އިސްފަހާންގެ ފެކްޓްރީއަކަށް ހަމަލާދީ 15 މީހުން މަރުވެއްޖެ

އީރާނުގެ މެދުތެރޭގެ ސިޓީއެއް ކަމަށްވާ އިސްފަހާންގެ ސިނާއީ ސަރަހައްދަކަށް ދިން މިސައިލް ހަމަލާއެއްގައި މަދުވެގެން 15 މީހުން މަރުވެފައިވާ ކަމަށް އެ ގައުމުގެ މީޑިއާތަކުން ރިޕޯޓްކޮށްފިއެވެ. މި ހަމަލާ އަމާޒުވި ވަގުތަކީ ފެކްޓްރީގެ ތެރޭގައި ގިނަ އަދަދެއްގެ މަސައްކަތްތެރިން ތިބި ވަގުތެއް ކަމަށް މައުލޫމާތު ލިބެއެވެ.

އީރާނުގެ ސެމީ-އޮފިޝަލް ފާރްސް ނިއުސް އެޖެންސީން ރިޕޯޓްކޮށްފައިވާ ގޮތުގައި، ހޫނުކުރާ އަދި ފިނިކުރާ ސާމާނު އުފައްދާ ފެކްޓްރީއަކަށް މި ހަމަލާ އަމާޒުވެފައިވަނީ އީރާނުގެ މަސައްކަތު ދުވަހެއް ކަމަށްވާ ހޮނިހިރު ދުވަހުއެވެ. އެ ނޫސް އެޖެންސީން ވަނީ މި ހަމަލާއަކީ އެމެރިކާ އާއި އިޒްރޭލުގެ ސިފައިން ދިން ހަމަލާއެއް ކަމަށް ތުހުމަތުކޮށްފައެވެ.

މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިޒްރޭލުން އީރާނަށް ހަމަލާދޭން ފެށި ފަހުން، މި ހަނގުރާމައަށް 15 ދުވަސް ވެފައިވާއިރު، މިހާތަނަށް މަދުވެގެން 1,444 މީހުން މަރުވެ، 18,500 އަށްވުރެ ގިނަ މީހުން ޒަޚަމްވެފައިވާ ކަމަށް އީރާނުގެ ހެލްތު މިނިސްޓްރީން ބުނެއެވެ.

ހަނގުރާމަ ފެށުނު ފަހުން އީރާނުގެ އެކި ސިޓީތަކަށް ދަނީ ތަކުރާރުކޮށް ހަމަލާތައް އަމާޒުވަމުންނެވެ.

މިދިޔަ މާރިޗު މަހުގެ 8 ވަނަ ދުވަހު ދިން ހަމަލާތަކެއްގައި އިސްފަހާންގައި ހުންނަ ރަޝިޔާގެ ކޮންސިއުލޭޓަށް ގެއްލުންވެ، އެތަނުގެ މުވައްޒަފުންނަށް ވަނީ އަނިޔާވެފައެވެ. ރަޝިޔާގެ ވެރިރަށް މޮސްކޯއިން ވަނީ އެ ހަމަލާއަކީ ބައިނަލްއަގުވާމީ މުއާހަދާތަކާ ކަނޑައެޅިގެން ޚިލާފު އަމަލެއް ކަމަށް ބުނެފައެވެ.

އީރާނުގެ މިނިސްޓްރީ އޮފް ކަލްޗަރ އިން ހޮނިހިރު ދުވަހު ހާމަކުރި ގޮތުގައި، 17 ވަނަ ގަރުނުގެ އާސާރީ ބިނާއެއް ކަމަށްވާ އިސްފަހާންގެ ނަގްޝޭ ޖަހާން މައިދާން އާއި، ތެހެރާންގައި ހުންނަ ޔުނެސްކޯގެ ދުނިޔޭގެ ތަރިކައިގެ ލިސްޓުގައި ހިމެނޭ ގުލިސްތާން ޕެލަސް ހިމެނޭހެން 56 މިއުޒިއަމަކާއި އާސާރީ ބިނާއަކަށް ވަނީ ގެއްލުން ލިބިފައެވެ.

ޔުނެސްކޯއިން ވަނީ މިކަމާ މެދު ނުހަނު ކަންބޮޑުވުން ފާޅުކޮށްފައެވެ. އެ ޖަމިއްޔާއިން ފާހަގަކުރި ގޮތުގައި އީރާނުގައި ހުރި ދުނިޔޭގެ ތަރިކައިގެ 29 ބިނާގެ ތެރެއިން ހަތަރު ތަނަކަށް މިހާރު ވަނީ ހަމަލާތަކުގެ އަސަރުކޮށްފައެވެ.

މީގެ އިތުރުން، އިޒްރޭލުން ދިން ހަމަލާއެއްގައި ބްރިގޭޑިއާ ޖެނެރަލް އަބްދުﷲ ޖަލާލީ-ނަސަބު ޝަހީދުވެފައިވާކަން އީރާނުގެ އަސްކަރިއްޔާއިން ހޮނިހިރު ދުވަހު ވަނީ ކަށަވަރުކޮށްދީފައެވެ. އަސްކަރިއްޔާއިން ބުނީ އޭނާ ޝަހީދުވީ ގައުމު ދިފާއުކުރުމުގެ ޖިހާދުގައި ހުއްޓާ ކަމަށެވެ.

މީގެ ކުރިން، އީރާނުން ބޭރުކުރާ ސާފުނުކުރާ ތެލުގެ ގާތްގަނޑަކަށް 90 އިންސައްތަ ހިއްސާކުރާ ޚާރްގް އައިލެންޑަށް ވެސް އެމެރިކާ ސިފައިން ވަނީ ހަމަލާދީފައެވެ. ނަމަވެސް، އެ ސަރަހައްދުގެ އޮފިޝަލަކު ވިދާޅުވީ ތެޔޮ ބޭރުކުރުމުގެ މަސައްކަތްތައް މެދުނުކެނޑި ކުރިއަށްދާ ކަމަށާއި، އެ ހަމަލާގައި އެއްވެސް މީހަކަށް އަނިޔާވެފައި ނުވާ ކަމަށެވެ.

އީރާނުން ހޯރްމޫޒް ކަނޑުއޮޅީގެ ދަތުރުފަތުރަށް ހުރަސްއަޅަމުންދާނަމަ، އެ ރަށުގެ ތެލުގެ ވަސީލަތްތަކަށް ހަމަލާދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް މީގެ ކުރިން ވަނީ ދެއްވާފައެވެ.

މި މައްސަލައިގައި މަޝްވަރާކުރުމުގެ އެއްވެސް ފުރުސަތެއް އޮތް ކަމަކަށް ނުފެނެއެވެ. ހަނގުރާމަ ހުއްޓާލުމަށް ސަރަހައްދީ ގައުމުތަކުން ކުރަމުންދާ މަސައްކަތްތަކަށް ޓްރަމްޕްގެ ސަރުކާރުން ވަނީ ފުރަގަސްދީފައެވެ. ވައިޓް ހައުސްގެ އިސް އޮފިޝަލަކު ރޮއިޓާސް ނިއުސް އެޖެންސީއަށް މައުލޫމާތު ދެއްވަމުން ވިދާޅުވީ، ރައީސްގެ މިހާރުގެ އަމާޒަކީ ހަމަލާތައް ކުރިއަށް ގެންދިއުން ކަމަށެވެ.

އެ އޮފިޝަލް ވިދާޅުވި ގޮތުގައި، މި ވަގުތު މަޝްވަރާކުރުމުގެ އެއްވެސް ޝައުގުވެރިކަމެއް ރައީސްގެ ނެތް ކަމަށާއި، އެމެރިކާގެ އަސްކަރީ މިޝަން އެއްވެސް މަޑުޖެހުމެއް ނެތި ކުރިއަށްދާނެއެވެ.

ނަން ހާމަނުކުރާ އީރާނުގެ އޮފިޝަލަކާ ހަވާލާދީ ރޮއިޓާސްއިން ރިޕޯޓްކޮށްފައިވާ ގޮތުގައި، ހަމަލާތައް ކުރިއަށްދާހާ ހިނދަކު މަޝްވަރާ ނުކުރާނެ ކަމަށް އީރާނުން ވެސް ވަނީ ބުނެފައެވެ.

އީރާނުގެ ފޮރިން މިނިސްޓަރު އައްބާސް އަރަގްޗީ ހޮނިހިރު ދުވަހު ވިދާޅުވީ، މި ސަރަހައްދުގައި އެމެރިކާއިން ގާއިމުކޮށްފައިވާ ސަލާމަތީ އޮނިގަނޑަކީ ބާގަނޑުތަކުން ފުރިފައިވާ ނިޒާމެއްކަން ސާބިތުވެފައިވާ ކަމަށެވެ. އަދި ބޭރުގެ އުދުވާނީ ބާރުތައް ސަރަހައްދުން ބޭރުކުރުމަށް އަވަށްޓެރި ގައުމުތަކަށް އޭނާ ގޮވާލެއްވިއެވެ.

އިޒްރޭލުގެ ޑިފެންސް މިނިސްޓަރު އިސްރާއީލް ކަޓްޒް ބުނެފައިވަނީ، ބޭނުންވާ މިންވަރަށް ހަނގުރާމަ ކުރިއަށް ގެންދާނެ ކަމަށެވެ.

އޭއެފްޕީ ނިއުސް އެޖެންސީގެ ރިޕޯޓަރުން ބުނާ ގޮތުގައި، ހޮނިހިރު ދުވަހު އީރާނުން ވަނީ އިޒްރޭލަށް އަމާޒުކޮށް އާ މިސައިލް ހަމަލާތަކެއް ފޮނުވާލާފައެވެ. އަދި ގުދުސްގެ މަތިން ގޮވުންތަކުގެ އަޑު އިވިފައިވާ ކަމަށް ވެސް ރިޕޯޓްކޮށްފައިވެއެވެ.

އިޒްރޭލުގެ އަސްކަރިއްޔާއިން ބުނި ގޮތުގައި، ކްލަސްޓާ ބޮން ހިމެނޭހެން ހަ ފަހަރެއްގެ މަތިން އީރާނުން ވަނީ އެ ގައުމުގެ ބޮޑު ސަރަހައްދަކަށް މިސައިލް ހަމަލާދީފައެވެ. "ދަ ޓައިމްސް އޮފް އިޒްރޭލް" އިން ރިޕޯޓްކޮށްފައިވާ ގޮތުގައި، އެއިލާތަށް ދިން ކްލަސްޓާ ބޮމުގެ ހަމަލާއެއްގައި 12 އަހަރުގެ ފިރިހެން ކުއްޖަކާއެކު ޖުމްލަ ތިން މީހަކު ވަނީ ޒަޚަމްވެފައެވެ.