އީރާނުގެ އާ ލީޑަރަށް ވަނީ އަނިޔާވެ ޖިސްމާނީ ގެއްލުން ލިބިފައި: އެމެރިކާ

އީރާނުގެ އާ ރޫހާނީ ލީޑަރު މުޖުތަބާ ޚާމަނާއީއަށް އެކިވަރުގެ އަނިޔާތައް ލިބިވަޑައިގެން، އޭނާ އަށް ޖިސްމާނީ ގެއްލުންތައް ލިބިފައިވާ ކަމަށް ބެލެވޭ ކަމަށާއި، އެހެންކަމުން ގައުމު ހިންގުމުގެ ގާބިލުކަން އޭނާގެ ކިބައިގައި ހުރިތޯ ސުވާލު އުފެދޭ ކަމަށް އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ހުކުރު ދުވަހު ވިދާޅުވެއްޖެއެވެ. ހެގްސެތު މިހެން ވިދާޅުވީ އެމެރިކާ އާއި އިޒްރޭލުން އީރާނަށް ހަމަލާދޭތާ ގާތްގަނޑަކަށް ދެ ހަފުތާ ވެފައިވަނިކޮށެވެ.

މި ހަނގުރާމަ ފެށުނުތަނާހެން އިޒްރޭލުން ދިން ހަމަލާއެއްގައި މުޖުތަބާ ޚާމަނާއީގެ ބައްޕާފުޅު އަދި ކުރީގެ ރޫހާނީ ލީޑަރާއި އަނބިކަނބަލުން ހިމެނޭހެން އާއިލާގެ ގިނަ ބަޔަކު އަވަހާރަވި ފަހުން، އޭނާގެ އެއްވެސް ފޮޓޯއެއް ނުވަތަ ވީޑިއޯއެއް އާންމުކޮށްފައެއް ނުވެއެވެ.

މުޖުތަބާ ޚާމަނާއީގެ ފުރަތަމަ ބަޔާން ބުރާސްފަތި ދުވަހު އިއްވާފައިވަނީ ޓީވީ ޕްރެޒެންޓަރެކެވެ. އެ ބަޔާނުގައި އޭނާ ވަނީ ހޯރްމޫޒް ކަނޑުއޮޅި ބަންދުކޮށްފައި ބޭއްވުމަށް ވައުދުވެ، އަވަށްޓެރި ގައުމުތަކުގައި ހުރި އެމެރިކާގެ އަސްކަރީ މަރުކަޒުތައް ބަންދުކުރުމަށް ގޮވާލާފައެވެ. އަދި އެކަން އެގޮތަށް ނުކޮށްފިނަމަ އެ ގައުމުތަކަށް އީރާނުން ހަމަލާދޭނެ ކަމުގެ އިންޒާރުވެސް ވަނީ ދީފައެވެ.

ބްރީފިންއެއްގައި ވާހަކަދައްކަވަމުން ހެގްސެތު ވިދާޅުވީ، އީރާނުގެ އާ ރޫހާނީ ލީޑަރަށް އަނިޔާވެ، އޭނާގެ ސޫރަ ބަދަލުވެފައިވާކަން އެނގޭ ކަމަށެވެ. އަދި އިއްޔެ އޭނާ ނެރުނު ބަޔާނަކީ ވަރަށް ބަލިކަށި ބަޔާނެއް ކަމަށާއި، އެއީ އެއްވެސް އަޑެއް ނުވަތަ ވީޑިއޯއެއް ނެތް ހަމައެކަނި ލިޔުމުން އޮތް ބަޔާނެއްކަން ހެގްސެތު ފާހަގަކުރެއްވިއެވެ.

"އީރާނުގައި ކެމެރާ އާއި އަޑު ރެކޯޑްކުރާނެ ސާމާނު ބައިވަރު އެބަހުރި. އެކަމަކު ހަމައެކަނި ލިޔުމުން ބަޔާން ނެރުނީ ކީއްވެ؟ އަހަރެން ހީކުރަނީ އޭގެ ސަބަބު އެންމެންނަށް އެނގޭނެ ކަމަށް. އޭނާގެ ބައްޕަ ވަނީ މަރުވެފައި. އޭނާ ހުރީ ބިރުން، އަނިޔާވެފައި، ފިލައިގެން އުޅޭ ހާލަތެއްގައި. އަދި އޭނާގެ ކިބައިގައި ވެރިކަން ކުރުމުގެ ގާނޫނީ ހައިސިއްޔަތެއް ނެތް،" ހެގްސެތު ވިދާޅުވިއެވެ.

އީރާނުގެ އޮފިޝަލަކު ބުދަ ދުވަހު ރޮއިޓާސްއަށް ބުނެފައިވަނީ އަލަށް އައްޔަންކުރި ރޫހާނީ ލީޑަރަށް ލިބިފައިވަނީ ކުދި އަނިޔާތަކެއް ކަމަށާއި، އޭނާގެ މަސައްކަތްތައް ކުރިއަށްދާ ކަމަށެވެ.

ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޑޭން ކޭންއާއެކު ބޭއްވި މި ބްރީފިންގައި، އީރާނުގެ މިސައިލާއި ޑްރޯން ގާބިލުކަމުގެ އިތުރުން އެ ގައުމުގެ ކަނޑުގެ ސިފައިންގެ ބާރު ކަނޑުވާލުމަށް އެމެރިކާއިން ދެމުންދާ ހަމަލާތަކުގެ ވާހަކަ ދެއްކެވިއެވެ.

'އެއްވެސް އޯގާތެރިކަމެއް ނޯންނާނެ'

މި ބްރީފިންގައި ހެގްސެތު ވިދާޅުވީ މި ހަނގުރާމައިގައި އެމެރިކާއިން އެއްވެސް ރަހުމެއް ނުބަހައްޓާނެ ކަމަށެވެ.

"އަހަރެމެން ދާނީ ކުރިއަށް، ހުއްޓުމެއް ނެތި ފިއްތުންތައް ކުރިމަތިކުރަމުން. ދުޝްމަނުންނަށް އެއްވެސް ދުލެއް، އެއްވެސް އޯގާތެރިކަމެއް ނޯންނާނެ،" ހެގްސެތު ވިދާޅުވިއެވެ.

ހެގްސެތު މިހެން ވިދާޅުވި އިރު އަމާންދޭން ބޭނުންވާ މީހާގެ ފުރާނަ ސަލާމަތްކޮށްދިނުމަށް އިންކާރުކުރުމަކީ ބައިނަލްއަގުވާމީ ގާނޫނުތަކުން މަނާކޮށްފައިވާ ކަމެކެވެ.

އިންޓަނޭޝަނަލް ކޮމިޓީ އޮފް ދަ ރެޑް ކްރޮސް (އައި.ސީ.އާރު.ސީ) އިން ބުނާ ގޮތުގައި، ހަނގުރާމައިގައި އެއްވެސް މީހަކު ދިރިހުރިޔަ ނުދިނުމަށް އަމުރުކުރުމާއި، އެފަދަ އިންޒާރު ދިނުމާއި، ނުވަތަ އެ އުސޫލުން ހަނގުރާމަ ކުރިއަށް ގެންދިއުމަކީ ބައިނަލްއަގުވާމީ އިންސާނީ ގާނޫނުތަކާ ހިލާފު ކަމެކެވެ.

ވޭތުވެދިޔަ 14 ދުވަހުގެ ތެރޭގައި އެމެރިކާއިން ވަނީ އީރާނުގެ 6،000 އަށްވުރެ ގިނަ އަމާޒުތަކަށް ހަމަލާދީފައެވެ. އެމެރިކާ އާއި އިޒްރޭލުން ދެ ހަފުތާ ވަންދެން ދިން ބޮމުގެ ހަމަލާތަކުގައި އީރާނުން ގާތްގަނޑަކަށް 2،000 މީހުން ވަނީ މަރުވެފައެވެ.

ނަމަވެސް އެމެރިކާގެ ހަމަލާތަކާއެކު ވެސް، ކުވެއިތު، އިރާގު، ޔޫއޭއީ، ބަހްރޭން އަދި އޮމާންގެ ވައިގެ ސަރަހައްދަށް އީރާނުގެ ޑްރޯން ހަމަލާތައް ދަނީ ދެމުންނެވެ.

މީގެ އިތުރުން، ހުކުރު ދުވަހު އިރާގުގެ ހުޅަނގު ސަރަހައްދުގައި އެމެރިކާގެ އަސްކަރީ ތެޔޮ އަޅާ ބޯޓެއް ވެއްޓި އެމެރިކާގެ ސިފައިންގެ ހަތަރު މީހަކު ވަނީ މަރުވެފައެވެ. ނަމަވެސް މިއީ ދުޝްމަނުންގެ ހަމަލާއަކުން ހިނގި ކަމެއް ނޫން ކަމަށް އެމެރިކާއިން ބުނެއެވެ.

ފެބްރުއަރީ 28 ވަނަ ދުވަހުން ފެށިގެން އެމެރިކާ އާއި އިޒްރޭލުން އީރާނަށް ހަމަލާދޭން ފެށި ފަހުން، އެމެރިކާ ސިފައިންގެ 11 މީހަކު ވަނީ މަރުވެފައެވެ.