އެސްޓީއޯއިން ޑީސަލާއި ޕެޓްރޯލްގެ އަގުބޮޑު ކުރުން: ޕެޓްރޯލް ލީޓަރެއް 26.81ރ އަދި ޑީސަލް ލީޓަރެއް 28.94ރ. އަށް
އިތުބާރު ހުރި ފަރާތަކުން ވިދާޅުވީ، އެސްޓީއޯއިން ވިއްކާ ޑީސަލާއި، ފެޓްރޯލް ވިއްކާ އަގު ބޮޑުކޮށް، އެކަން އެކުންފުނިތަކަށް ހޯމަ ދުވަހު އަންގާފައިވާ ކަަމަށް. އަދި ޝެޑުތައް ފިޔަވައި ހުންނަ ޕަމްޕުހައުސްތަކާއި ބައުޒަރުތަކުން ތެޔޮ ވިއްކާ ރޭޓު ބޮޑުކޮށްފައިވާ ކަމަށް. ތެލާއި ޕެޓްރޯލްގެ އަގު ދެގުނައަށް ބޮޑުވި ނަމަވެސް، އެސްޓީއޯ އާއި އެފްއެސްއެމް އިން މިކަން ރަސްމީކޮށް އަދި ހާމައެއް ނުކުރޭ.
ޕެޓްރޯލް ޝެޑްގައި މީހުން ކިއުގައި ޖެހިގެން ވެހިކަލްއަށް ޕެޓްރޯލް އަޅަނީ. | ރާއްޖެއެމްވީ
ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ޑީސަލާއި ޕެޓްރޯލް ވިއްކާ އަގު ދެވަނަ ފަހަރަށް ބޮޑު ކޮށްފި އެވެ.
އެސްޓީއޯގެ ސަބްސިޑަރީ ކުންފުނި، ފިއުލް ސަޕްލައި މޯލްޑިވްސް (އެފްއެސްއެމް) އިން ތެލާއި، ޕެޓްރޯލް ވިއްކާ އަގު އެންމެ ފުރަތަމަ ބޮޑު ކުރީ 5 މާޗު 2026 ގަ އެވެ. އެ ދުވަހު 13.50 ރުފިޔާއަށް އަށް ހުރި ޕެޓްރޯލް ލީޓަރެއް 16.01 ރުފިޔާއަށް ބޮޑުކުރި އެވެ. އަދި 13.92 ރުފިޔާއަށް ހުރި ޑީސަލް ލީޓަރެއްގެ އަގު 17.54 ރުފިޔާއަށް ބޮޑުކުރި އެވެ.
ރާއްޖެއެމްވީއަށް އިތުބާރު ހުރި ފަރާތަކުން ވިދާޅުވީ، އެސްޓީއޯއިން ވިއްކާ ޑީސަލާއި، ފެޓްރޯލް ވިއްކާ އަގު ބޮޑުކޮށް، އެކަން އެ ކުންފުނިތަކަށް ހޯމަ ދުވަހު އަންގާފައިވާ ކަަމަށެވެ. އަދި ޝެޑުތައް ފިޔަވައި ޕަމްޕު ހައުސްތަކާއި ބައުޒަރުތަކުން ތެޔޮ ވިއްކާ ރޭޓު ބޮޑުކޮށްފައިވާ ކަމަށް މައުލޫމާތު ލިބެ އެވެ.
އެގޮތުން ހުޅުމާލެ ޖެޓީގެ ޕަމްޕު ހައުސްތަކުންނާއި ބައުޒަރުތަކުން ޕެޓްރޯލް ލީޓަރެއް ހޯމަ ދުވަހު ވިއްކަނީ 26.81 ރުފިޔާ އަށެވެ. ޑީސަލް ލީޓަރެއް ވިއްކަނީ 28.94 ރުފިޔާ އަށެވެ.
މީގެ އިތުރުން އެފްއެސްއެމްގެ ކަސްޓަމަރުންނަށް އެ ކުންފުނިން ފޮނުވާފައިވާ އީމެއިލެއްގައި ބުނެފައިވަނީ ޑީސަލާއި ޕެޓްރޯލްގެ އަގަށް ބަދަލު އައިސްފައިވާ ކަމަށެވެ. އަދި ހޯމަ ދުވަހުން ފެށިގެން ޕެޓްރޯލް ލީޓަރެއްގެ އަގު 27.13 ރުފިޔާއަށް އަދި ޑީސަލް ލީޓަރެއްގެ އަގު 28.32 ރުފިޔާއަށް ބޮޑު ކޮށްފައިވާ ކަމަށެވެ.
ފެޓްރޯލް އާއި، ޑީސެލްގެ އަގު ދެގުނަ ބޮޑުކުރި ނަމަވެސް ރަސްމީކޮށް މި ބަދަލު ގެނައިކަން އެސްޓީއޯ އަދި އެފްއެސްއެމްއިން ހާމައެއް ނުކުރެ އެވެ.
އެސްޓީއޯ އިން ވިއްކާ ޑީސަލާއި ޕެޓްރޯލްގެ އަގު ބޮޑުކޮށްފައި މިވަނީ އެމެރިކާ އާއި އިޒްރޭލުން ގުޅިގެން އީރާން އަށް ހަމަލާ ދިނުމާއި އެކު އުފެދިފައިވާ ހަމަނުޖެހުމާއި ގުޅިގެން ދުނިޔޭގައި ތެލުގެ އަގުތައް ރެކޯޑް އަދަދަކަށް ބޮޑުވަމުންދާ ދަނޑިވަޅެއްގަ އެވެ. ތެޔޮ ސަޕްލައި ކުރަން ބޭނުންކުރާ މުހިންމު ޗެނަލެއް ކަމަށްވާ ހޮރްމުޒް ކަނޑުއޮޅި ވެސް އީރާނުން ވަނީ ބަންދުކޮށްފަ އެވެ.
