ވެމްކޯގެ ބައެއް މުވައްޒަފުންނަށް އަދިވެސް މުސާރަ ނުލިބޭ
5 ފެބުރުއަރީ 2026 | ބުރާސްފަތި 16:12ޖެނުއަރީ މަހުގެ މުސާރަ ބައެއް މުވައްޒަފުންނަށް ލިބިފައިވަނީ ފެބްރުއަރީ މަސް ފެށުނު ފަހުން ކަމަށާއި، ފެބްރުއަރީ 5 ވަނަ ދުވަހާ ހަމައަށް ވެސް ބައެއް މުވައްޒަފުންނަށް މުސާރަ ނުލިބޭ ކަމުގެ ޝަކުވާ ވަނީ ބޮޑުވެފަ.
ވެމްކޯ ކުނި އުކާލުން | ރާއްޖެއެމްވީ
ޖެނުއަރީ މަސް ނިމުނު އިރު ވެސް ވޭސްޓް މެނޭޖްމެންޓް ކޯޕަރޭޝަން (ވެމްކޯ)ގެ ބައެއް މުވައްޒަފުންނަށް މުސާރަ ނުލިބޭ ކަމަށް އެ ކުންފުނީގެ ބައެއް މުވައްޒަފުން ބުނެފި އެވެ.
މި ނޫހާއި ވާހަކަދެއްކި މުވައްޒަފުން ބުނީ ބައެއް މުވައްޒަފުންނަށް މުސާރަ ލިބިފައި ވަނީ މި މަސް ފެށުނު ފަހުންނެވެ. އަދި ފެބްރުއަރީ 5 ވަނަ ދުވަހުގެ ނިޔަލަށް ވެސް ބައެއް މުވައްޒަފުންނަށް މުސާރަ ޖަމާވެފައި ނުވާ ކަމަށް މުވައްޒަފުންނާއި ހަވާލާދީ މި ނޫހާއި ވާހަކަ ދެއްކި ފަރާތްތަކުން ވަނީ ބުނެފަ އެވެ.
މިކަމާއި ގުޅޭ ގޮތުން ވެމްކޯގެ ކޮމެންޓެއް ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފަ އެވެ. އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި މުސާރަ ޖަމާކުރަން ފެށީ ބުދަ ދުވަހުގެ ރޭގެ ވަގުތެއްގަ އެވެ. އަދި ބައެއް މުވައްޒަފުންނަށް 15 އިގައި މުސާރަ ލިބޭނެ ކަމަށް އަންގާފައިވާ ކަމަށް ވަނީ އަޑު ފެތުރިފަ އެވެ. މިކަމާއި ގުޅިގެން ވެމްކޯ ގެ ކަމާއި ގުޅުން ހުރި ފަރާތަކުން ކޮމެންޓް ކޮށްފައި ނުވާތީ މުސާރަ ލަސްވި ސަބަބާއި، މުސާރަ ނުލިބެނީ ކިހާ އަދަދެއްގެ ބަޔަކަށް ކަން ސާފެއް ނުވެ އެވެ.
މަސް ނިމޭ ދުވަހަށް ސަރުކާރު ކުންފުނިތަކުގައި މަސައްކަތްކުރާ މުވައްޒަފުންނަށް މުސާރަ ނުލިބުމުގެ މައްސަލަ މީގެ ކުރިން ކުރިމަތިވެފައި ނުވާކަން ފާހަގަ ކުރެވޭ އިރު، ވެމްކޯ ހިމެނޭ ގޮތައް ސަރުކާރުގެ ބައެއް ކުންފުނިތަކުގެ މުވައްޒަފުންގެ ޕެންޝަން ފައިސާ ވެސް ގަވައިދުން ޖަމާ ނުވުމުގެ މައްސަލަ ވެސް ވަނީ ފެންމަތިވެފަ އެވެ.
