އީރާން ހަނގުރާމައިގެ ސަބަބުން، ޗައިނާގެ ރައީސް އާއެކު ބާއްވާ ސަމިޓު ފަސް ކުރަން ޖެހިދާނެ ކަމަށް ޓްރަމްޕް ވިދާޅުވެއްޖެ

މާޗު މަހުގެ ފަހު ކޮޅު ޗައިނާގެ ރައީސް ޝީ ޖިން ޕިން އާއެކު ބޭއްވުމަށް ހަމަޖެހިފައިވާ މުހިންމު ސަމިޓު ފަސް ކުރަން ޖެހިދާނެ ކަމުގެ އިޝާރާތެއް އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ. 

ފައިނޭންޝަލް ޓައިމްސް އަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، ދުނިޔޭގެ މަސްރަހަށް އަންނަމުންދާ ބަދަލުތަކާ އެކު މި ބައްދަލުވުން ލަސް ވުމުގެ ފުރުސަތު އެބަ އޮތް ކަމަށެވެ. ޓްރަމްޕް މިހެން ވިދާޅުވެފައިވާއިރު، އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދަމުން އަންނަ ހަނގުރާމައިގެ ސަބަބުން ދުނިޔޭގެ މަސްރަހު ވަނީ ވަރަށް ބޮޑު ނުތަނަވަސްކަމެއްގެ ތެރޭގަ އެވެ. 

މީގެ އިތުރުން އެ އިންޓަވިޔުގައި ޓްރަމްޕް ވިދާޅުވީ، ހޮރުމޯޒް ކަނޑު އޮޅި އަލުންް ހުޅުވާލުމަށް ޗައިނާ އިން އެހީތެރިވާން ޖެހޭ ކަމަށެވެ. ޓްރަމްޕް ފާހަގަ ކުރެއްވި ގޮތުގައި ޗައިނާ އަށް ބޭނުންވާ ތެލުގެ 90 އިންސައްތަ އެ ސަރަހައްދުން ހޯދާއިރު، އެ ސަރަހައްދުގެ ސަލާމަތާއި ރައްކާތެރިކަން ކަށަވަރު ކުރުމުގައި ޗައިނާގެ ދައުރެއް އޮންނަން ޖެހޭނެ އެވެ. މިއީ އީރާންގެ މައްސަލައިގައި ޓްރަމްޕް ޗައިނާ އަށް ދެއްވި ނުސީދާ އިންޒާރެއްގެ ގޮތުގައި މަސްރަހު ދިރާސާ ކުރާ ފަރާތް ތަކުން ވަނީ ސިފަ ކޮށްފަ އެވެ. 

ޗައިނާގެ ރައީސް އާއެކު ބާއްވަވާ ސަމިޓު ފަސް ކުރަން ޖެހިދާނެ ކަމުގެ އިޝާރާތެއް ޓްރަމްޕް ދެއްވާފައި މި ވަނީ، އެމެރިކާ އާއި ޗައިނާގެ އިސް އޮފިޝަލުން ފްރާންސްގެ ވެރި ރަށް ޕެރިހުގައި ބައްދަލު ކުރައްވައި، ޓްރަމްޕް ޗައިނާ އަށް ކުރައްވާ ދަތުރުފުޅުގެ ނަތީޖާއާ ގުޅޭ ގޮތުން މަޝްވަރާ ކުރައްވަމުން ގެންދަވަނިކޮށެވެ. މިއީ 2017 ވަނަ އަހަރަށް ފަހު އެމެރިކާގެ ރައީސް އަކު ޗައިނާ އަށް ކުރައްވާ ފުރަތަމަ ދަތުރުފުޅަށް ވާއިރު، މި ދަތުރުފުޅުގެ މައިގަނޑު ބޭނުމަކީ ދުނިޔޭގެ އެންމެ ބޮޑު ދެ ބާރުގެ މެދުގައި އޮތް ގުޅުން ހަމައަކަށް އަޅުވައި، ދެބަސްވުންތައް ކޮންޓްރޯލް އިން ނެއްޓިގެން ދިޔަ ނުދިނުމެވެ. 

މި ދަތުރުފުޅު ކެންސަލް ވެއްޖެ ނަމަ، އެއީ ދެ ޤައުމުގެ އިޤްތިޞާދަށް ވެސް ލިބޭ ބޮޑު ގެއްލުމަކަށް ވާނެ އެވެ. ސަބަބަކީ މި ބައްދަލުވުމަކީ ވިޔަފާރީގެ އެއްބަސްވުން ތަކާއި، އެމެރިކާގެ ޓެކްނޮލޮޖީ ޗައިނާ އަށް އެކްސްޕޯޓު ކުރުމާއި، އަދި ޗައިނާގައި ހުންނަ މަދު މައުދަންތައް އެމެރިކާ އަށް އެކްސްޕޯޓު ކުރުމާ ގުޅޭ ގޮތުން މުހިންމު ނިންމުން ތަކެއް ނިންމުމަށް ތާވަލު ކޮށްފައި އޮތުމެވެ. އެހެންކަމުން މި ދަތުރުފުޅަކީ ދެ ޤައުމުގެ ބޮޑެތި ކުންފުނި ތަކަށް ވެސް ނުހަނު މުހިންމު ދަތުރުފުޅެކެވެ.