މިތިބީ އަމިއްލަ ފައި މައްޗަށް ތެދުވެ، އެމެރިކާާއާ މަޝްވަރާ ކުރާކަށް ބޭނުމެއް ނޫން: އީރާންގެ ފޮރިން މިނިސްޓަރު

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގައި، އެމެރިކާ އާއެކު އެއްބަސްވުމަކަށް ދާން މަޝްވަރާ ކުރަން ބޭނުން ނުވާ ކަމަށް އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ. 

އަރާގްޗީ މިހެން ވިދާޅުވެފައި ވަނީ، އެމެރިކާގެ ރައީސް ޑޮނަލްޑް ޓްރަމްޕް ދެއްކެވި ވާހަކަ އަކަށް ރައްދު ދިނުމުގެ ގޮތުންނެވެ. އެގޮތުން ޓްރަމްޕް ވިދާޅުވެފައި ވަނީ، އީރާން އިން މިހާރު ބޭނުން ވަނީ އެމެރިކާ އާއެކު އެއްބަސްވުމަކަށް އަންނަން ކަމަށެވެ. އަދި އީރާން އިން އެކަމަށް ވަރަށް ބޮޑަށް އެދެމުން އަންނަ ކަމަށް ޓްރަމްޕް ވިދާޅުވެފައިވެ އެވެ. 

ނަމަވެސް، ސީބީއެސްގެ ފޭސް ދަ ނޭޝަން ޕްރޮގްރާމް އަށް ދެއްވި އިންޓަވިޔުއެއްގައި އާދީއްތަ ދުވަހު އަރާާގްޗީ ވަނީ އެ ވާހަކަ ތަކުރާރުކޮށް ދޮގު ކުރައްވައިފަ އެވެ. އެގޮތުން އަރާގްޗީ ވިދާޅުވީ އީރާން އަކީ އަމިއްލަ ފައި މައްޗަށް ތެދުވެ އޮތް، ވަރުގަދަ ޤައުމެއް ކަމަށެވެ. އަދި އީރާން އިން ކުރަމުން އަންނަ މަސައްކަތަކީ، ހަމައެކަނި އެ ޤައުމުގެ ރައްޔިތުންގެ ދިފާއުގައި ކުރަން ޖެހޭ ކަންކަން ކުރުން ކަމަށް ވެސް އޭނާ ފާހަގަ ކުރެއްވި އެވެ. 

މީގެ އިތުރުން އަރާގްޗީ ވިދާޅުވެފައި ވަނީ، އީރާން އިން އެމެރިކާ އާއެކު މަޝްވަރާ ކުރަން ޖެހޭ އެއްވެސް ސަބަބެއް ނެތް ކަމަށެވެ. އަދި ކުރިން ދެ ފަހަރު ވެސް، އެމެރިކާ އިން އީރާން އަށް ހަމަލާ ދީފައި ވަނީ އެ ޤައުމާ އެކު މަޝްވަރާތައް ކުރިއަށް ގެންދަމުން އަންނަނިކޮށް ކަމަށް އަރާގްޗީ ވިދާޅުވި އެވެ. އެއާ އެކު އަރާގްޗީ ވިދާޅުވީ، އެމެރިކާ އާއެކު މަޝްވަރާ ކޮށްގެން މީގެ ކުރިން ވެސް ލިބިފައި ވަނީ ވަރަށް ހިތްދަތި ތަޖުރިބާ ތަކެއް ކަމަށެވެ. 

ހަނގުރާމަ އަށް އިޝާރާތް ކުރައްވައި އަރާގްޗީ ވިދާޅުވީ، ހަނގުރާމަ ހުއްޓާލުމަށް ދުވަހަކު ވެސް އީރާން އިން އެދިފައި ނުވާނެ ކަމަށެވެ. އަދި އެމެރިކާ އާއެކު މަޝްވަރާ ކުރުމަށް ވެސް އެދިފައި ނުވާނެ ކަމަށާއި، މިއީ އީރާން އިން ފެށި ހަނގުރާމައެއް ނޫން ކަމަށް އަރާގްޗީ ވިދާޅުވި ެވެ. ޓްރަމްޕް ވިދާޅުވެފައި ވަނީ، އީރާން އިން އޮތީ އެެމެރިކާ އާއެކު އެއްބަސްވުމަކަށް އަންނަން ކަމަށާއި، އެކަމަކު އީރާންގެ ޝަރުތު ތަކަށް އޭނާ އެއްބަސްވާން ބޭނުން ނުވާ ކަމަށެވެ.

އެމެރިކާާ އާއެކު މަޝްވަރާ ކުރަން އީރާން އިން ދެކޮޅު ހެދި ނަަމަވެސް، ހޮރުމޯޒު ކަނޑު އޮޅިން ދަތުރު ކުރާ ތެޔޮ ޓޭންކަރު ތަކުގެ ސަލާމަތާއި ރައްކާތެރިކަމާ ގުޅޭ ގޮތުން މަޝްވަރާ ކުރަން ބޭނުންވާ ޤައުމު ތަކާ އެކު ވާހަކަ ދެއްކުމަށް އީރާން އޮތީ ތައްޔާރަށް ކަމަށް އަރާގްޗީ ވިދާޅުވި އެވެ. މިގޮތުން ބައެއް ޤައުމު ތަކުން، އެ ޤައުމު ތަކުގެ އުޅަނދު ފަހަރަށް ރައްކާތެރިކަމާ އެކު ދަތުރު ކުރެވޭނެ މަގު ފަހި ކޮށްދިނުމަށް އީރާންގެ އެހީތެރިމަަށް އެދިފައިވާ ކަމަށް އަރާގްޗީ ހާމަ ކުރެއްވި އެވެ. ނަމަވެސް، އެއީ ކޮން ޤައުމު ތަކެއްކަން އަރާގްޗީ ހާމަ ކުރައްވާފައި ނުވެ އެވެ.