ވަޒީރު ޝިޔާމެވެ. އަނެއްކާވެސް ހަމަ އެ އިންތިޚާބީ ވައުދުފުޅު ހެއްޔެވެ؟

ވަޒީރު ޝިޔާމެވެ. ކޮންމެ އިންތިޚާބަކާ ދިމާކޮށް ކުޅުދުއްފުށީގެ ފަސްގަނޑު މައްޗަށް ތިޔަ ފައިބައިވަޑައިގަންނަވަނީ ކޮން އެއްޗެއް ވިއްކަވަންތޯއެވެ؟ ރައްޔިތުންގެ ކަރުގައި އަޅުވަނީ ކޮން އުންމީދެއްގެ ހާރެއްތޯއެވެ؟ މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރުގެ މަގާމުގައި ހުންނަވައިގެން، ކުޅުދުއްފުށީގެ މަސްވެރިންގެ ވިންދާ ކުޅުއްވުމަކީ މިއަދު އާދައިގެ ކަމަކަށް ވެއްޖެ ނޫންތޯއެވެ؟ އިއްޔެވެސް ތިޔަ ވަޑައިގަތީ ހަމަ އެއް ދަޅަކަށް ލާފައިވާ ބާގަނޑުތަކެއް ފަދަ ވަޢުދުތަކެއް ހިއްޕަވައިގެންނޫންތޯއެވެ؟

2024 ވަނަ އަހަރު ބޭއްވި މަޖިލިސް އިންތިޚާބާއި ދިމާކޮށް މަނިކުފާނު ކުޅުދުއްފުއްޓަށް ވަޑައިގެން، އުތުރުގެ މަސްވެރިންނަށް ޚާއްސަ އިސްކަމެއް ދެއްވާނެ ކަމަށް ވިދާޅުވީ ވަރަށް ބާރަށެވެ. ކުޅުދުއްފުށީގައި ޤާއިމުކުރާ އައިސް ޕްލާންޓްގެ މަސައްކަތް ހަލުވިކަމާއެކު ނިންމަވައިދެއްވާނެ ކަމަށް ވިދާޅުވެ، މަސްވެރިންގެ ވޯޓު ހޯއްދެވީ ހުސް އުންމީދުތަކެއް ދައްކަވައިގެންނެވެ.

ނަމަވެސް، ރައްޔިތުންގެ މަޖިލީހުގެ އިންތިޚާބު ނިމި، ސަރުކާރަށް ބާރު ލިބުނުތާ ދެ އަހަރު ވެގެންދާއިރު، އެ ބާރުމިނުގައި ކުރިއަށްދިޔަ މަސައްކަތެއް ފެންނާކަށް ނެތެވެ. މިއަދުވެސް މަނިކުފާނު އެ ވަޑައިގަތީ ހަމަ އެ އައިސް ޕްލާންޓްގެ ވައުދު ކޮނޑުޖައްސަވައިގެންނެވެ.

ކުޅުދުއްފުށި އަދި އުތުރުގެ ރައްޔިތުން މިއަދު ސުވާލު އުފައްދަނީ، ކުރީ ސަރުކާރުން އައިސް ޕްލާންޓް އެޅުމަށްޓަކައި ޖަހާފައިވާ އަށް ތަނބު ފިޔަވައި، މި ސަރުކާރުން އިތުރުކުރި އެއްޗަކީ ކޮބައިތޯއެވެ؟ ތަރައްޤީގެ ނަމުގައި ހަމައެކަނި ބިންގާ އެޅުމާއި، ކުރީގެ މަޝްރޫޢުތަކުގެ ފޮޓޯ ނެގުމަކީ މަސްވެރިންގެ ޖީބަށް ފައިސާ ވަންނާނެ ކަމެއް ނޫނެވެ. މަސްވެރިން ބާނާ މަހަށް ހަމަ އަގު ނުލިބި، ކިރުވާ މަހަށް ފައިސާ ނުލިބި، ދަރަނިވެފައި ތިބެންޖެހުމަކީ މަނިކުފާނުގެ ސިޔާސަތުގެ ފޭލުވުން ނޫންތޯއެވެ؟ ފައިސާގެ ދަހިވެތިކަމާއި ރިޝްވަތުގެ ނުފޫޒުން ރައްޔިތުންގެ ލޮލުގައި އަނދުން އެޅުވުމަކީ ޒަމާނީ ސިޔާސީ އުކުޅަކަށް ވިޔަސް، އެއީ އަދި އިޚްލާޞްތެރިކަމެއް ނޫނެވެ.

ވަޒީރު ޝިޔާމަކީ ވެރިކަން ކުރާ ޕީއެންސީގެ ކުޅުދުއްފުށީގެ އިސް ކެމްޕެއިން ލީޑަރެވެ. އިއްޔެ މަނިކުފާނު ގޭގެއަށް ޒިޔާރަތްކޮށް، "ދޮރުން ދޮރަށް" ހިންގަވައި، "ދޫންޏަށް" ވޯޓު ދިނުމަށް އެދިވަޑައިގަތްއިރު، ރައްޔިތުންނަށް ދައްކަވާނެ އައު އެއްވެސް ސިޔާސަތެއް ނެތެވެ. ތިބޭފުޅުންގެ ސިޔާސަތަށް ތާއީދުކޮށްގެން ކުޅުދުއްފުށީގެ ރައްޔިތުންނަށް ލިބުނު ހަގީގީ މަންފާއަކީ ކޮބައިތޯއެވެ؟ ކޮންމެ އިންތިޚާބަކާ ދިމާކޮށް ހިންގާ މިފަދަ ހަރަކާތްތަކަކީ ހަމައެކަނި ސިޔާސީ ބާރުވެރިކަން ދެމެހެއްޓުމަށް ކުރާ ކަމެއްކަން މިއަދު ރައްޔިތުންނަށް ސާފުވެއެވެ.

ނަމަވެސް, ކުޅުދުއްފުށީގެ މަސްވެރިންނަކީ މޮޔައިންނެއް ނޫނެވެ. ތަކުރާރުކޮށް އެއް ވައުދުތަކެއް ވިއްކައިގެން، އިތުރު ދެ އަހަރު ރައްޔިތުން ހަނާކުރުމަކީ ބަލައިގަނެވޭނެ ކަމެއް ނޫނެވެ. އަމަލީ މަސައްކަތެއް ނެތި، ހަމައެކަނި ދުލުން ބުނާ ބަސްތަކަކުން ތަރައްޤީއެއް ނާންނާނެއެވެ.

މިއަދު ރައްޔިތުން ބޭނުންވަނީ ކަރުދާހުގައި ހުރި ޕްލޭންތަކެއް ނޫނެވެ. ބޭނުންވަނީ އައިސް ޕްލާންޓުން ޚިދުމަތް ލިބޭނެ ދުވަހަކާއި، ބާނާ މަހަށް ހަމަ އަގު ލިބޭނެ ގޮތެކެވެ. މަނިކުފާނުގެ މި ދަތުރުފުޅަކީވެސް ހަމައެކަނި ވޯޓު ހޯދުމުގެ މަޤްޞަދުގައި ކުރެއްވި ދަތުރުފުޅެއް ނޫންކަން ސާބިތުކޮށްދެއްވުމަށް އަމަލީ ނަތީޖާއެއް ދައްކަވަންވީނޫންތޯއެވެ.