އީރާނާ ދެކޮޅަށްދޭ ހަމަލާތައް ވަރުގަދަ ކުރުމަށް މެދުއިރުމައްޗަށް އެމެރިކާގެ މެރިން ފައުޖެއް ފޮނުވުމަށް ޕެންޓަގަން އިން ހުއްދަ ދީފި

އިޒްރޭލާ ގުޅިގެން އީރާނާ ދެކޮޅަށް އެމެރިކާއިން ކުރިއަށްގެންދާ އަސްކަރީ ހަރަކާތްތައް ވަރުގަދަކުރުމުގެ ގޮތުން، މެދުއިރުމައްޗަށް "މެރިން އެކްސްޕެޑިޝަނަރީ ޔުނިޓް" (އެމް.އީ.ޔޫ) އެއް ފޮނުވުމަށް އެމެރިކާގެ ދިފާއީ ވުޒާރާ، ޕެންޓަގަނުން ހުއްދަ ދީފިއެވެ. މި ނިންމުމާއެކު އެ ސަރަހައްދުގައި ތިބޭ އެމެރިކާ ސިފައިންގެ އަދަދު އިތުރުވެ، ވައިގެ މަގުން ހަމަލާދިނުމުގެ ގާބިލުކަން އިތުރަށް ވަރުގަދަވެގެންދާނެ ކަމަށް ރިޕޯޓްތައް ބުނެއެވެ.

އެމެރިކާގެ އޮފިޝަލުންނާ ހަވާލާދީ ރިޕޯޓްކޮށްފައިވާ ގޮތުގައި، މެދުއިރުމައްޗަށް ފޮނުވާ މި ޔުނިޓަކީ އިންޑޯ-ޕެސިފިކް ސަރަހައްދުގައި ހަރަކާތްތެރިވާ ފައުޖެކެވެ. މި ފައުޖާއެކު މޫދާއި އެއްގަމުގައި ބޭނުންކުރެވޭ އުޅަނދުފަހަރާއި ހަނގުރާމަމަތީ ބޯޓުތައްވެސް ފޮނުވުމަށް ވަނީ ހަމަޖެހިފައެވެ.

"އެމްފިބިއަސް ރެޑީ ގްރޫޕް" އަދި "މެރިން އެކްސްޕެޑިޝަނަރީ ޔުނިޓް" (އޭ.އާރް.ޖީ/އެމް.އީ.ޔޫ) އެއްގައި އާންމުކޮށް 2،500 މެރިން ސިފައިންނާއި ކަނޑުގެ ސިފައިންގެ 2،500 މީހުން ހިމެނެއެވެ.

ވޯލް ސްޓްރީޓް ޖާނަލްއިން އެމެރިކާގެ އޮފިޝަލުންނާ ހަވާލާދީ ބުނެފައިވާ ގޮތުގައި، ޖަޕާނުގައި ބޭސްކޮށްފައިވާ "ޔޫ.އެސް.އެސް ޓްރިޕޮލީ" މަނަވަރާއި އެއާ ގުޅިފައިވާ މެރިން ސިފައިން މިހާރު ދަނީ މެދުއިރުމައްޗަށް ދިއުމަށް ދަތުރުކުރަމުންނެވެ.

އެ ނޫހުން ރިޕޯޓްކޮށްފައިވާ ގޮތުގައި، އިތުރު މެރިން ސިފައިން ފޮނުވުމަށް އެދުނީ މެދުއިރުމަތީގައި ތިބޭ އެމެރިކާ ސިފައިންގެ ކަންކަން ބަލަހައްޓާ ޔޫ.އެސް ސެންޓްރަލް ކޮމާންޑުންނެވެ. އަދި މި ހުށަހެޅުން ފާސްކޮށްދެއްވީ ޕެންޓަގަންގެ ވެރިޔާ ޕީޓް ހެގްސެތުއެވެ.

އީރާނާ ދެކޮޅަށް ހިންގާ އަސްކަރީ އޮޕަރޭޝަންތަކަށް އެހީތެރިވުމަށް މިހާރުވެސް އެ ސަރަހައްދުގައި އެމެރިކާގެ މެރިން ސިފައިން ހަރަކާތްތެރިވަމުންދާކަމަށް އެ ނޫހުން ފާހަގަކޮށްފައިވެއެވެ.

ފެބްރުއަރީ މަހުގެ 28 ވަނަ ދުވަހުން ފެށިގެން އެމެރިކާއާއި އިޒްރޭލުން ގުޅިގެން އީރާނަށް ވަރުގަދަ ވައިގެ ހަމަލާތަކެއް ދެމުންދާއިރު، އީރާނުން ވަނީ އޭގެ ރައްދުގައި ގިނަ އަދަދެއްގެ ޑްރޯންއާއި މިސައިލް ހަމަލާތަކެއް ދީފައެވެ. މީގެ އިތުރުން ދުނިޔޭގެ ސާފުނުކުރާ ތެލުގެ ވިޔަފާރީގެ ފަސްބައިކުޅަ އެއްބައި ހިއްސާކުރާ ހޯރްމޫޒް ކަނޑުއޮޅިން ދަތުރުކުރާ އުޅަނދުފަހަރަށްވެސް އީރާނުން ދަނީ ހަމަލާދެމުންނެވެ.