އީރާނުގެ ތެޔޮ އެކްސްޕޯޓު ކުރާ މައިމަރުކަޒު ހުންނަ ޚާރްގް ޖަޒީރާ އަށް ވަރުގަދަ ބޮމުގެ ހަމަލާތަކެއް ދީފި ކަމަށް ޓްރަމްޕް ވިދާޅުވެއްޖެ

އީރާނުގެ ތެޔޮ އެކްސްޕޯޓްކުރާ މައި މަރުކަޒު ކަމަށްވާ ޚާރްގް ޖަޒީރާ ގައި ހުރި އަސްކަރީ އަމާޒުތަކަށް އެމެރިކާއިން ވަރުގަދަ ބޮމުގެ ހަމަލާތަކެއް ދީފައިވާ ކަމަށާއި، ވަރަށް އަވަހަށް ހޮރްމޫޒް ކަނޑުއޮޅިން ދަތުރުކުރާ ތެޔޮ ޓޭންކަރުތަކަށް އެމެރިކާގެ ކަނޑުގެ ސިފައިން ހިމާޔަތް ދޭން ފަށާނެ ކަމަށް ރައީސް ޑޮނަލްޑް ޓްރަމްޕް ހުކުރު ދުވަހު ވިދާޅުވެއްޖެއެވެ.

ޓްރޫތް ސޯޝަލްގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، އީރާނުން ބޭރުކުރާ ސާފުނުކުރާ ތެޔޮ ގާތްގަނޑަކަށް އެއްކޮށްހެން ބޭރުކުރާ ޚާރްގް ޖަޒީރާ ގައި ހުރި އަސްކަރީ އަމާޒުތައް، "މެދުއިރުމަތީގެ ތާރީޚުގައި ދެވުނު އެންމެ ވަރުގަދަ ބޮމުގެ ހަމަލާތަކުގެ ތެރެއިން ހަމަލާއެއްގައި" މުޅިން ސުންނާފަތިކޮށްލާފައިވާ ކަމަށެވެ.

އެ ރަށުގައި ހުރި ތެޔޮ އުފައްދާ ވަސީލަތްތަކަށް މިވަގުތަށް ހަމަލާނުދިނުމަށް ނިންމަވާފައިވާ ކަމަށްވެސް ޓްރަމްޕް ވިދާޅުވިއެވެ.

އެމެރިކާގެ ރައީސް ވިދާޅުވީ، ހޮރްމޫޒް ކަނޑުއޮޅިން އުޅަނދުފަހަރު މިނިވަންކަމާއެކު ރައްކާތެރިކަމާއެކު ދަތުރުކުރުމަށް ހުރަސްއެޅުމަށް އީރާނުން ނުވަތަ އެހެން ފަރާތަކުންވެސް އެއްވެސް ކަމެއް ކޮށްފިނަމަ، ތެލުގެ ވަސީލަތްތަކަށް ހަމަލާނުދިނުމަށް ނިންމި ނިންމުން ވަގުތުން މުރާޖައާ ކުރައްވާނެ ކަމަށެވެ.

ދުނިޔޭގެ ބާޒާރުގައި ތެލުގެ އަގު އުފުލެމުންދާތީ، ގަލްފުގެ މުހިންމު ސަރަހައްދެއް ކަމަށްވާ ހޮރްމޫޒް ކަނޑުއޮޅިން ދަތުރުކުރާ ޓޭންކަރުތަކަށް އެމެރިކާގެ ކަނޑުގެ ސިފައިން ހިމާޔަތް ދޭން ފަށާނީ ކޮން އިރަކުންތޯ ސުވާލުކުރުމުން ޓްރަމްޕް ވިދާޅުވީ، "އެކަން ވަރަށް އަވަހަށް، ވަރަށް އަވަހަށް ފެށޭނެ" ކަމަށެވެ.

ދުނިޔޭގައި ބޭނުންކުރާ ސާފުނުކުރާ ތެލާއި ގޭހުގެ ފަސްބައިކުޅަ އެއްބައި އާންމުކޮށް ދަތުރުކުރާ ހޮރްމޫޒް ކަނޑުއޮޅީގެ ކަނޑުގެ ދަތުރުފަތުރުތައް، އީރާނުން ދެމުންދާ ހަމަލާތަކާ ގުޅިގެން މިހާރު ވަނީ ގާތްގަނޑަކަށް މުޅިން ހުއްޓިފައެވެ.