މުއިއްޒުގެ މަގްސަދަކީ 30 އަހަރުގެ ވެރިކަން ތަކުރާރުކުރުން: ފަލާހު
13 މާރިޗު 2026 | ހުކުރު 05:07ރައީސް ޑރ. މުއިއްޒުގެ ސިޔާސަތުތަކަކީ ރައްޔިތުންގެ ވޯޓުގެ ބާރު ކަނޑުވާލައި، ރާއްޖޭގައި ކުރިން އޮތް 30 އަހަރުގެ ދިގު ވެރިކަން އިއާދަކުރުން ކަމަށް ރައްޔިތުންގެ މަޖިލީހުގެ ކުރީގެ މެންބަރު މުހައްމަދު ފަލާހު ވިދާޅުވެއްޖެ. އިންތިޚާބުތައް އެއްކޮށްލުމަށް ކުރާ މަސައްކަތަކީ ރައްޔިތުންގެ ގާތަށް ދާންޖެހޭ މިންވަރު މަދުކުރުމަށް ކުރާ ކަމެއްގެ ގޮތުގައި އޭނާ ސިފަކުރެއްވި. އަދި ރައްޔިތުންނަށް މިއަދު ލިބޭ ގިނަ ޚިދުމަތްތަކަކީ ވޯޓުގެ ބާރުން ހޯދާފައިވާ ކަންކަން ކަމަށް ފާހަގަކުރައްވައި، އެ އިޚްތިޔާރު ހަނިކުރުމާ ދެކޮޅަށް ފަލާހު ވަނީ ފާޑުވިދާޅުވެފައި.
މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު | ރާއްޖެ އެމްވީ
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސިޔާސަތުތައް ހުރީ ރާއްޖޭގައި ކުރިން އޮތް 30 އަހަރުގެ ދިގު ވެރިކަން އަލުން ތަކުރާރުކުރައްވައި، ރައްޔިތުންނަށް ލިބިފައިވާ ވޯޓުލުމުގެ ބާރު ކަނޑުވާލުމަށް ކަމަށް މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު ވިދާޅުވެއްޖެ އެވެ.
ރާއްޖެޓީވީން ގެނެސްދޭ "ނޫނެކޭ" ޕްރޮގްރާމުގައި ވާހަކަ ދައްކަވަމުން ފަލާހު ވިދާޅުވީ، ރައްޔިތުންނަށް މިއަދު ލިބެމުންދާ ގިނަ ޚިދުމަތްތަކަކީ ވޯޓުލުމުގެ ބާރު ރައްޔިތުންގެ އަތްމަތީގައި އޮތުމުން ލިބޭ ފައިދާތަކެއް ކަމަށެވެ. އެގޮތުން އުމުރުން ދުވަސްވީ މީހުންނަށް ދޭ އިނާޔަތާއި، ސަލާން ނުޖަހައި ބޭސްފަރުވާ ކުރެވޭނެ ނިޒާމަކާއި، ދަރިންނަށް ހިލޭ ޑިގްރީއަށް ކިޔެވޭނެ މަގު ފަހިވީ ރައްޔިތުން އެ ހައްގު ހޯދަން ކުރި މަސައްކަތުން ކަމަށް އޭނާ ފާހަގަކުރެއްވި އެވެ. އަދި ދައުލަތަށް ލިބޭ އާމްދަނީ ބަޖެޓުން އެނގެން އޮންނަނީވެސް ވޯޓުގެ ބާރުން ރައްޔިތުންނަށް އެ ހައްގު ލިބިދީފައިވާތީ ކަމަށް ފަލާހު ވިދާޅުވި އެވެ.
ފަލާހު ވިދާޅުވި ގޮތުގައި ރައީސް މުއިއްޒު މިހާރު މަސައްކަތް ކުރައްވަނީ ރައްޔިތުންނަށް ލިބިފައިވާ އެ އިޚްތިޔާރު ހަނިކުރުމަށެވެ. މިދިޔަ ރިޔާސީ އިންތިޚާބުގެ ކެމްޕޭން ތެރޭގައި ރަށްރަށަށް ވަޑައިގެން ތަރައްގީގެ ނަމުގައި ދެއްކެވި ވާހަކަތަކަށް ފާޑުވިދާޅުވަމުން ފަލާހު ވިދާޅުވީ، ކޮންމެ ރަށަކަށް ފައިބަވަޑައިގެން ހަތަރުސްކަން ގޮޅިއެއް ކޮނެލުމަށްފަހު، ސިމެންތި ބާލިދީއެއް އަޅާލައި އެއީ ތަރައްގީ ކަމަށް ދެއްކެވި އުސޫލު އަލުން އިއާދަކުރަން ސަރުކާރުން އުޅޭ ކަމަށެވެ.
ކޮންމެ ރަށަކަށް ފައިބަވައިވަޑައިގެން ހަތަރެސްކަން ގޮޅިއެއް ކޮނެލާފައި އެ އުވަދޯނި ތިރިކޮށްލާފައި ސިމެންތި ބާލިދީއެއް ގަށާލާ، އަޅައިލާފައި މި ބުނަނީ، މި ރަށުގެ ތަރައްޤީއޭ މިހިރީ. އޭތި އަލުން އަނބުރާ ގެންނަން މިއަދުގެ ސަރުކާރުން މި އުޅެނީ އިނގޭތޯ. މިއަދުގެ ވެރިކަމުގައި ހުންނެވި ބޭފުޅާ މި އުޅެނީ. އަދި ތިރީސް އަހަރަށް ވުރެ ގިނަ ދުވަހު ވެރިކަމުގައި ހުންނަވަން. އެހެންވީމާ، މިއަދުގެ ޒުވާނުންނަށް އަސްލު އެނގެންޖެހޭނެ، ރާއްޖޭގެ ރައްޔިތުންނަށް ހެވާއި ލާބަޔާއި ލިބިފައި މި އޮތީ، ވޯޓުލުމުގެ ޙައްޤު އަޅުގަނޑުމެން އެތަކެއް ބުރަ މަސައްކަތެއް ކޮށްގެން ހޯދައިދިނީމަ އިނގޭތޯ. މިހާރު އެ ހުންނެވި ރައީސުލްޖުމްހޫރިއްޔާ ކުރައްވަން އުޅުއްވާ ކަމަކީ، ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލީމާ، ދެން ކޮންމެ ފަސް އަހަރަކުން އެއް އަހަރު ރައްޔިތު މީހާއަށް ފޯނުންވެސް ގުޅާލާނީ. އެހެންނޫންނަމަ، މަގުމަތީ ކޮންމެ ދުވަހެއްގެ މެންދުރުފަހު ރަށްދަކަ އަވީގެ ދާހިއްލާފައި އޮވެގެން ހުރިހާ ގެއަކަށް ވަޑައިގަންނަވަނީ. އެކަން ހުއްޓާލަން ބޭނުންވަނީ.މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު
މީގެ އިތުރުން، ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމަށް ސަރުކާރުން ކުރާ މަސައްކަތަކީ ރައްޔިތުންގެ ގާތަށް ދާންޖެހޭ މިންވަރު މަދުކުރުމަށް ކުރާ ކަމެއްގެ ގޮތުގައި ފަލާހު ސިފަކުރެއްވި އެވެ. އޭނާ ވިދާޅުވީ އިންތިޚާބުތައް އެއްކޮށްލުމުން ކޮންމެ ފަސް އަހަރަކުން އެއްފަހަރު ނޫނީ ރައްޔިތުންގެ ހާލު ބަލަން ސިޔާސީ ވެރިން ނުދާނެ ކަމަށާއި، އަވީގައި ހިނގައިގެން ރައްޔިތުންގެ ގާތަށް ދިއުމަކީ ރައީސަށް "ހަޑިހުތުރު" ކަމަކަށް ވެފައިވާ ކަމަށެވެ.
ފަލާހު އިތުރަށް ވިދާޅުވީ، ރައްޔިތުންގެ ކަންކަން ކުރަން ހަވާލުވާ މީހުން ރައްޔިތުންގެ ގާތަށް ދާން ނުޖެހޭ ގޮތަށް ކަންކަން ބައްޓަން ކުރުމަކީ އަނެއްކާވެސް ރާއްޖެއަށް 30 އަހަރުގެ ދިގު ވެރިކަމެއް ގެނައުމަށް ކުރާ މަސައްކަތެއް ކަމަށެވެ. އެހެންކަމުން މިއަދުގެ ޒުވާނުންނަށް މިކަންކަން އެނގެންޖެހޭނެ ކަމަށާއި، ރައްޔިތުންނަށް ލިބިފައިވާ ހެވާއި ލާބައަކީ ވޯޓުލުމުގެ ހައްގު ހޯދަން ކުރި ބުރަ މަސައްކަތުގެ ނަތީޖާކަން ހަނދާން ކުރަންޖެހޭނެ ކަމަށްވެސް އޭނާ ވިދާޅުވި އެވެ.
