އެމެރިކާ އަށް ހަނގުރާމަ ކާމިޔާބު ކުރެވިފައިވާ ކަމަށް ވިދާޅުވާން ޓްރަމްޕް ފަސްޖެހިއްޖެ

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމަ، އެމެރިކާ އަށް ކާމިޔާބު ކުރެވިފައިވާ ކަމަށް ވިދާޅުވާން އެ ޤައުމުގެ ރައީސް ޑޮނަލްޑް ޓްރަމްޕް ފަސް ޖެހިވަޑައިގެންފި އެވެ.

ފްލޮރިޑާ އަށް ކުރެއްވި ދަތުރުފުޅަށް ފަހު އެނބުރި ވޮޝިންޓަން ޑީސީ އަށް ވަޑައިގެންނެވުމުގެ މަގު މަތީގައި، އެއާ ފޯސް ވަންގައި ޓްރަމްޕް ވަނީ ނޫސްވެރިންނާ ވާހަކަ ދައްކަވައިފަ އެވެ. އީރާން ހަނގުރާމައިގެ ވާހަކަ ދައްކަވައި، ޓްރަމްޕް ވަނީ ނޫސްވެރިންގެ ސުވާލު ތަކަށް ވެސް ޖަވާބު ދެއްވައިފަ އެވެ. 

އެގޮތުން އީރާންއާ ދެކޮޅަށް އެމެރިކާ އިން ކުރިއަށް ގެންދާ ހަނގުރާމައިގައި ކާމިޔާބު ލިބިފައިވާ ކަމަށް އިއުލާން ކުރަން ތައްޔާރަށް ހުންނެވިތޯ ނޫސްވެރިޔަކު ވަނީ ޓްރަމްޕްއާ ސުވާާލު ކޮށްފަ އެވެ. ނަމަވެސް، އެމެރިކާ އަށް ކާމިޔާބު ލިބިފައިވާ ކަަމަށް ވިދާޅުވާން ޓްރަމްޕް އަށް ކެރި ވަޑައި ނުގެންނެވި އެވެ. 

އެ ސުވާލަށް ޖަވާބު ދެއްވަމުން ޓްރަމްޕް ވިދާޅުވީ، އެމެރިކާ އަށް ކާމިޔާބު ލިބިފައިވާ ކަމަށް އިއުލާން ކުރަން ބޭނުންފުޅު ނުވާ ކަމަށެވެ. ޓްރަމްޕް ވިދާޅުވީ މިވަގުތު އެކަން އިއުލާން ކުރުމުގެ ބޭނުމެއް ނެތް ކަމަށާއި، އެފަދަ އިއުލާނެއް ކުރަންވީ ސަބަބެއް ވެސް ނެތް ކަމަށެވެ. ނަމަވެސް، އީރާންގެ ބާރުތައް މިހާރު ވަރަށް ބޮޑަށް ބަލިކަށި ވެފައިވާ ކަމަށް ބުނެވޭނެ ކަމަށް ޓްރަމްޕް ވިދާޅުވި އެވެ. 

އެމެރިކާ އާއި އީރާންއާ ދެމެދު އޮތް ގުޅުން މިހާރު އިންތިހާ އަށް ގޯސްވެފައިވާ އިރު، ޓްރަމްޕް ގެންދަވަނީ އީރާންގެ ސަރުކާރަށް ބަހުގެ ހަމަލާ ތަކެއް އަމާޒު ކުރައްވަމުންނެވެ. އަދި އީރާންގެ ދާޚިލީ ކަންކަމުގެ ތެރެއަށް ވަދެ ވަޑައިގެން، އެ ޤައުމުގެ ރައްޔިތުންގެ އިޙުސާސްތަކާ ގުޅޭ ގޮތުން ޓްރަމްޕް ގެންދަވަނީ ގިނަ ވާހަކަ ތަކެއް ދައްކަވަމުންނެވެ. 

އީރާންއާ ދެކޮޅަށް އެމެރިކާ އިން ކުރަމުން އަންނަ ހަނގުރާމައިގެ ކާމިޔާބީ އިއުލާން ކުރުމަށް ޓްރަމްޕް ފަސް ޖެހި ވަޑައިގެންފައި ވާއިރު، އީރާން އިން ގެންދަނީ އެމެރިކާ އާއި އިޒްރޭލްގެ އަމާޒު ތަކަށް ވަރުގަދަ ހަމަލާ ތަކެއް ދެމުންނެވެ. މީގެ އިތުރުން، މި ހަނގުރާމައިގެ ސަބަބުން އެމެރިކާގެ އިޤްތިޞާދަށް ވެސް، ވަރަށް ބޮޑު އަސަރެއް ކުރަމުން އަންނަ ކަމަށް މާހިރުން ވަނީ ފާހަގަ ކޮށްފަ އެވެ.