މެދު އިރުމައްޗަށް އެތައް ހާސް އިންޓަސެޕްޓް ޑްރޯންތައް ފޮނުވުމަށް އިނގިރޭސި ބޮޑު ވަޒީރު ވިސްނަވަނީ

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން މެދު އިރުމަތީގެ މަސްރަހު ވަރަށް ބޮޑަށް ހޫނުވެފައިވާއިރު، މެދު އިރު މައްޗަށް އެތައް ހާސް އިންޓަސެޕްޓް ޑްރޯން ފޮނުވުމަށް އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ވިސްނަވަމުންދާ ކަމަށް ރިޕޯޓު ކޮށްފި އެވެ.

ހޮނިހިރު ދުވަހު މި ވާހަކަ ރިޕޯޓު ކޮށްފައި ވަނީ ދަ ޓެލެގްރާފް ނޫހުގަ އެވެ. ރިޕޯޓުގައި ބުނެފައި ވަނީ، ރަޝިޔާ އިން ޔޫކްރެއިންއާ ދެކޮޅަށް ކުރިއަށް ގެންދަމުން އަންނަ ހަނގުރާމައިގައި ޔޫކްރެއިން އަށް ފޯރުކޮށްދިނުމަށް އިނގިރޭސިވިލާތުގައި އުފައްދާ އޮކްޓޮޕަސް އިންޓަސެޕްޓް ޑްރޯން ސިސްޓަމް ފޮނުވުމާ މެދު ދިރާސާ ކުރަމުން އަންނަ ކަމަށެވެ.

 އެގޮތުން އިނގިރޭސިވިލާތުގެ ސިފައިންގެ އޮފިޝަލުން ދިރާސާ ކުރަމުން އަންނަނީ އީރާންގެ ޝާހިދު ޑްރޯންތަކާ ދެކޮޅަށް، އިނގިރޭސިވިލާތުގެ ދިފާއީ ބާރުތައް ވަރުގަދަ ކުރުމަށް ބޭނުން ކުރެވިދާނެ ގޮތް ތަކާ މެދު ކަމަށް ވެސް ބުނެފައިވެ އެވެ. ނަމަވެސް ރޮއިޓާސް އިން ބުނެފައި ވަނީ މި ރިޕޯޓުގެ ޞައްޙަކަން ވަގުތުން ޔަޤީން ކުރެވިފައި ނުވާ ކަމަށެވެ.

އޮކްޓޮޕަސް ޑްރޯން ސިސްޓަމް އަކީ ދުޝްމަން ޑްރޯންތައް ހުއްޓުވުމަށް ޚާއްޞަ ކޮށްގެން ތައްޔާރު ކޮށްފައިވާ ޒަމާނީ ޓެކްނޮލޮޖީ ބޭނުން ކޮށްގެން އުފައްދާފައިވާ ނިޒާމެކެވެ. މި ނިޒާމަކީ ދުޝްމަނު ޑްރޯންތައް ދެނެގަނެ، އެ ޑްރޯންތައް ވަށައިގެން ވައްޓާލައި، ނުވަތަ ހަލާކު ކޮށްލުމުގެ ޤާބިލުކަން ލިބިފައިވާ ނިޒާމެކެވެ. 

ރަޝިޔާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާމަގައި، ޔޫކްރެއިން އިން މި ޑްރޯން ސިސްޓަމް ވަރަށް ބޮޑަށް ބޭނުން ކުރަމުން އަންނަ ކަމަށް ރިޕޯޓުތައް ބުނެ އެވެ. މި ސިސްޓަމް އިން ރަޝިޔާގެ ޑްރޯން ހަމަލާ ތަކުން ޔޫކްރެއިން ރައްކާތެރި ކުރުމަށް މުހިންމު ދައުރެއް އަދާ ކުރަމުން އަންނަ ކަމަށް ސިފައިންގެ ތަޖުރިބާކާރުން ވަނީ ބުނެފަ އެވެ. 

މެދު އިރުމަތީގެ ސަރަހައްދުގެ ޙާލަތު ގޯސްވަމުން އަންނައިރު، އީރާން އިން ބޭނުން ކުރާ ޝާހިދު ޑްރޯން ތަކަކީ މި ސަރަހައްދުގައި ޙަރަކާތްތެރިވާ އިނގިރޭސިވިލާތުގެ ސިފައިންނަށް ބޮޑު ނުރައްކަލަކަށް ވެފައިވާ ކަމެކެވެ. މި ޑްރޯން ތަކަކީ ވަރަށް ޚަރަދު ކުޑަކޮށް އުފެއްދި ދާނެ އަދި ވަރަށް ބޮޑު ގެއްލުން ތަކެއް ދިނުމުގެ ޤާބިލުކަން ލިބިފައިވާ ހަތިޔާރު ތަކެކެވެ. 

މިކަމުގައި އިނގިރޭސިވިލާތުގެ ސަރުކާރުން މިހާތަނަށް ރަސްމީ ނިންމުމެއް ނިންމާފައި ނުވި ނަަމަވެސް، އަސްކަރިއްޔާ އިން ކުރިއަށް ގެންދާ ދިރާސާ ތަކަށް ފަހު ބޮޑު ވަޒީރު ސްޓާމާގެ ސަރުކާރުން މި ނިންމުން ނިންމުމުގެ ފުރުސަތު އޮތް ކަަމަށް ފާހަގަ ކޮށްފައިވެ އެވެ.