ބޭނުން ދީނަކަށް އުޅުމުގެ މިނިވަންކަން ދިނުމަށް ގޮވާލާ އދ އަށް ހުށަހެޅި ގަރާރަށް ރާއްޖެއިން ޖެހީ ހެޔޮ ފާހަގައެއް
މި ގަރާރުގައި ބޭނުން ދީނަކަށް އުޅުމުގެ މިނިވަންކަން ދިނުމަށް ގޮވާލާފައިވޭ
ދީނީ މިނިވަންކަމާއި އިސްލާމްދީނުގެ ހުކުމްތަކާއި ހިލާފުވާ ގަރާރު ބަލައިގަނެ އާންމު މަޖިލީހަށް ފޮނުވަން ރާއްޖެއިން ވަނީ ވޯޓު ދީފައި
ބޭނުން ދީނަކަށް އުޅުމުގެ މިނިވަންކަން ދިނުމަށް ގޮވާލާ އދ އަށް ހުށަހެޅި ގަރާރަށް ރާއްޖެއިން ވޯޓު ދީފިއެވެ.
"ކޯޕަރޭޝަން ބިޓްވީން ދަ ޔުނައިޓެޑް ނޭޝަންސް އެންޑް ދަ ކައުންސިލް އޮފް ޔޫރަޕް" ނުވަތަ އދ އާއި ކައުންސިލް އޮފް ޔޫރަޕްގެ މެދުގައި އެއްބާރުލުން ދިނުމާއި ގުޅޭ ގަރާރަށް ރާއްޖެއިން "އާނ" ބަސް ބުނެ ވޯޓު ދިނީ މިދިޔަ ބުދަ ދުވަހުއެވެ. ބުދަ ދުވަހު އޮތީ މި ގަަރާރު އދ. ގެ 81 ވަނަ އާންމު މަޖިލީހަށް ގަރާރު ފާސްކުރުމެވެ. ރާއްޖެއިން ވަނީ ފާސްކުރަން ވޯޓު ދީފައެވެ.
މި ގަރާރުގައި ވަނީ "ހުރިހާ އިންސާނީ ހައްގުތަކެއް" ހިމާޔަތްކޮށް އދ އިން ޔޫރަޕުގެ ކައުންސިލް އާއި ގުޅިގެން މަސައްކަތް ކުރުމަށް ގޮވާލާފައެވެ.
މި ގަރާރުގައި ބުނެފައިވަނީ އދ އާއި ކައުންސިލް އޮފް ޔުރަޕް ގުޅިގެން "މިނިވަންކަން ކުރިއެރުވުމާއި، ޚިޔާލުފާޅުކުރުމާއި ޚިޔާލު ފާޅުކުރުމުގެ މިނިވަންކަމާއި، ވިސްނުމާއި، ދީން ނުވަތަ ޢަޤީދާގެ މިނިވަންކަން، އެއްވެސް ތަފާތުކުރުމެއް ނެތި މުޖުތަމަޢުގެ އެންމެހާ މެންބަރުންގެ ޙައްޤުތަކާއި ކަރާމާތް ހިމާޔަތްކުރުމުގެ ވާހަކައެވެ.
މީގެ އިތުރުން މި ގަރާރުގައި ވަނީ ޑިމޮކްރަސީ ކުރިއެރުވުމާއި، ވެރިކަން ކުރުމާއި، ޤާނޫނާއި ހެޔޮވެރިކަމާއި، ކޮންމެ ފެންވަރެއްގައިވެސް އަނިޔާކުރުން ހުއްޓުވުމާއި، ލާއިންސާނީ ނުވަތަ ނިކަމެތި ޢަމަލެއް ނުވަތަ އަދަބެއް ދިނުން ހުއްޓުވުމާއި. ޓެރަރިޒަމާ ދެކޮޅަށް މަސައްކަތް ކުރުމުގެ ވާހަކައެވެ.
އެ ގަރާރު ފާސްކޮށްފައިވަނީ 105 ގައުމެއްގެ ވޯޓާއެކުއެވެ. އޭގެ ތެރޭގައި ރާއްޖެ ހިމެނެއެވެ. ރާއްޖެއިން މި ގަރާރަށް ވޯޓު ދިން އިރު، މި ގަރާރުގައި އިސްލާމްދީނުގެ ހުކުމްތަކަށް ފުށުއަރާ ކަންކަން ހިމެނެއެވެ. އޭގެ ތެރޭގައި ހުޅަނގުގެ ގައުމުތަކުން ގަބޫލުކުރާ ލާ-އިންސާނީ އަނިޔާ ނުވަތަ އަދަބުތައް ހިމެނެއެވެ. އެއީ އިސްލާމްދީނުގައި ހުކުމް ކަނޑައަޅާފައިވާ ކަންކަމެވެ. މި ގަރާރުގައި ލާއިންސާނީ ނުވަތަ ނިކަމެތި އަމަލެއް ނުވަތަ އަދަބެއްގެ ގޮތުގައި ބުނެފައިވަނީ ޒިޏޭ ކުރުމުން ކަނޑައަޅާފައިވާ ހައްދު ޖެހުމުގެ އަދަބާއި، މަރަށް މަރު ހިފުމާއި، ދީނީ މިނިވަންކަމާއި، ބޭނުން ހިޔާލެއް ބޭނުން ގޮތަކަށް ފާޅުކުރުމުގެ ވާހަކަތެކެވެ.
މި ގަރާރަށް އިސްލާމީ ބޮޑެތި ގައުމުތަކުން ބައިވެރި ނުވެއެވެ. އޭގެ ތެރޭގައި ސައުދީ އަރަބިއްޔާ، އޮމާން، ޕާކިސްތާން ކުވައިތު، ޔަމަން އަދި މިސްރު ހިމެނެއެވެ. މީގެ އިތުރުން އިންޑިއާ ސްރީލަންކާ އަދި ޗާއިނާ އިންވެސް ވޯޓުގައި ބައިވެރިނުވެއެވެ.
