އިސްލާމް ދީނަށް ފުރައްސާރަކުރި ކަމަށް ތުހުމަތު ކުރެވޭ މައްސަލައެއްގައި ހޯދަމުންދާ ބޫގާ ތަހުގީގަށް ހާޒިރެއް ނުވި

އިސްލާމް ދީނަށް ފުރައްސާރަކުރި ކަމަށް ތުހުމަތު ކުރެވޭ މައްސަލައެއްގައި ހޯދަމުންދާ އަހުމަދު އާމިރު ނުވަތަ ބޫގާ ތަހުގީގަށް ހާޒިރުނުވާ ކަމަށް ފުލުހުން ބުނެފި އެވެ.

އިސްލާމް ދީނަށް ފުރައްސާރަ ކުރާ ކަމުގެ ތުހުމަތުގެ ތަހުގީގަށް ސުވާލު ކުރުމަށްޓަކައި ހ.ފިލިކުރިގެ، ކ.މާލެ، 51 އަހަރުގެ އަހުމަދު އާމިރު 10 މާރިޗު 2026 ވަނަ ދުވަހުގެ 16:00ށް ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގް އަށް ހާޒިރުވާން ފުލުހުން ވަނީ އަންގާފަ އެވެ. 

ފެބްރުއަރީ މަހުގެ 24 ވަނަ ދުވަހު އޭނާ ހޯދަން އިއުލާންކޮށް ފުލުހުން ބުނީ، ސޯޝަލް މީޑިއާގެ އެކި ޕްލެޓުފޯމުތަކުގައި އިސްލާމް ދީނަށް ފުރައްސަރަކޮށް، ރައްޔިތުންގެ ދީނީ އެއްބައިވަންތަ ކަމަށް ބޫރު އަރާ ފަދަ ވާހަކަ ދައްކާފައިވާ ކަމަށެވެ. އަދި، އިސްލާމިކް މިނިސްޓްރީ ނައްތާލުމަށް އޭނާ ގޮވާލާފައިވާ ކަމަށް އެ ޚިދުމަތުން ވަނީ ބުނެފަ އެވެ.

ފުލުހުން ބުނީ، އެ މައްސަލައިގެ ތަހުގީގަށް އޭނާ ހާޒިރުވާން އެންގުމަށް އުޅޭ ވަކި ތަނެއް ނޭނގޭތީ ޗިޓު ރައްދު ކުރެވިފައި ނުވާ ކަމަށެވެ. އަދި މިމަހުގެ 10 ވަނަ ދުވަހު ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގް އަށް ހާޒިރުވާން އެންގި ނަމަވެސް ހާޒިރުވެފައިނުވާ ކަމަށް ފުލުހުން ބުނެ އެވެ. 

މި މައްސަލަ ފުލުހުން އިތުރަށް ތަހުގީގު ކުރަމުންދާއިރު، އާމިރު ހަދާފައިވާ ޓިކްޓޮކް ތަކުން އެނގޭ ގޮތުގައި އޭނާއަކީ ޖަޕާން މީހަކާ ކައިވެނި ކޮށްގެން އެ ގައުމުގައި ދިރިއުޅޭ މީހެކެވެ. އަދި ބައެއް ފަހަރު ރާއްޖެއަށް އަންނަ ކަމަށް ޓިކްޓޮކްގައި ބުނެފައިވެ އެވެ. 

މީގެ އިތުރުން 6 މަރޗް 2026 ވަނަ ދުވަހު ފުލުހުން ވަނީ އިސްލާމްދީނަށް ފުރައްސާރަކުރިކަމުގެ ތުހުމަތުގައި ނ.ކުޑަފަރި އަށް ނިސްބަތްވާ، އެރަށުގެ ހިޔަލީގެ، 44 އަހަރުގެ ޙުސައިން ޔޫސުފް ހޯދުމަށް ވެސް އިއުލާން ކޮށްފަ އެވެ. މިމަހުގެ 18 ވަނަ ދުވަހުގެ 12:00ށް ސާޖަންޓް އާދަމް ޙަލީމް ކުރިމިނަލް އިންވެސްޓިގޭޝަން ބިލްޑިންގ އަށް ހާޒިރުވުމަށް އަންގާފައިވެ އެވެ. 

ދޭތެރެދޭތެރެއިން އިސްލާމްދީނަށް ފުރައްސާރަކުރާ މީހުންގެ މައްސަލަތައް ފެންމަތިވެގެންދެ އެވެ. އަދި މިފަދަ މައްސަލަތަކުގައި މީހުން ހައްޔަރު ވެސް ކޮށްފައިވެ އެވެ.