ހަމަލާ ތަކުން ދިފާއު ވުމުގެ ޙައްގު ޔޫއޭއީ އަށް އެބަ އޮތް، އެކަމަކު މިތިބީ ކެތްތެރިކަން އިސްކޮށްގެން: ޔޫއޭއީ ރައީސްގެ އެޑްވައިޒަރު

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން، މެދު އިރުމަތީގެ ސަރަހައްދު ތަކަށް އަމާޒުކޮށް އީރާން އިން ދެމުންދާ ހަމަލާތަކާ ގުޅިގެން، އަމިއްލަ ނަފްސު ދިފާއު ކުރުމުގެ ހައްގު އެކުވެރި އަރަބި އިމާރާތް (ޔޫއޭއީ) އަށް ލިބިގެންވާ ކަމަށާއި، ނަމަވެސް އެ ޤައުމުން އިސަކަން ދެނީ ކެތްތެރިކަން އިސްކުރުމަށް ކަމަށް އިސް އޮފިޝަލަކު ވިދާޅުވެއްޖެ އެވެ. 

ޔޫއޭއީގެ ރައީސްގެ އެޑްވައިޒަރު އަންވަރު ގަރްގާޝް ހޮނިހިރު ދުވަހުގެ ރޭ އެކްސްގައި ކުރެއްވި ޕޯސްޓެއްގައި ވިދާޅުވީ، އެ ޤައުމާ ދެކޮޅަށް ހިންގަމުންގެންދާ ޓެރަރިސްޓް އުދުވާން ތަކުން ސަލާމަތް ވުމަށް ދިފާއީ ފިޔަވަޅު އެޅުމުގެ ފުރިހަމަ ހައްޤު ޔޫއޭއީ އަށް އޮތް ކަަމަށެވެ. ނަަމަވެސް، އެ ޤައުމުން އަަދިވެސް އިސްކަން ދެނީ ބުއްދީގެ ބޭނުންކޮށް، ހަމަޖެހުމަށް މަގު ފަހިވާނެ ގޮތަކަށް އަަމަލު ކުރުމަށް ކަމަށް ވެސް އޭނާ ވިދާޅުވި އެވެ. ހަމަ އެހެންމެ، އީރާން އާއި މުޅި ސަރަހައްދު ނުރައްކާތެރި ޙާލަތުން ސަލާމަތް ވާނެ މަގެއް ހޯދުމަށް ޔޫއޭއީ އިން މަސައްކަތް ކުރަމުންދާ ކަމަށް ވެސް ގަރްގާޝް ވިދާޅުވި އެވެ. 

މީގެ އިތުރުން އެމެރިކާ އާއި އިޒްރޭލުން ގުޅިގެން އީރާނާ ދެކޮޅަށް މިހާރު ހިންގަމުން ގެންދާ ހަނގުރާމައިގެ ޙާލަތުން ސަލާމަތް ވުމަށްޓަކައި، އެންމެ ފަހު ވަގުތާ ޖެހެންދެން ވެސް ޔޫއޭއީ އިން މެދުވެރިއެއްގެ ދައުރު އަދާކޮށް، އިޚުލާސްތެރި މަސައްކަތް ތަކެއް ކޮށްފައި ވާނެ ކަމަށް ވެސް އޭނާ ވަނީ ފާހަގަ ކުރައްވައިފަ އެވެ. 

ގަރްގާޝްގެ ވާހަކަައިގައި އޭނާ ވަނީ އީރާންގެ ފޮރިން މިނިސްޓަރު އައްބާސް އަރާގްޗީ އަށް ވަރަށް ބޮޑަށް ފާޑު ވިދާޅުވެފަ އެވެ. އީރާންއާ ދެކޮޅަށް ޔޫއޭއީ އިން އުދުވާނީ އަމަލު ތަކެއް ހިންގާ ކަމަށް ވިދާޅުވެ، އަރާގްޗީ ކުރައްވާ ތުހުމަތަކީ އެއްވެސް އަސާސެއް ނެތް ވާހަކަ ތަކެއް ކަމަށް އޭނާ ވިދާޅުވި އެވެ. ގަރްގާޝް ސިފަ ކުރެއްވި ގޮތުގައި އީރާންގެ މި ސިޔާސަތަކީ މިސްރާބު އޮޅިފައިވާ އަދި ބުއްދިވެރި ކަމެއް ނެތް އޮޅުން ބޮޅުން ބޮޑު ސިޔާސަތެކެވެ. 

އެމެރިކާ އާއި އިޒްރޭލްގެ ހަމަލާ ތަކުގެ ރައްދުގައި، އީރާން އިން ގެންދަނީ މެދު އިރުމަތީގެ ސަރަހައްދުގައި ހުރި އެމެރިކާާގެ ބޭސް ތަކުގެ އިތުރުން، އެމްބަސީ ތަަކަށް ވެސް ހަމަލާ ދެމުންނެވެ.