ނަތަންޔާހޫ މަރާލާނެ ކަމަށް ބުނެ އީރާން އިން ވަރުގަދަ އިންޒާރެއްދީ، އެކަމަށް ވައުދު ވެއްޖެ

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގައި، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ މަރާލާނެ ކަމަށް ބުނެ އީރާން އިން ވަރުގަދަ އިންޒާރެއް ދީފި އެވެ. 

އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފައި ވަނީ، މި ޙާލަތުގައި ނަތަންޔާހޫ ދުނިޔޭގައި ދިރި ހުރެއްޖެ ނަމަ، އޭނާ މަރާލާނެ ކަމަށް ވައުދުވާ ކަމަށެވެ. އީރާންގެ މީޑިއާ ތަކުން ބުނެފައި ވަނީ، ކުޑަ ކުދިން މަރާ ކުށްވެރިޔާ ނަތަންޔާހޫ ދުނިޔޭގައި ހުރި ނަމަ، އެންމެ ފުރިހަމަ އަދި ވަރުގަދަ ބާރާ އެކު ނަތަންޔާހޫ މަރާލާނެ ކަމަށް އައިއާރުޖީސީ އިން ބުނެފައިވާ ކަމަށެވެ. 

އީރާންގެ އައިއާރުޖީސީ އިން މި ބަޔާން ނެރެފައި ވަނީ، އެމެރިކާ އާއި އިޒްރޭލްގެ ހަމަލާ ތަކުގެ ސަބަބުން މެދު އިރުމަތީގެ ސަރަހައްދު އިތުރަށް ގޯސްވަމުންދާ ވަގުތެއްގަ އެވެ. އީރާން އާއި އިޒްރޭލްއާ ދެމެދު ނުތަނަވަސްކަން އިތުރުވެ، މިހާރު ވަނީ ނުރައްކާތެރި މިންވަރަަކަށް ކަންކަން ގޮސްފަ އެވެ. 

އީރާން އިން ނަތަންޔާހޫ އަކީ ކުޑަ ކުދިން މަރާ މީހެއްގެ ގޮތުގައި ސިފަ ކޮށްފައިވާއިރު، މުޅި ދުނިޔެ ވެސް އޭނާ ސިފަ ކުރަނީ ކުޑަ ކުދިން މަރާ މީހެއްގެ ގޮތުގަ އެވެ. އެއީ ޣައްޒާގައި އިޒްރޭލް އިން ހިންގަމުންދާ ހަނގުރާާމައިގައި އެއްވެސް ކުށެއް ނެތް މައުސޫމު ކުޑަ ކުދިންނަށް ހަމަލާ ދީ، ޝަހީދު ކުރަމުން ގެންދާތީ އެވެ. 

އީރާން އިން މިހެން ބުނެފައިވާއިރު، ނަތަންޔާހޫ މަރުވެފައިވާ ކަމަށް ބުނާ ވާހަކަ ތަކުގެ އަޑު ސޯޝަލް މީޑިއާގައި ގަދަވެފައި ވަނިކޮށް، ނަތަންޔާހޫގެ އޮފީހުން ބުނެފައި ވަނީ އޭނާ މަރު ނުވާ ކަމަށެވެ. އަދި އޭނާ މަރުވި ކަމަށް ބުނާ ޚަބަރު ތަކަކީ ކަނޑަ އެޅިގެން ދޮގެއް ކަމަށް ވެސް ބުނެފައިވެ އެވެ.