އީރާންގެ ރައްޔިތުން މުޒާހަރާ ކުރަން ބިރު ގަންނަނީ، ގޭންގު ހަދައިގެން އުޅޭ ނުލަފާ ބަޔަކު ވެރި ކަމުގައި ތިބީމަ: ޓްރަމްޕް

އީރާންގެ ރައްޔިތުން އެ ޤައުމުގެ ސަރުކާރާ ދެކޮޅަށް މަގު ތަކަށް ނިކުމެ މުޒާހަރާ ނުކުރާ ސަބަބު ވަރަށް ބޮޑަށް ސާފުވާ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވެފައި ވަނީ، އެއާ ފޯސް ވަންގައި ހުންނަވައި ނޫސްވެރިންނާ ވާހަކަ ދައްކަވަމުންނެވެ. އީރާންގެ ރައްޔިތުން އެ ޤައުމުގެ މަގު ތަކަށް ނިކުމެ، ސަރުކާރާ ދެކޮޅަށް މުޒާހަރާ ކުރުމަށް ޓްރަމްޕް އަބަދު ވެސް ބާރު އަޅުއްވަ އެވެ. ނަމަވެސް، އީރާން އިން އެފަދަ މަންޒަރެއް ފެނިފައި ނުވެ އެވެ.

އީރާންގެ ސަރުކާރާއި، އެ ޤައުމުގެ އިސްވެރިންނަށް ވަރަށް ބޮޑަށް ފާޑު ވިދާޅުވަމުން ޓްރަމްޕް ވިދާޅުވީ، އެ ޤައުމުގެ ރައްޔިތުން މުއާމަލާތް ކުރަން ޖެހިފައި ވަނީ "ގޭންގު ހަދައިގެން އުޅޭ ނުލަފާ ބަޔަކާ" ކަމަށެވެ. އެހެންވެ އެ ޤައުމުގެ ރައްޔިތުން މުޒާހަރާ ކުރަން ބިރު ގަންނަނީ ކަމަށް ޓްރަމްޕް ވިދާޅުވި އެވެ. އަދި އީރާންގެ ސަރުކާރުން އެ ޤައުމުގެ ރައްޔިތުންނަށް އިންޒާރުދީ، ބިރު ދައްކަމުންދާ ކަމަށް ވެސް ޓްރަމްޕް ވަނީ ތުހުމަތު ކުރައްވައިފަ އެވެ. 

މި މޭރުމުން ވާހަކަ ދައްކަވަމުން ޓްރަމްޕް ވިދާޅުވީ، މުޒާހަރާ ކޮށްފި ނަމަ ބަޑި ޖަހައި މަރާލާާނެ ކަމުގެ އިންޒާރު އީރާންގެ ސަރުކާރުން ރައްޔިތުންނަށް ދީފައިވާ ކަަމަށެވެ. އެހެންކަމުން، ފުރާނައިގެ ބިރަށްޓަކައި އީރާންގެ ރައްޔިތުން މަގު ތަކަށް ނިކުމެ މުޒާހަރާ ނުކުރާ ސަބަބު ވަރަށް ބޮޑަށް ބަަލައި ގަންނަ ކަމަށް ވެސް ޓްރަމްޕް ވިދާޅުވި އެވެ. މީގެ ކުރިން ވެސް ޓްރަމްޕް ވަނީ، އީރާންގެ ރައްޔިތުން މެގު ތަކަށް ނިކުމެ ސަރުކާރު ވައްޓާލުމަށް ގޮވާލައްވައިފަ އެވެ. 

އެންމެ ފަހުން އީރާާންގައި ކުރި މުޒާހަރާ ތަކަކީ ވެސް އެމެރިކާ އާއި އިޒްރޭލް އަޑީގައި އޮވެ ކުރިއަށް ގެންދިޔަ މުޒާހަރާ ތަކެއް ކަމަށް ސިފަ ކޮށްފައިވެ އެވެ. އިޤްތިޞާދީ ދަތި ކަމުގެ ސަބަބުން ފެށުނު މުޒާހަރާތައް، ފަހުން ހަމަ ނުޖެހުމަށް ބަދަލު ވެގެން ދިޔައީ އެމެރިކާ އާއި އިޒްރޭލް އިން އެކަމުގެ ތެރެއަށް ވަނުމުން ކަމަށް ފާހަގަ ކޮށްފައިވެ އެވެ. ނަމަވެސް، އީރާންގެ ސަރުކާރުން މުޒާހަރާތައް މައިތިރި ކުރިއިރު، އެފަހަރު ވެސް އެތައް ހާސް ބަޔަކު ވަނީ އީރާންގެ ސަރުކާރަށް އޮތް ތާއީދު ދައްކާލުމަށް މަގު ތަކަށް އެއްވެފަ އެވެ.