މޫނުގެ ސިފަ ގެއްލި ކާކުކަން ނޭނގޭ ވަރަށް، އީރާންގެ އައު ރޫހީ ލީޑަރު މުޖުތަބާ ޚާމަނާއީ ޒަޚަމުވެފައިވާ ކަމަށް ހެގްސެތު ވިދާޅުވެއްޖެ

އީރާާންގެ އައު ރޫހީ ލީޑަރު މުޖުތަބާ ޚާމަނާއީ ޒަަޚަމުވެފައިވާ ކަމަށް، އެމެރިކާގެ ދިފާއީ ވަޒީރު ޕީޓް ހެގްސެތު ވިދާޅުވެއްޖެ އެވެ. 

ހުކުރު ދުވަހު އެމެރިކާގެ ޕެންޓަގަންގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ހެގްސެތު ވިދާޅުވީ، އީރާންގެ އައު ރޫހީ ލީޑަރު މުޖުތަބާ ޚާމަނާއީ ޒަޚަމުވެފައިވާ ކަމަށެވެ. އަދި ކާކުކަަން ނޭނގޭ ވަރަށް، މުޖުތަބާ ޚާމަނާއީގެ މޫނުގެ ސިފަ ގެއްލިފައިވާ ކަމަށް ވެސް ހެގްސެތު ވަނީ ވިދާޅުވެފަ އެވެ. 

މީގެ އިތުރުން ހެގްސެތު ވިދާޅުވީ މިދިޔަ ބުރާސްފަތި ދުވަހު މުޖުތަބާ ޚާމަނާއީ ނެރުއްވާފައިވާ ބަޔާނަކީ ވަރަށް ބަލިކަށި ބަޔާނެއް ކަމަށެވެ. އެ ބަޔާނުގައި މުޖުތަބާ ޚާމަނާއީގެ އަޑު ނުވަތަ ވީޑއޯ ވެސް ނެތް ކަމަށާއި، އެއީ ލިޔެފައިވާ ބަޔާނެއް ކަމަށް ހެގްސެތު ވިދާޅުވި އެވެ. މުޖުތަބާ ޚާމަނާއީގެ މޫނު ވަކި ނުވާ ވަރަށް ޒަޚަމުވެފައިވާ ކަމަށް ހެގްސެތު ވިދާޅުވި ނަމަވެސް، އެކަމުގެ އެއްވެސް ހެއްކެއް އޭނާ ދައްކާފައި ނުވެ އެވެ.

އަނެއްކޮޅުން އައު ރޫހީ ލީޑަރުގެ ޞިއްޙީ ޙާލު ކޮޅާ ގުޅޭ ގޮތުން އީރާންގެ އިސްވެރިން ވެސް ވަކި އެއްޗެއް ބުނެފައި ނުވެ އެވެ. ބައެއް ރިޕޯޓު ތަކުގައި ބުނެފައި ވަނީ، އެމެރިކާ އާއި އިޒްރޭލް ދިން ހަމަލާ ތަކެއްގައި އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަ ވެފައިވާއިރު، އެ ހަމަލާގައި މުޖުތަބާ ޚާމަނާއީ އަށް ވެސް ވަނީ އަނިޔާވެފަ އެވެ. އޭގެ ފަހުން އެމެރިކާގެ ދިފާއީ ވަޒީރު ހެގްސެތު މި ވާހަކަ ދެއްކެވިއިރު، އެ ވާހަކަތަކާ ގުޅިގެން ވެސް އީރާން އިން ވަކި އެއްޗެއް ބުނެފައި ނުވެ އެވެ. 

އެމެރިކާާ އާއި އިޒްރޭލްގެ ހަމަލާ ތަކުގައި މުޖުތަބާ ޚާމަނާއީގެ ބައްޕާފުޅު، އާޔަތުﷲ ޢަލީ ޚާމަނާއީ އަވަހާރަވި ފަހުން، އީރާންގެ ރޫހީ ލީޑަރަކަށް އައްޔަން ކުރެއްވީ މުޖުތަބާ ޚާމަނާއީ އެވެ. އޭގެ ފަހުން އައު ރޫހީ ލީޑަރު ނެރުއްވި ފުރަތަމަ ބަޔާނުގައި ވެސް ވަނީ، އެމެރިކާާ އާއި އިޒްރޭލްއާ ދެކޮޅަށް ވަރުގަދަ އިންޒާރެއް ދެއްވައިފަ އެވެ. އެގޮތުން ސަރަހައްދުގައި ހުރި އެމެރިކާގެ ބޭސްތައް ބަންދު ކުރުމަށް ގޮވާލައި، ހޮރުމޯޒް ކަނޑު އޮޅި ބަންދު ކޮށްފައި އޮތް އޮތުން ދަމަހައްޓާނެ ކަމަށް ވެސް ވިދާޅުވެފައިވެ އެވެ. 

އީރާންގެ އައު ރޫހީ ލީޑަރަކަށް މުޖުތަބާ ޚާމަނާއީ އައްޔަން ކުރުމާ އެކު، އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ އެކަމާ ނުރުހުންވެފަ އެވެ. އެގޮތުން ޓްރަމްޕް ވިދާޅުވީ އީރާންގެ ނިންމުމާ މެދު އޭނާ ހިތްހަމަ ނުޖެހޭ ކަމަށާއި، މުޖުތަބާ ޚާމަނާއީ އަކީ މާޔޫސް ކަމެއް ކަމަށެވެ. އަދި އައު ރޫހީ ލީޑަރު ވެސް އެމެރިކާގެ އަމާޒަކަށް ވެދާނެ ކަަމަށް ޓްރަމްޕް ވިދާޅުވެފައިވެ އެވެ.