ކުރީގެ ރޫހީ ލީޑަރު ޚާމަނާއީ ބޭނުން ކުރެއްވި ވައިގެ އުޅަނދެއް އިޒްރޭލް އިން ހަލާކު ކޮށްލައިފި

އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ ބޭނުން ކުރެއްވި ވައިގެ އުޅަނދެއް ހަލާކު ކޮށްލާފައިވާ ކަމަށް، އިޒްރޭލްގެ އަސްކަރިއްޔާ އިން ބުނެފި އެވެ.

އިޒްރޭލްގެ އަސްކަރިއްޔާ އިން ހޯމަ ދުވަހު ބުނީ، އީރާންގެ ވެރި ރަށް ތެހެރާންގައި ހުންނަ މެހްރާބާދު ވައިގެ ބަނދަރުގައި އޮތް ޚާމަނާއީ ބޭނުން ކުރެއްވި ވައިގެ އުޅަނދެއް ހަލާކު ކޮށްލާފައިވާ ކަމަށެވެ. 

އިޒްރޭލްގެ އަސްކަރިއްޔާ އިން ބުނި ގޮތުގައި މި ވައިގެ އުޅަނދަކީ އީރާންގެ އިސް ވެރިންނާއި، ސިފައިންގެ އިސް ބޭފުޅުން ޤާއުމީ ފަންތީގަ އާއި ބައިނަލްއަޤުވާމީ ފަންތީގައި ދަތުރު ކުރުމަށް ބޭނުން ކުރި އުޅަނދެކެވެ. އަދި އީރާންއާ ގުޅުންހުރި ޤައުމުތަކާ ގުޅުން ބަދަހި ކުރުމަށް ވެސް މި އުޅަނދު ބޭނުން ކުރި ކަމަށް އިޒްރޭލް އިން ބުނެފައިވެ އެވެ. 

މެހްރާބާދަކީ އީރާންގައި ހުންނަ އެންމެ ކުރީގެ ވައިގެ ބަނދަރު ތަކުގެ ތެރެއިން ބަނދަރެކެވެ. މިހާރު މި ބަނދަރުން ހިންގަނީ ޤައުމީ ފަންތީގެ ފްލައިޓު ތަކާއި، ސަރަހައްދީ ފްލައިޓު ތަކެވެ. މި ބަނދަރަކީ އީރާންގައި އެންމެ ގިނައިން ދަތުރުވެރިން ބޭނުން ކުރާ ޤައުމީ ފަންތީގެ ވައިގެ ބަނދަރު ކަމަށްވާއިރު، އެއާ އެކު އެއީ އެއާ ފޯސްގެ ވަސީލަތްތައް ބަހައްޓާފައި ހުންނަ، ދެ ބޭނުމަކަށް ބޭނުން ކުރެވޭ ތަނެކެވެ. 

މި ހަމަލާއާ ގުޅިގެން އީރާން އިން އަދި ރަސްމީ ބަޔާނެއް ނެރެފައި ނުވެ އެވެ. އިޒްރޭލް އާއި އީރާންއާ ދެމެދު އޮންނަ ނުތަނަވަސްކަން މިހާރު ވަނީ އިތުރަށް ބޮޑުވެފަ އެވެ. 

އިޒްރޭލް އިން މި ހަމަލާ ދީފައިވާ ކަމަށް ބުނާއިރު، މިއީ އީރާންގެ އިސްވެރިންނަށް ވަރަށް މުހިންމު ވަސީލަތެއް ހަލާކު ކުރުން ކަމަށް ސިފައިންގެ ފަރާތުން ބުނެފައިވެ އެވެ. މި ވައިގެ އުޅަނދު ހަލާކު ކުރުމުން އީރާންގެ އިސްވެރިންގެ ދަތުރު ތަކަށް ބޮޑެތި ހުރަސްތައް ކުރިމަތި ވާނެ ކަމަށް ބެލެވެ އެވެ.