އެމެރިކާާގެ ތެޔޮ އިންފްރާސްޓްރަކްޗާތައް ހަލާކު ކޮށްލައި، އަޅި އަށް ހަދާލާނެ ކަމުގެ އިންޒާރު އީރާން އިން ދީފި

އީރާންގެ ތެޔޮ އެކްސްޕޯޓު ކުރާ މައި މަރުކަޒު ކަމަށްވާ ޚާރްގް އައިލެންޑަށް އެމެރިކާ އިން ހަމަލާ ދީފައިވާ ކަމަށް އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވުވުމާ ގުޅިގެން، އެމެރިކާއާ ގުޅުން ހުރި ތެޔޮ އިންފްރާސްޓްރަކްޗާތައް ހަލާކު ކޮށްލާނެ ކަމުގެ އިންޒާރު އީރާން އަސްކަރިއްޔާ އިން ދީފި އެވެ.

އީރާންގެ އަސްކަރިއްޔާ އިން މި އިންޒާރު ދީފައި ވަނީ ހޮނިހިރު ދުވަހު އެވެ. އީރާންގެ މީޑިއާ ތަކުން ރިޕޯޓު ކޮށްފައިވާ ގޮތުގައި އެ ޤައުމުގެ އަސްކަރިއްޔާ އަލް އަންބިޔާ ސެންޓްރަލް ހެޑްކުއާޓާސް އިން ނެރުނު ބަޔާނެއްގައި ބުނެފައި ވަނީ، އީރާންގެ ހަކަތައާ ބެހޭ ވަސީލަތް ތަކަށް ހަަމަލާއެއް ދީފި ނަމަ، އެމެރިކާއާ އެކު މަސަައްކަތް ކުރާ ކުންފުނި ތަކުގެ ތެޔި އަދި ހަކަތައިގެ އިންފްރާސްޓްރަކްޗާތައް ވަގުތުން ހަލާކުކޮށް، އަޅި އަށް ހަދާލާނެ ކަމަށެވެ. 

އީރާންގެ ފާސް ނިއުސް އެޖެންސީ އާއި ތަސްނީމް ނިއު އެޖެންސީ އިން ރިޕޯޓު ކުރި މި އިންޒާރަކީ އެމެެރިކާގެ ރައީސް ޓްރަމްޕް ދެއްކެވި ވާހަކަ އަށް ރައްދު ދިނުމުގެ ގޮތުން ދީފައިވާ އިންޒާރެކެވެ. 

މީގެ ކުރިން ޓްރަމްޕްގެ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައި ވަނީ، އެމެރިކާގެ ހަމަލާ ތަކުގައި ޚާރްގް އައިލެންޑުގައި ހުރި އަސްކަރީ އަމާޒުތައް މުޅިން ސުންނާފަތި ކޮށްލާފައިވާ ކަމަށެވެ. މީގެ އިތުރުން ޓްރަމްޕް ވަނީ، ދުނިޔޭގެ ސާފު ނުކުރާ ތެލާއި، ގުދުރަތީ ގޭހުގެ ފަސްބައި ކުޅަ އެއް ބައި އުފުލާ ސްޓްރެޓީޖިޖް ހޮރުމޯޒް ކަނޑު އޮޅިން ދަތުރު ކުރާ އުޅަނދު ފަހަރަށް އީރާން އިން ހުރަސް އަޅާ ނަމަ، އެ ޤައުމުގެ ތެލުގެ ވަސީލަތް ތަކަށް ހަމަލާ ދޭނެ ކަމުގެ އިންޒާރު ދެއްވައިފަ އެވެ. 

އީރާންގެ މައި ބިމާ ގާތް ގަނޑަކަށް 30 ކިލޯ މީޓަރު، ނުވަތަ 19 މޭލު ބޭރުގައި އޮަންނަ ޚާރްގް އައިލެންޑަކީ އެ ޤައުމުގެ އިޤްތިޞާށް ނުހަނު މުހިންމު ތަނެކެވެ. ޖޭޕީ މޯގަންގެ ތަފާސް ހިސާބަކުން ދައްކާ ގޮތުގައި އީރާން އިން ބޭރު ކުރާ ސާފު ނުކުރާ ތެލުގެ ގާތް ގަނޑަކަށް 90 އިންސައްތަ އެކްސްޕޯޓު ކުރަނީ އެ ރަށުގެ ތެޔޮ ޓާމިނަލްތައް މަދުވެރިކޮށެވެ. 

މި ހަމަ ނުޖެހުންތަކާ ގުޅިގެން ދުނިޔޭޭގޭ ބާޒާރު ތަކަށް ބޮޑު ލޮޅުމެއް އަރާފައިވާއިރު، ތެލުގެ އަގުތައް ވަނީ ވަރަށް ބޮޑަށް އުފުލިފަ އެވެ. އީރާން އިން ދެމުންދާ ހަމަލާ ތަކުގެ ސަބަބުން ހޮރުމޯޒް ކަނޑު އޮޅީގެ ކަނޑު ދަތުރު ފަތުރުތައް ގާތް ގަނޑަކަށް ހުއްޓުމަކަށް އައިސްފައިވާއިރު، މީގެ ސަބަބުން ހަކަތަ ލިބުން ދަތިވެ، ދުނިޔޭގެ އިންފްލޭޝަން މަތި ވެދާނެތީ އިންވެސްޓަރުންނާއި ދުނިޔޭގެ ސަރުކާރު ތަކުން ދަނީ ކަންބޮޑުވުން ފާޅު ކުރަމުންނެވެ.