އަންނަ ހަފުތާގެ ތެރޭގައި އީރާން އަށް ވަރުގަދަ ހަމަލާ ތަކެއް ދޭނަން: ޓްރަމްޕް

ކުރިއަށް އޮތް ހަފުތާގެ ތެރޭގައި އެމެރިކާގެ ސިފައިން އީރާންގެ އަމާޒު ތަކަށް ވަރުގަދަ ހަމަލާ ތަކެއް ދޭނެ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމަ އަށް ދެ ހަފުތާވެ، ތިން ވަނަ ހަފުތާ އަކަށް ފެށިފައިވާއިރު ހުކުރު ދުވަހު ޓްރަމްޕް ވަނީ އީރާންއާ ދެކޮޅަށް އަސްކަރީ ފިޔަވަޅުތައް ވަރުގަދަ ކުރައްވާނެ ކަމުގެ އިންޒާރު ދެއްވައިފަ އެވެ. 

ފޮކްސް ނިއުސް ރޭޑިއޯ އަށް ދެއްވި ބަސްދީ ގަތުމެއްގައި ޓްރަމްޕް ވިދާޅުވީ، ކުރިއަށް އޮތް ހަފުތާގެ ތެރޭގައި އީރާން އަށް ވަރުގަދަ ހަމަލާ ތަކެއް ދޭނެ ކަމަށެވެ. އެމެރިކާ އާއި އިޒްރޭލުން ދެމުން ގެންދާ އަސްކަރީ ހަމަލާތަކާ ގުޅިގެން، އީރާންގެ ރައްޔިތުން އެ ޤައުމުގެ ސަރުކާރާ ދެކޮޅަށް ތެދުވެ، ވެރިކަން ބަދަލު ކުރާނެ ކަމުގެ ފުރިހަމަ އިތުބާރު އެބަ އޮތް ކަމަށް ވެސް ޓްރަމްޕް ވިދާޅުވި އެވެ. 

އީރާންގެ ވެރިކަން ބަދަލުކޮށް، އެމެރިކާ އިން ބޭނުންވާ ބަޔަކު އީރާންގެ ވެރިކަމަށް އައުމަކީ އަބަދު ވެސް ޓްރަމްޕް ބޭނުންފުޅުވާ ގޮތެވެ. ނަމަވެސް، ހަތިޔާރެއް ނެތް ބަޔަކަށް އެއީ ކުރަން އުނދަގޫ ކަމަކަށް ވާނެތީ، އެ ބަދަލު ވަގުތުން ނުފެނިދާނެ ކަމަށް ޓްރަމްޕް ފާހަގަ ކުރެއްވި އެވެ. ޓްރަމްޕްގެ އިތުރުން، އީރާންގެ ވެރިކަން ބަދަލު ކުރުމަކީ އިޒްރޭލް އިން ވެސް ވަރަށް ބޮޑަށް ބޭނުންވާ ކަމެކެވެ. 

މީގެ ކުރިން ވެސް ޓްރަމްޕް ވަނީ އީރާން އަށް އައު ހަމަލާ ތަކެއް ދޭނެ ކަމުގެ އިންޒާރު ދެއްވައިފަ އެވެ. އެމެރިކާ އާއި އިޒްރޭލްއާ ދެކޮޅަށް އީރާން އިން ވެސް ވަރުގަދަ ހަމަލާ ތަކެއް ދެމުން އަންނައިރު، އެމެރިކާ އާއި އިޒްރޭލަށް ވެސް އެ ހަމަލާ ތަކުގެ ސަބަބުން ގިނަ ބޮޑު ގެއްލުން ތަކެއް ލިބެމުން އަންނަކަން ފާހަގަ ކުރެވެ އެވެ.