މިސަރުކާރުން ދަނީ ރިފަރަންޑަމް ވޯޓު ކާމިޔާބު ކުރުމަށް މަރުފަލި ޖަހަމުން: ރާއީ
ރާއީ ވިދާޅުވީ ލޯކަލް ކައުންސިލް އިންތިޚާބާއެކު ނަގާ ރިފަރަންޑަމް ވޯޓު ކާމިޔާބު ކުރުމަށް ސަރުކާރުން ނުފޫޒު ގަދަ މަހުޖަނުންގެ އެހީތެރިކަން ހޯދަމުންދާ ކަމަށް. އެގޮތުން ޖުމްހޫރީ ޕާޓީގެ ލީޑަރު ގާސިމް އިބްރާހިމް ސަރުކާރަށް ތާއީދު ކުރައްވަނީ މާލީ މަންފާތަކެއްގެ ބަދަލުގައި ކަމަށް ބެލެވޭތީ، އެ މައްސަލަ އޭސީސީން ބެލުމަށް ރާއީ ގޮވާލެއްވި. އަދި ސަރުކާރުން މިކަން ސިއްރުން ކުރަން އުޅުނު ނަމަވެސް، އެމްޑީޕީގެ "ނޫނެކޭ" ކެންޕޭނާއެކު ރިފަރަންޑަމް ވޯޓު ނާކާމިޔާބު ވާނެ ކަމަށް އޭނާ ވިދާޅުވި.
ހުކުރު ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ ވާހަކަ ދައްކަވަނީ. | ރާއްޖެއެމްވީ
ރައީސް ޑރ.މުހައްމަދު މުއިއްޒުގެ ސަރުކާރުން ރިފަރަންޑަމް ވޯޓު ކާމިޔާބު ކުރުމަށް މަރުފަލި ޖަހަމުންދާ ކަމަށް މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ ވިދާޅުވެއްޖެ އެވެ.
ހުކުރު ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ރާއީ ވިދާޅުވީ މިސަރުކާރުން ލޯކަލް ކައުންސިލް އިންތިޚާބާއެކު މި ނަގާ ރިފަރަންޑަމް ވޯޓު ކާމިޔާބު ކުރުމަށް މަރުފަލި ޖަހަމުންދާ ކަމަށާއި، ހުރިހާ ބާރެއް ބޭނުން ކުރަމުންދާ ކަމަށެވެ.
އެގޮތުން ބާވެފައިހުރި ހަތިޔާރުތައް ނެރޭ ކަމަށާއި، ސަރުކާރަށް ބައިތުހިފައިގެން ތިއްބެވި ބޮޑެތި މަހުޖަނުން ނެރެ ރިފަރަންޑަމް ވޯޓު ކާމިޔާބު ކުރުމަށް ވާހަކަތައް ދައްކަމުންދާ ކަމަށް އޭނާ ވިދާޅުވި އެވެ. ޖުމްހޫރީ ޕާޓީގެ ލީޑަރު ގާސިމް އިބްރާހީމްއަށް އިޝާރާތް ކުރައްވައި ރާއީ ވިދާޅުވީ އެއްވެސް ކަމެއް އެމަނިކުފާނު ހިލޭ ނުކުރައްވާނެ ކަމަށާއި، އެންޓި ކޮރަޕްޝަން ކޮމިޝަން (އޭސީސީ)އިން ވިލާ ކުންފުންޏަށް ވަދެ މި މައްސަލަ ބަލަން ޖެހޭ ކަަމަށެވެ.
ގާސިމް އިބްރާހީމްގެ ކައުންސިލުގައި އެ ޖުމްހޫރީ ޕާޓީގެ ކައުންސިލުގައި ހިމެނޭ މެންބަރުން، އެ މީހުން އެބަ މިއަށް ހަމަ ހެސްކިޔާފައި ދެކޮޅުހަދާ. ދެން އެމްޑީއޭއިން އެމް.ޕީ އައްބާސް ހަމަ ހެސްކިޔާފައި ދެކޮޅު މިއަށް އެބަ ހަދާ ކޮންމެ ދުވަހަކު ޓްވީޓެއް އެބަ ކުރައްވާ. ރޭގައި ވެސް އެބައޮތް ބަޔާނެއް ނެރެފަ. ދެން އަޅުގަނޑު ގަބޫލެއް ނުކުރަން އިނގޭތޯ ގާސިމް އިބްރާހީމް. ޚާއްސަކޮށް ގާސިމް އިބްރާހީމް މިކަހަލަ ދަނޑިވަޅެއްގައި ސަރުކާރަށް ބައިތުހިފާނެ ކަމެއް ހިލޭއެއް. އަށާރަ މިލިއަން ޑޮލަރަށް މަސްއައްޓެއް ވިއްކައިލާފައި އެހެރީ. މި ސަރުކާރުން ރައްޔިތުންގެ ފައިސާ ހޯދަންވެގެން. އެހެންވީމާ، މި ވަގުތަކީ އަޅުގަނޑު ހަމަ އެދެން އޭސީސީގައި ގާސިމް އޮފީހަށް ވިލާ ކުންފުންޏަށް ވަންނަން އެބަޖެހޭ. އެ މަނިކުފާނު ނުކުރައްވާނެ ހިލޭއެއް.މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ
ރިފަރަންޑަމް ވޯޓުގެ ހުރިހާ ކަމެއް ކުރިއަށް ގެންދިއުމަށް މިސަރުކާރުން މަސައްކަތް ކުރީ ވަރަށް ސިއްރުންކަން ފާހަގަކުރައްވައި ރާއީ ވިދާޅުވީ އެކަން ފެއިލްވެގެން ދިޔައީ އެމްޑީޕީން ކުރަމުންދިޔަ މަސައްކަތުން ކަމަށާއި، ނޫނެކޭ ކެންޕޭން މުޅި ރާއްޖެއަށް ފުޅާވެފައިވާ ކަމަށެވެ.
ރާއީ ވިދާޅުވީ މި ރަމާޟާން މަަސް ނިމުމާއެކު، އިންތިޚާބަށް ލިބޭ މަދު ދުވަސްކޮޅުގެ ތެރޭގައި އިތުރަށް ކެންޕޭން ފުޅާ ކުރާނެ ކަމަށާއި، ވާނުވާ ރައްޔިތުންނަށް މިހާރަށް ވުރެ ބޮޑަށް ސާފު ކޮށްދޭނެ ކަމަށެވެ. އަދި މިހާރު ވެސް ދިވެހި ރައްޔިތުންނަކީ ހޭލުންތެރި ބައެއް ކަމަށާއި، މިސަރުކާރަށް މި ރިފަރަންޑަމް ވޯޓު ކާމިޔާބު ނުކުރެވޭނެ ކަމަށް އޭނާ ވިދާޅުވި އެވެ.
