ކައުންސިލްތަކަށް ބާރު ދިނުމާއި މެދު ސަރުކާރުގެ ރާގު ބަދަލު ކުރަނީ ޕީއެންސީ އިން މަގުމައްޗަށް ނުކުތުމުން ރައްޔިތުން ތިބި ގޮތް އެ ޕާޓީ އަށް ވެސް އެނގޭތީ: ރައީސް ސޯލިހު
ވިލިމާލޭގައި ކުރިއަށްދިޔަ ކެމްޕެއިން ހަރަކާތެއްގައި ވާހަކަދައްކަވަމުން އެމަނިކުފާނު ވިދާޅުވީ، ސަރުކާރުގެ ސިޔާސަތުތަކަށް އާންމުންގެ ތާއީދެއް ނެތްކަން މިހާރު ވަރަށް ސާފުކޮށް ހާމަވަމުންދާ ކަމަށް. އެހެންކަމުން، ރައްޔިތުންނާ ގާތުން ތަރައްޤީގެ މަސައްކަތްތައް ކުރިއަށްގެންދެވޭނީ އެމްޑީޕީގެ ކެނޑިޑޭޓުން އިންތިޚާބުކޮށްގެން ކަމަށް އެމަނިކުފާނު ފާހަގަކުރެއްވި.
އެމްޑީޕީ އިން ކުރިއަށް ގެންދިޔަ އެމްޑީޕީ ދޮރުން ދޮރަށް ހަރަކާތުގެ ތެރެއިން. 14.03.2026 | އެމްޑީޕީ
ކައުންސިލްތަކަށް ބާރު ދިނުމާއި މެދު ސަރުކާރުގެ ރާގު ބަދަލު ކުރަނީ ޕީއެންސީ އިން މަގުމައްޗަށް ނުކުތުމުން ރައްޔިތުން ތިބި ގޮތް އެ ޕާޓީ އަށް ވެސް އެނގި ހާމަ ވަމުން ދާތީ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެ މަނިކުފާނު އެފަދައިން ވިދާޅުވީ އެމްޑީޕީ އިން ބޭއްވި ވިލިމާލޭގެ ދޮރުން ދޮރަށް ކެމްޕެއިން ހަރަކާތަށް ފަހު ރާއްޖެ އެމްވީ އަށް ދެއްވި ބަސްތީގަތުމެއްގަ އެވެ.
ރައީސް ޑރ.މުހައްމަދު މުއިއްޒުގެ ސަރުކާރުން ވަނީ އަތޮޅު ކައުންސިލްތައް އުވާލާ އެހެން ކައުންސިލްތަކުގެ ބާރު ކަނޑުވާލާފަ އެވެ. ނަމަވެސް ދާދި ފަހުން ރައީސް ވިދާޅުވީކައުންސިލްތަކުގެ ބާރު ކަނޑުވާލުމަކީ އެ މަނިކުފާނު ޤަބޫލުކުރައްވާ ކަމެއް ނޫން ކަމަށެވެ. ބޭނުންފުޅުވަނީ ކައުންސިލްތައް ބާރުވެރިކުރުވަން ކަމަށް ވެސް އެ މަނިކުފާނު ވިދާޅުވި އެވެ.
އެކަމާ ގުޅޭ ގޮތުން ވާހަކަދައްކަވަމުން، ސަރުކާރު ހިންގާ ޕްރޮގްރެސިވް ނޭޝަނަލް ކޮންގްރެސް، ޕީއެންސީ އިން ގޭގެ އަށް ގޮސް މަގުމައްޗަށް ނުކުތީމަ ރައްޔިތުންގެ ވިންދު ހުރި ގޮތް އެ ޕާޓީ އަށް ވެސް އެނގޭނެ ކަމަށާއި ރައްޔިތުންގެ ވިންދު ހުރީ ޕީއެންސީ އާއި އެކުގައި ނޫން ކަމަށް ރައީސް ސޯލިހު ވަނީ ވިދާޅުވެފަ އެވެ. ރައްޔިތުން ބޭނުން ވަނީ ރައްޔިތުންނާއި ގާތުން މަސައްކަތް ކުރާނެ ބަޔަކު ތިބުން ކަން މިހާރު ސަރުކާރަށް ވެސް ވަރަށް ސާފުކޮށް އެނގޭ ކަމަށް އެ މަނިކުފާނު ވިދާޅުވި އެވެ.
ކައުންސިލްތަކަށް ބާރު ދޭނެ ކަމަށް ބުނެ މިހާރު ވާހަކަދައްކަނީ ރައްޔިތުންގެ ވިންދު ހުރި ގޮތް އެނގޭތީ. އެކަމަކު ރައްޔިތުންނަށް ވެސް އެނގޭ މިއަދު އެ ހަދަނީ ދޮގުކަން.ކުރީގެ ރައީސް އިބްރާޙިމް މުހައްމަދު ސޯލިހު
ރައީސް ސޯލިހު އިތުރަށް ވިދާޅުވީ ވިލިމާލެ އިން ފެނުނީ ރައީސް މުއިއްޒުގެ ސިޔާސަތާއި އާއްމުން ދެކޮޅު މިންވަރު ކަމަށެވެ. އަދި މާލެގެ މޭޔަރ ކަމުގައި އާދަމް އާޒިމް ހުންނަވައިގެން ވިލިމާލެ އަށް ގެނެސްދެއްވާފައިވާ ބަދަލު އާއްމުން ބަލައިގަންނަ ކަމަށް ރައީސް ސޯލިހު ވިދާޅުވި އެވެ. އެ މަނިކުފާނު ވިދާޅުވީ މުޅި ވިލިމާލޭގެ ރޫހު އޮތީ އެމްޑީޕީ އާއި އެކުގައި ކަމަށެވެ. އަދި ވިލިމާލެ އާއި މުޅި މާލެ އަށް ބެލިއަަސް ތަރައްޤީ ގެނެވޭނެ ބަޔަކީ އެމްޑީޕީ ކަމަށާއި އެމްޑީޕީގެ ކެނޑިޑޭޓުންނަށް ކައުންސިލް އިންތިޚާބާއި ޑަބްލިއުޑީސީ އިންތިޚާބުގައި ވޯޓުދޭން ޖެހޭ ކަމަށް އެ މަނިކުފާނު ވަނީ ވިދާޅުވެފަ އެވެ.
