ދެ އިންތިހާބެއް އެއްކޮށްލަން އުޅުމަކީ ގާނޫނުއަސާސީ އިން ރައީސް އަށް ލިބިގެންވާ ބާރެއް ނޫން، މިއީ ރައީސް އަޒުލުކުރަންޖެހޭ ވަރުގެ މައްސަލަ އެއް: މޫސަ

ރާއްޖޭގައި ބާއްވާ ދެ އިންތިހާބެއް އެއްކޮށްލުމަށް ސަރުކާރުން ކުރަމުންދާ މަސައްކަތަކީ ގާނޫނުއަސާސީން ރައީސުލްޖުމްހޫރިއްޔާއަށް ލިބިދީފައިވާ ބާރެއް ނޫން ކަމަށާއި، އެއީ ރައީސުލްޖުމްހޫރިއްޔާ މަގާމުން އަޒުލުކުރަންޖެހޭ ފަދަ މައްސަލައެއް ކަމަށް އެމްޑީޕީގެ ކުރީގެ ޗެއަރޕާސަން މޫސާ މަނިކު (ރީކޯ) ވިދާޅުވެއްޖެ އެވެ.

ރާއްޖެޓީވީން ގެނެސްދޭ "ނޫނެކޭ" ޕްރޮގްރާމުގައި ވާހަކަދައްކަވަމުން މޫސަ ވިދާޅުވީ، ގާނޫނުއަސާސީގެ 115 ވަނަ މާއްދާގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުތަކުގެ ތެރޭގައި އިންތިހާބުތައް އެއްކޮށްލުމުގެ ބާރު ހިމެނިގެން ނުވާ ކަމަށެވެ.

މޫސަ ވިދާޅުވީ ގާނޫނުއަސާސީގެ ހަތަރުވަނަ މާއްދާއިން ރައްޔިތުންނަށް ލިބިދީފައިވާ ބާރުގެ ދަށުން، ގާނޫނުއަސާސީގެ ތިންވަނަ ބާބުގައި ރައްޔިތުންގެ މަޖިލިސް އުފައްދާފައިވާ އިރު، މަޖިލިސް މެންބަރަކު މަގާމުން ވަކިކުރެވޭނީ ވަރަށް ސާފު ދެ ހާލަތެއްގައި ކަމަށެވެ. އެއީ ޖިނާއީ މައްސަލައެއް ސާބިތުވެ ހުކުމެއް އައުމާއި، ސާބިތު ދަރަންޏެއް ހުކުމާ އެއްގޮތަށް ނުދެއްކުމެވެ. ނަމަވެސް، ސިޔާސީ ޕާޓީއަކުން ވަކިވުމުން މެންބަރުކަން ގެއްލޭ ގޮތަށް ގާނޫނުއަސާސީއަށް ބަދަލު ގެނައުމަކީ ދުސްތޫރީ ގޮތުން ސުވާލު އުފެދޭ ކަމެއް ކަމަށާއި، އެ މައްސަލަ ސުޕްރީމް ކޯޓުގައި މިހާރު ވެސް އޮތީ "ޕާކުކޮށްފައި" ކަމަށް އޭނާ ފާހަގަކުރެއްވި އެވެ.

ސިޔާސީ ޕާޓީއަކުން އޭނަ ކެނޑުނީމަ އެމީހާ ވަކި ވާ ގޮތަށް. ކެނޑުނީމާ ރައްޔިތުންގެ ތެރެއިން ބަޔަކު މިދިޔައީ ސްޕްރީމް ކޯޓަށް. ދިވެހިރާއްޖޭގެ ޤާނޫނުއަސާސީގެ ދެ ވަނަ މާއްދާގައި އޮންނާނެ މި ރާއްޖެއަކީ އިސްލާމީ އުސޫލުތަކުގެ މައްޗަށް ޢަމަލުކުރެވޭ ތަން. އިސްލާމްދީނުގެ އެންމެ މުހިންމު އެއް ކަމަކީ، ޢަދުލުއިންޞާފު ޤާއިމުކުރުން. އެގޮތަށް އޮއްވާ މިދިޔައީ ސުޕްރީމް ކޯޓަށް މައްސަލަ ހިފައިން. ނަމަވެސް، ސުޕްރީމް ކޯޓުގައި ތިބި މެންބަރުން ކަނޑައި ވަކިކޮށްފައި އަދިވެސް މައްސަލަ އޮތީ ޕާކުކޮށްފަ. އޮއްވާ ދެ ވަނަ ދުސްތޫރީ މައްސަލައެއް އަނެއްކާ މި ކުރިމަތިކުރުވީ. ދެ ވޯޓު އެއްކުރަން. ފެންނަ ނުފެންނަ ވޯޓެއް ނަގަން. ކިހިނެއްތޯ އެކަން ކުރަނީ؟ ކޮންމެ މީހަކު ބެލިޔަސް، ރައީސުލްޖުމްހޫރިއްޔާ ޤާނޫނުއަސާސީގެ ސަތޭކަފަނަރަ ވަނަ މާއްދާގެ ދަށުން ލިބޭ ޙައްޤެއް ނޫން އެއީއަކީ ރައީސުލްޖުމްހޫރިއްޔާ ޢަޒުލްކުރަންޖެހޭވަރުގެ ކަމެއް އެއީ.

އެމްޑީޕީގެ ކުރީގެ ޗެއަރޕާސަން މޫސާ މަނިކު (ރީކޯ)

އިންތިހާބުތައް އެއްކޮށްލުމަށް ފެންނަ ނުފެންނަ ވޯޓެއް ނަގަން އުޅޭ އުޅުމަށް ފާޑުވިދާޅުވަމުން އޭނާ ވިދާޅުވީ، ގާނޫނުއަސާސީއަށް ބަދަލެއް ގެންނަން ބޭނުންވާ ނަމަ ހުރިހާ ސިޔާސީ ޕާޓީތަކަކާ އެކު ފާޅުކަން ބޮޑު ގޮތެއްގައި މަޝްވަރާ ކުރަންޖެހޭނެ ކަމަށެވެ. އަދި އެކަން ކުރަންވާނީ އެއްވެސް ކަމެއް ސިއްރު ނުކޮށް، ޒަމާނާ ހާލަތަށް ރިއާޔަތްކޮށްގެން ކަމަށް ވެސް ވިދާޅުވި އެވެ.

ރައްޔިތުންގެ ހާއްސަ މަޖިލީހުން ވެސް ކުރިން އިންތިހާބުތައް އެއްކޮށްލި ކަމަށް ބުނެ ދައްކާ ވާހަކަތަކަކީ ދޮގެއް ކަމަށް މޫސަ ވިދާޅުވި އެވެ. އޭނާ ވިދާޅުވީ 2005 ވަނަ އަހަރު އިންތިހާބުވި މަޖިލީހުގެ ދައުރު ހަމަވުމުން، އާ ގާނޫނުއަސާސީގެ ދަށުން ކަންކަން ތަރުތީބުކުރި އިރު ފުރަތަމަ ބޭއްވީ ރިޔާސީ އިންތިހާބު ކަމަށެވެ. އަދި އިންތިގާލީ މަރުހަލާގެ ތެރޭގައި ވެސް ވޯޓުތައް ތަރުތީބުކޮށްފައި ހުންނާނީ ވަކިވަކިން ކަމަށާއި، އޭރު ވެސް އިންތިހާބުތައް އެއްކޮށްލަން މަސައްކަތް ކޮށްފައި ނުވާނެ ކަމަށް އޭނާ ވިދާޅުވި އެވެ.

ޒުވާނުންގެ ތައުލީމީ ފެންވަރު މަތިވެ، ދުނިޔެއަށް އަންނަ ބަދަލުތަކާ އެކު ގާނޫނުއަސާސީއަށް ބަދަލުތަކެއް ގެންނަން ފެނޭތޯ ބެލުމަށް ރައްޔިތުންގެ ގާތަށް ދިއުމަކީ މައްސަލައެއް ނޫން ކަމަށް މޫސަ ވިދާޅުވި އެވެ. ނަމަވެސް މިހާރު މިއޮތް ރައްޔިތުންގެ މަޖިލީހާއި ރައީސް ޑރ. މުހައްމަދު މުއިއްޒަށް އެކަން އެނގިވަޑައިގަންނަވާނެ ކަމަށާއި، މިއީ އެފަދަ ބަދަލެއް ގެންނަންވީ ވަގުތު ނޫން ކަމަށް ވެސް މޫސަ ވިދާޅުވި އެވެ. އޭނާ ވިދާޅުވީ ކޮންމެ ފަސް އަހަރަކުން އެއްފަހަރު ރައްޔިތުންގެ ގާތަށް ވޯޓު ހޯދަން ދިއުމަކީ މެންބަރުން ކުރަންޖެހޭނެ ކަމެއް ކަމަށާއި، އެކަމުން ރެކުމަށް ދެ ވޯޓު އެއްކޮށްލުމަކީ ގަބޫލުކުރެވޭނެ ކަމެއް ނޫން ކަމަށެވެ.