޫ ދިނުމެއް އޮވެގެން ނުވާނެ ކަމަށް އީރާންގެ އުއްތަމަ ފަނޑިޔާރު  ޣުލާމް ހުސައިން މުހްސިނީ އީޖެއީ ވިދާޅުވެއްޖެ އެވެ. 

އީރާންގެ ތަސްނީމް ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، ހޯމަ ދުވަހު ވާހަކަ ދައްކަވަމުން އީޖެއީ ވިދާޅުވީ ހަނގުރާމައިގެ ވަގުތު ތަކާއި، ހަލަބޮލި ޙާލަތްތަކުގައި ދުޝްމަނުންނާ ގުޅިގެން ކުށްތަކަށް އަރައި ގަންނަ ފަރާތްތަކުގެ މައްޗަށް އިއްވާފައިވާ ނިހާއީ ޙުކުމްތައް ތަންފީޒު ކުރުން އަވަސް ކުރަން ޖެހޭ ކަމަށެވެ. އަދި އާންމު ސަލާމަތާއި ރައްކާތެރިކަމަށް ނުރައްކާވާ ފަދަ އަމަލުތައް ހިންގާ ކަމަށް ތުހުމަތު ކުރެވޭ މީހުންގެ މައްސަލަތައް ބަލައި، ވީހާ ވެސް އަވަހަކަށް ގޮތްތަކެއް ނިންމުމަކީ ކޮންމެހެން ކުރަން ޖެހޭ ކަމެއް ކަމަށް ވެސް އޭނާ ފާހަގަ ކުރެއްވި އެވެ. 

އީރާންގެ މީޑިއާ ތަކުން ރިޕޯޓު ކޮށްފައިވާ ގޮތުގައި، ފާއިތުވި ހަފުތާތަކުގެ ތެރޭގައި އެ ޤައުމުގެ ސަލާމަތީ ބާރުތަކުން ވަނީ ވަރުގަދަ އޮޕަރޭޝަން ތަކެއް ހިންގައިފަ އެވެ. މި އޮޕަރޭޝަން ތަކުގައި އިޒްރޭލް އާއި އެެމެރިކާ އަށް ޖާސޫސު ކޮށްދޭ ކަމުގެ ތުހުމަތުގައި އެތައް ސަތޭކަ ބަޔަކު ހައްޔަރު ކޮށްފައިވާ ކަމަށް ބުނެފައިވެ އެވެ. 

މި ހަރުކަށި ފިޔަވަޅުތައް އަޅަން ފަށާފައި މި ވަނީ، މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލުން ގުޅިގެން އީރާން އަށް ދިން ވަރުގަދަ ހަމަލާ ތަކެއްގައި އެ ޤައުމުގެ އެންމެ މަތީ ވެރިޔާ، އަދި ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަވުމާާ ގުޅިގެންނެވެ. މި ހާދިސާ އަށް ފަހު، މުޅި މެދު އިރުމަތީގައި ވަނީ ބޮޑު ހަނގުރާމައެއް ފެށިފަ އެވެ.

އެމެރިކާ އާއި އިޒްރޭލްގެ ހަމަލާ ތަކުގެ ރައްދުގައި އީރާން އިން ވެސް ގެންދަނީ ވަރުގަދަ ހަމަލާ ތަކެއް ދެމުންނެވެ. ޚާއްސަކޮށް އީރާން އިން ގެންދަނީ މެދު އިރުމަތީގައި ހުރި އެމެރިކާގެ އަސްކަރީ ބޭސް ތަކާއި، އެމްބަސީ ތަކުގެ އިތުރުން، އިޒްރޭލަށް ވެސް ވަރުގަދަ ހަމަލާ ތަކެއް ދެމުންނެވެ.