ސަރުކާރުގެ ކުންފުނި އެމްޕީއެލް އިން ލޮޖިސްޓިކްސް ވިޔަފާރިއަށް
7 ފެބުރުއަރީ 2026 | ހޮނިހިރު 10:33މޯލްޑިވްސް މެރިން އެކްސްޕޯގައި ފިނޭންސް މިނިސްޓަރު އިފްތިތާހުކޮށްދެއްވި މި ކުންފުނީގެ މައިގަނޑު މަގުސަދަކީ ރާއްޖޭގެ އެކި ސަރަހައްދުތަކަށް ބޭނުންވާ އަސާސީ މުދަލާއި ކާޑުގެ ބާވަތްތައް ފަސޭހަކަމާއެކު ފޯރުކޮށްދިނުން. މި ކުންފުނީގެ ދަށުން ޑޮމެސްޓިކް ޓްރާންސްޝިޕްމަންޓާއި ތިލަފުށީގައި މުދާ ރައްކާކުރާނެ ކޮމާޝަލް ވެއާހައުސިންގެ ހިދުމަތް ދިނުމަށް ވަނީ ހަމަޖެހިފަ. ނަމަވެސް، ސަރުކާރުގެ ކުންފުންޏަކުން މިފަދަ ވިޔަފާރިއެއްގެ ތެރެއަށް ވަނުމާ ގުޅިގެން، މި ދާއިރާގައި ހަރަކާތްތެރިވާ އަމިއްލަ ވިޔަފާރިވެރިން ދަނީ ކަންބޮޑުވުން ފާޅުކުރަމުން.
މޯލްޑިވްސް ނޭޝަނަލް ލޮޖިސްޓިކްސް | އެމްޕީއެލް
ވިޔަފާރި ބަނދަރުތައް ހިންގުމުގެ ޒިންމާ މަތިކޮށްފައިވާ ސަރުކާރުގެ ކުންފުނި، މޯލްޑިވްސް ޕޯޓްސް ލިމިޓެޑު (އެމްޕީއެލް) އިން، މޯލްޑިވްސް ނޭޝަނަލް ލޮޖިސްޓިކްސްގެ ނަމުގައި ސަބްސިޑަރީ ކުންފުންޏެއް އުފައްދައިގެން ލޮޖިސްޓިކްސް ވިޔަފާރިއަށް ނިކުމެއްޖެ އެވެ.
މިހާރު ކުރިއަށްދާ މޯލްޑިވްސް މެރިން އެކްސްޕޯގެ ތެރެއިން އެމްޕިއެލް އިން މިކުންފުނި ލޯންޗްކޮށްފައިވާއިރު، އެ ކުންފުނީގެ ސޯޝަލް މީޑިއާ ޕޭޖުތަކުގައި ހިއްސާކޮށްފައިވާ ފޮޓޯތަކުން ފެންނަ ގޮތުގައި އިފްތިތާހުކޮށްދެއްވީ ފިނޭންސް މިނިސްޓަރު މޫސާ ޒަމީރު އެވެ.
އޭގެ އިތުރުން އެމްޕީއެލް އިން ނެރުނު ނޫސްބަޔާނެއްގައި ބުނީ، މޯލްޑިވްސް ނޭޝަނަލް ލޮޖިސްޓިކްސް އުފެއްދުމުގެ މައިގަނޑު މަގުސަދަކީ ރައްޔިތުންނަށް ބޭނުންވާ އަސާސީ މުދަލާއި ކާޑުގެ ބާވަތްތައް، ރާއްޖޭގެ އެކި ސަރަހައްދުތަކުގައި ގާއިމުކޮށްފައިވާ ގުދަންތަކެއް ދަތިކަމެއް ނެތި ފޯރުކޮށްދިނުން ކަމަށެވެ. ނޭޝަނަލް ލޮޖިސްޓިކްސްގެ ދަށަށް ބަދަލުކުރި ހިދުމަތްތަކުގެ ތެރޭގައި އެ ކުންފުނިން ފަށައިގެން އުޅޭ ޑޮމެސްޓިކް ޓްރާންސްޝިޕްމަންޓް ހިމެނެ އެވެ. މިއީ މާލޭ ވިޔަފާރި ބަނދަރަށް އަންނަ ޓްރާންސްޝިޕްމަންޓް ކޮންޓޭނަރުތައް، އެމްޕީއެލްގެ އުޅަނދުތަކުގައި ހިތަދޫ ޕޯޓާއި ކުޅުދުއްފުށީ ޕޯޓަށް ފޮނުވަން ފެށި ހިދުމަތެކެވެ.
އެމްޕީއެލް އިން ބުނިގޮތުގައި އެ ކުންފުނިން އަލަށް ތައާރަފުކުރާ ހިދުމަތަކީ ކޮމާޝަލް ވެއާހައުސިން އެވެ. ތިލަފުށީގައި ހުންނަ ގުދަންތަކެއްގައި ކްލިއަރެންސް ނިމިފައިވާ ވިޔަފާރި މުދާ ބަހައްޓައިދޭ މި ހިދުމަތަކީ، ހަ މަސް ކުރިން ފެށި "ޕްރޮޖެކްޓް ކާގޯ ހޭންޑްލިން" ކާމިޔާބީއަށް ބިނާކޮށް ދާއިމީކުރި ހިދުމަތެއް ކަމަށް އެމްޕީއެލްއިން ބުންޏެވެ.
އެމްޕީއެލް އިން މި ކުންފުނި އުފައްދާ ލޮޖިސްޓިކް ވިޔަފާރިއަށް ވަނުމާއިގުޅިގެން މި ދާއިރާގައި ހަރަކާތްތެރިވާ އަމިއްލަ ވިޔަފާރިތަކުން ދަނީ ކަންބޮޑުވުން ފާޅުކުރަމުންނެވެ. އަދި ސަރުކާރު އެހެން ކުންފުނިތައް މެދުވެރިކޮށް އަމިއްލަ ވިޔަފާރިތަކަށް ވަންނަ މައްސަލައިގައި ވިޔަފާރިވެރިން މީގެކުރިންވެސް ވަނީ ކަންބޮޑުވުން ފާޅުކޮށްފަ އެވެ.
