އެމެރިކާގެ ބާރާއި ނުފޫޒު ގެ ހަގީގީ ސައިޒް ސާބިތުކަމާ އެކު އީރާނުން ދުނިޔެއަށް އެ ދަނީ ދައްކަމުން!

ބައެއް ފަރާތްތަކުން އުންމީދީ ވާހަކަތަކެއް ދެއްކި ނަމަވެސް، އީރާނާ ދެކޮޅަށް އެމެރިކާއާއި އިޒްރޭލުން ފަށާފައިވާ ހަނގުރާމަ އަށް އަވަސް ހައްލެއް ލިބޭނެ ކަމަށް ބުނުމަކީ އަދި މާ އަވަސް ވާހަކައެކެވެ. މަސްރަހު އަދިވެސް އޮތީ ނުތަނަވަސްކޮށް ކަމަށްވާއިރު، އީރާނުގެ ސާބިތުކަން ދަނީ އިމްތިހާނު ކުރެވެމުންނެވެ. އަނެއްކޮޅުން ދުނިޔޭގެ ސުޕަރ ޕަވަރުގެ ގޮތުގައި ބުނަމުން ގެންދާ އެމެރިކާގެ ހަގީގީ ބާރު އޮތް މިންވަރާ މެދު ފުން ސުވާލުތަކެއް ދަނީ އުފެދެމުންނެވެ.

މެދުނުކެނޑި ދެމުންދާ އަސްކަރީ ޕްރެޝަރަށް އީރާނަށް ކެތްކުރެވޭނީ ކިހާ ދުވަހަކު ކަމެއް، ބޭރުގެ ބައިވެރިންގެ ކިބައިން އެ ގައުމަށް ލިބޭނީ ކިހާ މިންވަރެއްގެ އެހީތެރިކަމެއް ކަމެއް، އަދި އެމެރިކާގެ ވޮޝިންޓަނުން އުންމީދުކުރި މިންވަރަށް ވުރެ ދިގުލައިގެން ގޮސްފައިވާ މި ކެމްޕޭން ކުރިއަށް ގެންދަން އެމެރިކާ އޮތީ ކިހާ މިންވަރަކަށް ތައްޔާރަށް ކަމެއް އަދިވެސް ސާފެއް ނުވެއެވެ.

އިޒްރޭލުގެ ވެރިން ތިބީ މިކަން ކޮޅެއްގައި ޖެހެން ދެން ހަނގުރާމަ ގެންދިއުމުގެ އަޒުމުގައި ކަމަށްވެއެވެ. އެއާ ޚިލާފަށް، ޑޮނަލްޑް ޓްރަމްޕާއި އޭނާގެ ސަރުކާރުގެ އިސްވެރިން ތިއްބެވީ އީރާނުން ދައްކަމުންދާ ހައިރާންކުރުވަނިވި ސާބިތުކަމުގެ ސަބަބުން އިތުރަށް ހާސްވެފައެވެ. ހަމައެއާއެކު، އެމެރިކާގެ ގިނަ ބައިވެރިން ތިބީ މި ހަމަނުޖެހުމުގެ ސަބަބުން ނުކުމެދާނެ ނަތީޖާއަކާ މެދު ކަންބޮޑުވެފައެވެ. އެންމެ މުހިންމު ކަމަކީ، މި ހަނގުރާމައިގެ ސަބަބުން ދުނިޔޭގެ އިގްތިސާދަށް މިހާރުވެސް ބޮޑެތި ނޭދެވޭ އަސަރުތަކެއް ކުރަމުން ދިއުމާއެކު ހަނގުރާމަ ދިގުލައިފި ނަމަ ގައުމުތަކަށް ވެގެންދާނެ ގޮތަކާ މެދު ކުރެވޭ ސުވާލެވެ.

މި އިގްތިސާދީ ފިއްތުންތައް އިތުރުވަމުން ދިއުމުގެ ސަބަބުން، ތެހެރާނާއެކު މަޝްވަރާތައް ފެށުމަށްޓަކައި އެމެރިކާގެ ވޮޝިންޓަނުން ސިއްރިއްޔާތުގައި މެދުވެރިއަކު ހޯދަމުންދާ ކަމުގެ އަޑުތައް ވެސް ވަނީ ފެތުރިފައެވެ.

މިފަދަ ނުތަނަވަސް ދަނޑިވަޅެއްގައި، ރަޝިޔާއިން ވަނީ އީރާނުގެ ރައްޔިތުންނާއި ދައުލަތަށް ތާއީދުކުރާކަން ހާމަކޮށްފައެވެ. ރަޝިޔާއިން ދެކޭގޮތުގައި އީރާނަކީ އެއްވެސް އުދުވާނަކާ ނުލައި ދީފައިވާ ހަމަލާއެއްގެ ޝިކާރައެކެވެ. ހަމައެއާއެކު، މޮސްކޯއިން ގެންގުޅެންވާނީ އެ ގައުމުގެ އަމިއްލަ ސްޓްރެޓެޖިކް މަސްލަހަތުތަކާ ގުޅޭ ސިޔާސަތުތަކެއް ކަމަށް އެ ގައުމުން ދެކެއެވެ. ދުނިޔޭގެ އަސްކަރީ ބޮޑު ބާރެއްގެ ގޮތުގައި އޮތް ރަޝިޔާއިން އެންމެ ބޮޑަށް ސަމާލުކަންދެނީ ބައިނަލްއަގުވާމީ ނިޒާމުގެ ތެރޭގައި ބާރުތައް ހަމަހަމަކޮށް އޮތުމަށެވެ.

ވިހިވަނަ ގަރުނުގެ ފަހުބައިގައި އެމެރިކާއަށް ލިބުނު އާދަޔާ ޚިލާފު މަގާމަކީ ހަމައެކަނި އެ ގައުމުގެ ބާރުގަދަކަމުން ލިބުނު އެއްޗެއް ނޫނެވެ. އެއީ އޭރު ދުނިޔެ އޮތް ހާލަތުގެ ނަތީޖާއެވެ. ހަނގުރާމައިގެ ސަބަބުން ހުޅަނގު ޔޫރަޕް އޮތީ ސުންނާފަތިވެފައެވެ. ޗައިނާ އޮތީ އެތެރޭގެ ހަމަނުޖެހުންތަކެއްގެ ތެރޭގައެވެ. އަދި ސޯވިއެޓް ރަޝިޔާ އޮތީ ކޮމިއުނިސްޓް ނިޒާމުގެ ތެރޭގައި ދުނިޔެއާ އެކަހެރިވެފައެވެ. މި ހާލަތްތަކުގެ ސަބަބުން އެމެރިކާއަށް ވަރަށް ބޮޑު އިތުބާރަކާއެކު ދުނިޔޭގެ ލީޑަރެއްގެ މަގާމު ހޯދުމުގެ ފުރުސަތު ލިބުނެވެ.

ނަމަވެސް، މި ލީޑަޝިޕަކީ ރޯމަން އެމްޕަޔަރ ނުވަތަ ޗެންގިޒް ޚާންގެ އެމްޕަޔަރ ފަދަ އިސްތިއުމާރީ ފަތަހައެއްގެ ނަތީޖާއެއް ނޫނެވެ. އެމެރިކާއިން އެ ގައުމުގެ ވާދަވެރިން ބަލިކުރީ އަސްކަރީ ބޮޑު ކާމިޔާބީއަކުންނެއް ނޫނެވެ. އޭގެ ބަދަލުގައި، އެމެރިކާ އެންމެ ބާރުގަދަ ފަރާތުގެ ގޮތުގައި ފާހަގަވެގެންދިޔައީ، އެހެން ބާރުތައް އެ ގައުމުތަކުގެ އެތެރޭގެ މައްސަލަތައް ހައްލުކުރުމުގައި މަސްއޫލުވެގެން އުޅުނު ވަގުތެއްގައެވެ. މި މާނައިގައި ބަލާއިރު، އެމެރިކާއަކީ ގާފިލާގެ އެންމެ ފަހަތުގައި އޮތް "ޖަމަލެވެ". އެހެން ޖަމަލުތައް މަޑުޖެހުމުން، ކުއްލިއަކަށް އެންމެ ކުރިއަށް އެރީ އެމެރިކާއެވެ.

ނަމަވެސް މިއަދު، އެމެރިކާއަށް ދުނިޔޭގެ މައްޗަށް ގަދަވެގަތުމަށް މަގުފަހިކޮށްދިން ތާރީޚީ ހާލަތްތައް ވަނީ މުޅިން ބަދަލުވެފައެވެ. ދުނިޔޭގެ އެހެން ބާރުތައް އެމެރިކާގެ ފަހަތުގައި ތިބެންޖެހޭނެ އެއްވެސް ހަގީގީ ސަބަބެއް މިހާރަކު ނެތެވެ. އީރާނާ އެކު ފެށި ހަނގުރާމައިގައި ކަންކަން ފެނިގެންދާ ގޮތުން އެމެރިކާއަކީ ދުނިޔޭގެ އެންމެ ބާރުގަދަ ފަރާތުގެ ލަގަބު ގެއްލި، ދުނިޔޭގެ ސިޔާސީ މަސްރަހުގައި އާދައިގެ ބައިވެރިއަކަށް ވެގެންދިއުމަކީ އެކަށީގެންވާ ކަމެކެވެ.

އީރާނުގެ މައްސަލައިން މި ބަދަލު ވަރަށް ރަނގަޅަށް ހާމަވެއެވެ. އެމެރިކާގެ އަތުގައި އިންތިހާއަށް މުއްސަނދިކަމާއި އަސްކަރީ ގާބިލުކަން ހުރި ނަމަވެސް، ނިއުކްލިއާ ހަނގުރާމައަކަށް ނުގޮސް، އީރާން ފަދަ ބޮޑު އަދި ސާބިތުކަން ހުރި ދައުލަތެއް ކޮންޓްރޯލް ކުރުމަކީ އެމެރިކާއަށް ފަސޭހަ ކަމެއް ނޫންކަން ދަނީ ފެންނަމުންނެވެ. ނިއުކްލިއާ ހަނގުރާމައަކީ އެއްވެސް ފަރާތަކުން ވިސްނާނެ ކަމެއް ނޫނެވެ.

އެ މާނައިގައި ބަލާއިރު، ޓްރަމްޕް އީރާނާ ދެކޮޅަށް ފެއްޓެވި މި މަސައްކަތަކީ ތާރީޚީ ގޮތުން މުހިންމު ބޭނުމެއް ފުއްދައިދޭނެ ކަމެކެވެ. އެމެރިކާގެ ބާރުގެ ދަށުގައި މުޅި ދުނިޔެ އޮތް ޒަމާން އަލުން އަނބުރާ ގެނައުމަށް ކުރާ މަސައްކަތަކީ ބޭކާރު ކަމެއްކަން މިކަމުން ދުނިޔެއަށް ސާބިތުވެގެންދެއެވެ. މިއީ ހަމައެކަނި އެހެން ގައުމުތަކަށް އޮތް ފިލާވަޅެއް ނޫނެވެ. މިއީ އެމެރިކާގެ ރައްޔިތުންނަށް ވެސް ވަރަށް މުހިންމު ފިލާވަޅެކެވެ. އެމީހުންގެ ބާރަކީ ވެސް ވަކި މިންވަރެއްގައި އޮތް އެއްޗެއްކަން ގަބޫލުކޮށް، ބައިނަލްއަގުވާމީ މަސްރަހުގައި އާ ދައުރެއް ކަނޑައަޅަން އެމީހުންނަށް ވެސް މި ހަނގުރާމައިގެ ސަބަބުން މަޖުބޫރުވެގެންދާނެ ކަމަށް ބެލެވެއެވެ.

އެހެންކަމުން، މިހާރު ލިބެމުންދާ ހިތްދަތި ފިލާވަޅުތަކަކީ ނަތީޖާގެ ގޮތުން ފައިދާހުރި ކަންތައްތަކަކަށް މަގުފަހިވެދާނެ ކަމަކަށް ވެސް ވެދާނެއެވެ. އެމެރިކާގެ ބާރު ކުޑަވުމުން ދުނިޔެ ބޮޑު ހައިޖާނެއްގެ ތެރެއަށް ވެއްޓޭނެ ކަމަށް ބުނާ ބުނުމަކީ، މިހާރު އޮތް ނިޒާމު ދެމެހެއްޓުމަށްޓަކައި ބޭނުންކުރާ އުކުޅެކެވެ. ބާރުތައް ހަމަހަމަ ބައިނަލްއަގުވާމީ ނިޒާމެއް ގާއިމުކުރުމަކީ ކުރެވިދާނެ ކަމެކެވެ. އަދި އެއީ ގިނަ ގޮތްގޮތުން ބަލާއިރު ބޭނުންތެރި ކަމެއް ވެސް މެއެވެ.

މުސްތަގުބަލުގެ ބައިނަލްއަގުވާމީ ނިޒާމުގައި އެމެރިކާގެ މުހިންމުކަން އޮންނާނެއެވެ. ނަމަވެސް އެއީ ކުރިން އޮތް ގޮތަކަށް ނޫނެވެ.