ކާމިޔާބީ އިއުލާން ކުރުމަށް ފަހު، އީރާނުގެ ހަނގުރާމަ އިން ބޭރުވާން ޖެހޭ ކަމަށް ޓްރަމްޕްގެ އިސް އެޑްވައިޒަރަކު ވިދާޅުވެއްޖެ

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގައި ކާމިޔާބީ އިއުލާން ކުރުމަށް ފަހު، ހަނގުރާާމަ އިން ބޭރުވާން ޖެހޭ ކަމަށް އެމެރިކާގެ ރިޔާސީ ގަނޑުވަރު ވައިޓް ހައުސްގެ އިސް އޮފިޝަލަކު ވިދާޅުވެއްޖެ އެވެ.

އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ އެޑްވައިޒަރު ޑޭވިޑް ސޭކްސް މިހެން ވިދާޅުވެފައި ވަނީ، ހުކުރު ދުވަހު ކުރިއަށް ގެންދިޔަ އޯލް އިން ވަން ޕޮޑްކާސްޓުގައި ވާހަކަ ދައްކަވަމުންނެވެ. އޭނާ އަކީ ވައިޓް ހައުސްގެ އާޓިފިޝަލް އިންޓެލިޖެންސް (އޭއައި) އަދި ކްރިޕްޓޯއާ ބެހޭ އިސްވެރިޔާ އެވެ. 

އެގޮތުން އޭނާ ވިދާޅުވީ މިއީ އީރާން ހަނގުރާމައިގެ ކާމިޔާބީ އިއުލާން ކުރުމަށް ފަހު، ހަނގުރާމަ އިން ބޭރުވާންވީ އެންމެ ރަނގަޅު ވަގުތު ކަމަށެވެ. މިއީ އެމެރިކާގެ ރައީސް ޓްރަމްޕްގެ ސަރުކާރުގެ އިސް މަޤާމެއްގައި ހުންނެވާ ބޭފުޅަކު، އީރާންއާ ދެކޮޅަށް ކުރިއަށް ގެންދާ ހަނގުރާމަ ހުއްޓާލުމަށް ގޮވާލެއްވި ފުރަތަމަ ފަހަރުކަން ފާހަގަ ކުރެވެ އެވެ. ސޭކްސް ފާހަގަ ކުރެއްވި ގޮތުގައި އެމެރިކާ އިން މިހާރު ވަނީ އީރާންގެ އަސްކަރީ ޤާބިލުކަން ވަރަށް ބޮޑަށް ދަށް ކޮށްލައިފަ އެވެ. 

އީރާނުގެ ހަނގުރާމަ އިން އަވަހަށް ނުކުމެވޭނެ މަގެއް ހޯދުމަށް ތާއީދު ކުރައްވާކަން ހާމަ ކުރައްވަމުން ސޭކްސް ވިދާޅުވީ، މަސްލަޙަތު ގޯސްވުން ނޫން ކަމެއް ހަނގުރާމަ އިން ނުނިކުންނަ ނަމަ، ދެން އިސްކަން ދޭން ޖެހޭނީ މަސްލަޙަތު ފިނި ކުރާނެ ގޮތަކާ މެދު ކަމަށެވެ. އަދި މަސްލަޙަތު ފިނި ކުރެވޭނީ އީރާން އާއެކު ސުލްޙައިގެ އެއްބަސްވުމަކަށް އައިސްގެން ނުވަތަ، މަޝްވަރާގެ މޭޒަށް ގެންގޮސްގެން ކަމަށް ވެސް އޭނާ ވަނީ ވިދާޅުވެފަ އެވެ. 

އެމެރިކާ އާއި އިޒްރޭލުން ގުޅިގެން އީރާންއާ ދެކޮޅަށް ހަނގުރާމަ ފަށާފައި ވަނީ މިދިޔަ ފެބްރުވަރީ މަހުގެ 28 ވަނަ ދުވަހު އެވެ. އެ ހަމަލާ ތަކަށް ރައްދު ދިނުމުގެ ގޮތުން އީރާނުންނާއި، ލުބުނާންގައި ޙަރަކާތްތެރިވާ ހިޒްބުﷲ ޖަމާއަތުން ދަނީ އިޒްރޭލް އާއި މެދު އިރުމަތީގައި ހުރި އެމެރިކާގެ އަމާޒު ތަކަށް ހަމަލާ ދެމުންނެވެ. މި ހަނގުރާމައިގެ އަސަރު ދުނިޔެ އަށް ވަރަށް ބޮޑަށް ކުރަމުން އަންނައިރު، ދުނިޔޭގެ ބާޒާރުގައި ތެލުގެ އަގު ވަނީ ރެކޯޑު މިންވަރަކަށް މައްޗަށް ގޮސްފަ އެވެ.