މުއިއްޒުގެ މޭޔަރުކަމުގައި މަސް މާރުކޭޓް އަޅަން ހަވާލުކުރި މައްސަަލަ އޭސީސީގައި އޮއްވާ ރައީސް ކަމުގައި ހުންނަވައިގެން އަނެއްކާވެސް އެ ޕްރޮޖެކްޓް ބަޔަކާއި ހަވާލުކޮށްފި

މިހާރުގެ ރައީސް ޑރ. މުހައްމަދު މުއިއްޒު މޭޔަރުކަމުގައި ހުންނަވައިގެން މާލޭގެ މަސް މާރުކޭޓް ތަރައްގީކުރުމަށް ބޮޑު އަގުގައި ދެ ބަޔަކާއި ހަވާލުކޮށް، އެ މައްސަލަ އޭސީސީގައި އޮއްވާ، ރައީސް ކަމުގައި ހުންނަވައިގެން އެމަނިކުފާނުގެ ކޮންސްޓްރަކްޝަން މިނިސްޓްރީން އެ މަސައްކަތް އެހެން ބަޔަކާއި ހަވާލުކޮށްފި އެވެ.

ކޮންސްޓްރަކްޝަން މިނިސްޓްރީ އިން ބުނީ މާލޭ ވެޓް މާކެޓް ކޮމްޕްލެކްސް ތަރައްޤީކުރުމުގެ މަޝްރޫޢުގެ އެއްބަސްވުމުގައި ޓްރަސްޓެންގ މޯލްޑިވްސް ޕްރައިވެޓް ލިމިޓެޑާއެކު ސޮއިކޮށްފައިވާ ކަމަށެވެ. މި އެއްބަސްވުމުގައި މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ މުޙައްމަދު ޝާމިލް އެވެ. އަދި ޓްރަސްޓެންގ މޯލްޑިވްސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ މުޙައްމަދު ޢަބްދުލް ހާދީ އެވެ.

މި ކޮންޓްރެކްޓުގެ އަގަކީ 126,359,594.94 ރުފިޔާ އެވެ. މަސައްކަތް ނިންމަން ހަވާލުކުރީ 600 ދުވަހުގެ ތެރޭގަ އެވެ. 

މި މަޝްރޫޢުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކީ، 6 ފަންގިފިލާގެ ވެޓް މާކެޓް ކޮމްޕްލެކްސްއެއް އެޅުމެވެ. އަދި އެ 6 ފަންގި ފިލާގެ ތެރޭގައި ބޭސްމަންޓް ޕާރކިންގ އަށް ހާއްސަ ކުރެވެ އެވެ. ގްރައުންޑް ފްލޯ މަސް މާރކޭޓަށް ހަމަޖައްސާފައިވާ އިރު، 1 ވަނަ، 2 ވަނަ އަދި 3 ވަނަ ފްލޯ ތަރުކާރީ މޭވާ ވިއްކާ މާރުކޭޓަށް ހަމަޖައްސާ 4 ވަނަ ފްލޯގައި ފުޑް ކޯޓު ހިމެނޭނެ ކަމަށް މިނިސްޓްރީ އިން ބުނެ އެވެ. 

ރައީސް މުއިއްޒުގެ ސަރުކާރުން މަސް މާރުކޭޓް އަޅަން ބަޔަކާއި ހަވާލު ކުރި އިރު، މޭޔަރު ކަމުގައި ހުންނަވައިގެން ވެސް އެތަން ތަރައްގީ ކުރުމަށް ދެ ޕާޓީއަކާ ހަވާލު ކުރި އެވެ. 

ރައީސް ޑރ. މުހައްމަދު މުއިއްޒުގެ މޭޔަރުކަމުގައި ކައުންސިލުން ވަނީ ބިޑަށް އިއުލާނުކޮށް އިވެލުއޭޓްކޮށް ވަކި ބަޔަކަށް މަސް މާރުކޭޓުގެ މަސައްކަތް ހަވާލުކޮށްފައި އެވެ. އެ މަސައްކަތް އޭރު ހަވާލުކޮށްފައި އޮތީ 6.1 މިލިއަން ޑޮލަރަށެވެ. މަސް މާރުކޭޓު ތަރައްގީ ކުރުމަށް ބަޔަކާއި ހަވާލުކުރުމަށް ދެވަނަ އެއްބަސްވުމެއް 9.5 މިލިއަން ޑޮލަރަށް ހަދާފައިވާއިރު، އެ އެއްބަސްވުން ހަދާފައިވަނީ ކުރިންހަދާފައިވާ އޮރިޖިނަލް އެއްބަސްވުމަށް ވުރެ، 3.5 މިލިއަން ޑޮލަރު އިތުރު އަގަކަށެވެ.  މި އެއްބަސްވުނަ ހަދާފައިވަނީ މިހާރުގެ ރައީސް މުއިއްޒު ރައީސް ކަމަށް ހޮވުނު ފަހުން އަދި މޭޔަރު އާޒިމް އެ މަގާމަށް ހަވާލުވުމުގެ ކުރިންނެވެ. 

މި މައްސަލަ އޭސީސީއަށް ހުށަހަޅައިފައިވީ ނަމަވެސް، މިހާތަނަށް މި މައްސަލަ އެ ކޮމިޝަނުން ތަހުގީގުކުރަން ފެށިކަމެއް އެ ކޮމިޝަނުން ހާމަ ނުކުރެ އެވެ.