ޝަރުއީ ދާއިރާއަށް އޮތް ނުފޫޒު ކުޑަ ކުރެވޭތޯ އެބަ ބަލަން: ރައީސް މުއިއްޒު

ދިވެހިރާއްޖޭގެ ޝައުރީ ދާއިރާއަކީ ނުފޫޒުން އެއްކިބާވެފައިވާ މިނިވަންތަނެއް ނޫން ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެ އެވެ. 

ޕީއެންސީން ބޭއްވި ސައިކަލު ބުރަށްފަހު ވާހަކަ ދައްކަވަމުން ރައީސް މުއިއްޒު ވިދާޅުވީ ބޮޑު ރީފޯމް ޕެކޭޖެއްގެ ތެރެއިން ގައުމަށް ބޮޑެތި އިސްލާހުތަކެއް ގެނައުމަށް މަސައްކަތް ކުރަމުންދާ ކަމަށެވެ.

އެގޮތުން ގައުމުގެ ހަމަޖެހުން ގާއިމްކޮށް، ސިޔާސީ ހަލަބޮލިކަން އެކީއެކައްޗަކަށް ނައްތާލުމަށް ރިޔާސީ އިންތިޚާބާއި މަޖިލިސް އިންތިޚާބު އެއްދުވަހެއްގައި ބާއްވަން ޖެހޭ ކަމަށެވެ. އަދި ރައްޔިތުންނަށް ބޭނުންވާ ކުރިއެރުމާއި، ހެވާއި ލާބަ ހޯދައިދިނުމުގައި، ރައްޔިތުން ބޭނުންވާ ގޮތަށް ކަންކަން ގެންދިޔުމުގައި މިއީ ކުރަން ޖެހޭ ކަމެއް ކަމަށް އެމަނިކުފާނު ވިދާޅުވި އެވެ. 

ޝަރުއީ ދާއިރާއަށް އިޝާރާތް ކުރައްވައި ރައީސް މުއިއްޒު ވިދާޅުވީ، ޝަރުއީ ދާއިރާއަކީ މިހާރަށްވުރެ ނުފޫޒު ފޯރުވުން ކުޑަކުރެވިފައި އޮތް މިނިވަން ނިޒާމަށް ހެދުމަށް ކުރަންޖެހޭ މަސައްކަތްތަކެއް އެބަހުރި ކަމަށެވެ. އަދި މިކަން ވެސް އެންމެ ފުރިހަމަ ގޮތުގައި ކުރެވޭނީ ދެ އިންތިޚާބު އެއް ދުވަހެއްގައި ބާއްވައި، ގެންނަން ބޭނުންވާ ބޮޑު ރީފޯމް ގެނެވިގެން ކަމަށް އެމަނިކުފާނު ވިދާޅުވި އެވެ. 

ޖުޑިޝަރީ ރިފޯމް ވެސް އެބައޮތް. ޖުޑިޝަރީގެ ތެރެއަށް ނުފޫޒު ފޯރުވުމަށްޓަކައި ޑިޒައިން ކުރެވިގެން ކުރިންސުރެ އޮތް ގޮތް ނިޒާމުގެ ތެރެއިން، ގާނޫނީ ނިޒާމުގެ ތެރެއިން ބަދަލު ގެނެސްފި. އެއީ ޖުޑިޝަރީއަކީ ވެސް މިހާރަށްވުރެ ނުފޫޒު ފޯރުވުން ކުޑަކުރެވިފައި އޮތް މިނިވަން ނިޒާމަށް ހެދުމަށްޓަކައި ވެސް ކުރަންހުރި ކަންކަން އޮތީ ހަމަ ކުރިއަށް ގެންދިއުމަށް އައުމުގެ ކުރިންވެސް ދެންނެވި ގޮތަށް. އެހެން ވީމާ ބޮޑު ރިފޯމް ޕެކޭޖެއްގެ ތެރެއިން، ގައުމަށް އިސްލާހު ގެނައުމަށްޓަކައި ކުރެވޭ ކަންކަމުގެ ތެރެއިން މި އޮތީ، ދެން އިންތިޚާބެއް އެއް ދުވަހެއްގެ ބޭއްވުމަށް ވެސް ރައްޔިތުންގެ ގާތުގައި އެހުމަށް ހުށަހެޅިފައި. މިއަދާ ހަމައަށް އައިސް ރިފޯމް އެތައް ކަމެއް މި އައީ ކުރަމުން. ނިޒާމުގެ ތެރެއިންވެސް. އަދި ތަރައްގީގެ ގޮތުން ކުރަންހުރި ކަންކަމުގައިވެސް، އިޖުތިމާއީ ގޮތަށް ހުރި މައްސަލަތައް ހަދަން ކަމުގައިވިޔަސް، މި ފަދަ އެތައް ކަމަކު.

ރައީސް ޑރ.މުހައްމަދު މުއިއްޒު 

މީގެ އިތުރުން ރައީސް މުއިއްޒު ވިދާޅުވީ ކުރިއަށް އޮތްތަނުގައި ގައުމަށް ހެޔޮ އިސްލާހީ ބަދަލުތައް ގެންނާނެ ކަމަށާއި، ރައްޔިތުންނަށް ހެވާއިލާބަ ލިބޭ ގޮތަށް ކަންކަން ބައްޓަން ކުރާނެ ކަމަށެވެ.

ރައީސް މުއިއްޒު މިމޭރުމުން ވާހަކަ ދެއްކެވި ނަމަވެސް ސަރުކާރާ ގުޅުންހުރި ގިނަ މައްސަލަތަައް ތަހުގީގު ކޮށްދިނުމަށް އެދި އެންޓި ކޮރަޕްޝަން ކޮމިޝަން އަދި ކޯޓަށް ހުށަހެޅި ނަމަވެސް ކުރިއަށް ނުގެންދެ އެވެ.