އީރާނުގެ އައު ލީޑަރު މުޖުތަބާ ޚާމަނާއީއަށް އަނިޔާވެފައިވާ ކަމަށް އެމެރިކާ އިން ބުނެފައި ވަނިކޮށް އެމަނިކުފާނުގެ ހާލުކޮޅާ މެދު "އެއްވެސް މައްސަލައެއް ނެތް" ކަމަށް ޚާރިޖީ ވަޒީރު ވިދާޅުވެއްޖެ

އެމެރިކާގެ އޮފިޝަލުންތަކެއް، އީރާނުގެ އައު ރޫހާނީ ލީޑަރު މުޖުތަބާ ޚާމަނާއީއަށް އަނިޔާވެފައިވާ ކަމަށް ރިޕޯޓުކޮށްފައި ވަނިކޮށް، އެމަނިކުފާނުގެ ހާލުކޮޅާ މެދު "އެއްވެސް މައްސަލައެއް ނެތް" ކަމަށް އީރާނުގެ ޚާރިޖީ ވަޒީރު ހޮނިހިރު ދުވަހު ވިދާޅުވެއްޖެއެވެ.

އެމެރިކާ އާއި އިޒްރޭލުން އީރާނާ ދެކޮޅަށް ކުރަމުންދާ ހަނގުރާމައިގެ ކުރީކޮޅު ދިން ހަމަލާއެއްގައި ބައްޕާފުޅު އަވަހާރަވުމާ ގުޅިގެން ވެރިކަމާ ހަވާލުވެވަޑައިގެންނެވި މުޖުތަބާ ޚާމަނާއީއަށް "އަނިޔާވެ، ސިފަ ބަދަލުވެފައިވާ ކަމަށް ގަބޫލުކުރެވޭ" ކަމަށް އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ހުކުރު ދުވަހު ވަނީ ވިދާޅުވެފައެވެ.

އީރާނުގެ ޚާރިޖީ ވަޒީރު އައްބާސް އަރާގްޗީ، އެމް.އެސް ނައު (MS NOW) އަށް ދެއްވި ބަސްދީގަތުމެއްގައި ވިދާޅުވީ، އައު ރޫހާނީ ލީޑަރުގެ ހާލުކޮޅާ މެދު އެއްވެސް މައްސަލައެއް ނެތް ކަމަށެވެ. އަދި އެމަނިކުފާނު އިއްޔެ މެސެޖެއް ފޮނުއްވާފައިވާ ކަމަށާއި، އެމަނިކުފާނުގެ މަސްއޫލިއްޔަތުތައް އަދާކުރައްވަމުން ގެންދަވާނެ ކަމަށްވެސް އަރާގްޗީ ވިދާޅުވިއެވެ.

އިޒްރޭލާއި އެމެރިކާއާ ދެކޮޅަށް ކުރަމުންދާ ހަނގުރާމައިގެ ތެރޭގައި އީރާނުގެ އައު ރޫހާނީ ލީޑަރު މުޖުތަބާ ޚާމަނާއީއަށް އަނިޔާވެފައިވާ ކަމަށް ދެކެވޭ ވާހަކަތަކާ ގުޅިގެން، އެމަނިކުފާނު ހުންނެވީ "ސަލާމަތުން އަދި ގަދަވެ ހެޔޮހާލުގައި" ކަމަށް އީރާނުގެ ރައީސްގެ ދަރިކަލުން ބުދަ ދުވަހު ވަނީ ވިދާޅުވެފައެވެ.

ސަރުކާރުގެ އެޑްވައިޒަރެއްގެ މަގާމުވެސް ފުރުއްވަމުން ގެންދަވާ ޔޫސުފް ޕެޒެޝްކިއަން އޭނާގެ ޓެލެގްރާމް ޗެނަލްގައި ކުރެއްވި ޕޯސްޓެއްގައި ވިދާޅުވީ، މުޖުތަބާ ޚާމަނާއީއަށް އަނިޔާވެފައިވާ ކަމުގެ ޚަބަރު ލިބުމާ ގުޅިގެން، ގުޅުން އޮންނަ ބައެއް ރަހުމަތްތެރިންގެ ގާތުން އެކަން އޮޅުންފިލުއްވާފައިވާ ކަމަށެވެ. އަދި މާތްﷲގެ އިރާދަފުޅާއެކު އެމަނިކުފާނު ހުންނެވީ ސަލާމަތުން ކަމަށް އެ ފަރާތްތަކުން މައުލޫމާތު ދީފައިވާ ކަމަށް ޔޫސުފް ވިދާޅުވިއެވެ.

އީރާނުގެ ދައުލަތުގެ ޓީވީން މުޖުތަބާ ޚާމަނާއީއަކީ "ރަމަޟާންމަހުގެ ހަނގުރާމައިގައި ޒަޚަމްވެފައިވާ ބަތަލެއް"ގެ ގޮތުގައި ސިފަކޮށްފައިވީ ނަމަވެސް، އެމަނިކުފާނަށް ލިބިފައިވާ އަނިޔާގެ ތަފްސީލެއް ހާމަކޮށްފައެއް ނުވެއެވެ.

އައު ރޫހާނީ ލީޑަރަކީ، ފެބްރުއަރީ 28 ވަނަ ދުވަހު އެމެރިކާ އާއި އިޒްރޭލުން އީރާނަށް ދިން ހަމަލާތަކުގައި އަވަހާރަވި، އީރާނުގައި ގިނަ ދުވަސްތަކެއް ވަންދެން ވެރިކަން ކުރެއްވި އަލީ ޚާމަނާއީގެ ދަރިކަލުންނެވެ. މި ހަމަލާތަކާ ގުޅިގެން މުޅި މެދުއިރުމަތީގައި ވަނީ ހަނގުރާމައެއް ފެށިފައެވެ.

އުމުރުފުޅުން 56 އަހަރުގެ މުޖުތަބާ ޚާމަނާއީއަކީ އާންމުންގެ ތެރެއަށް މާގިނައިން ނުކުމެވަޑައިގަންނަވާ ބޭފުޅެއް ނޫނެވެ. މިދިޔަ އާދީއްތަ ދުވަހު އީރާނުގެ ރޫހާނީ ލީޑަރުގެ މަގާމަށް އައްޔަންކުރެވުނު ފަހުން، އާންމުކޮށް ފެނިފައެއް ނުވެއެވެ.

ނިއުޔޯކް ޓައިމްސްއިން ބުދަ ދުވަހު ޝާއިއުކުރި ރިޕޯޓެއްގައި، އީރާނުގެ ނަން ހާމަނުކުރާ ތިން އޮފިޝަލަކާ ހަވާލާދީ ބުނެފައިވަނީ، މުޖުތަބާ ޚާމަނާއީގެ ފައިންޕުޅަށް އަނިޔާވެފައިވާ ކަމަށެވެ. ނަމަވެސް އެމަނިކުފާނު ހުންނެވީ ސަލާމަތުން ކަމަށާއި، މުވާސަލާތީ ވަސީލަތްތައް މަދު، ސަލާމަތީ ގޮތުން ވަރުގަދަ ތަނެއްގައި ރައްކާތެރިކަމާއެކު ހުންނެވި ކަމަށް އެ ރިޕޯޓުގައި ބުނެފައިވެއެވެ.