މަގުން ހިނގާ މީހުންނާއި، މަގުގެ ބޭނުންކުރާ މީހުން، މަގުމަތީގެ އަދަބުތަކާއި، ޙައްޤުތަކަށް ރައްކާތެރިވާން ޖެހޭ : ހުތުބާ
މަގުގައި ވިސްނުންތެރިކަމާއި އެކު ޓްރެފިކް ނިޝާންތަކާއި އުސޫލުތަކަށް ތަބާވުމަކީ މުހިންމު ކަމެއް ކަމަށާއި މީހަކަށް ގެއްލުންލިބޭ ކަންކަން ކުރުން އިސްލާމްދީނުގައި މަނާކަމަށް ހުތުބާގައި ވަނީ ބުނެފަ އެވެ.
ޓްރެފިކް ފުލުހުން މަގުމަތީގައި ހަރަކާތްތެރިވަނީ
މަގުން ހިނގާ މީހުންނާއި، މަގުގެ ބޭނުންކުރާ މީހުން، މަގުމަތީގެ އަދަބުތަކާއި، ޙައްޤުތަކަށް ރައްކާތެރިވާން ޖެހޭނެ ކަމަށް ހުކުރު ހުތުބާގައި ބުނެފައި ވެ އެވެ.
ހުތުބާގައި ބުނެފައި ވަނީ އަހަރެމެން ގެ އަމިއްލަ ނަފުސާއި، އެހެން މީހުންގެ ރައްކާތެރިކަމާއި އަމާންކަމަށް ސަމާލު ވެވޭނީ، މާތް الله އަހަރެމެންނަށް ދެއްވައިފައިވާ ނިޢުމަތްތަކު ގެ ބޭނުން ހެޔޮ ގޮތުގައި ހިފައިގެން ކަމަށެވެ. ސިކުނޑި އާއި، ލޮލާއި، ގުނަވަންތަކުގެ ބޭނުން ހެޔޮ ގޮތުގައި ހިފަން ޖެހޭ ކަމަށް ހުތުބާގައި ވަނީ ބުނެފަ އެވެ.
ހުތުބާގައި އިތުރަށް ބުނެފައި ވަނީ މާތް الله ދެއްވައިފައިވާ ހުރިހައި ނިޢުމަތްތަކަށް އިންސާނާ ޝުކުރުވެރިވާން ޖެހޭ ކަމަށާއި އެކަލާނގެ އަހަރެމެންނަށް ދެއްވި ނިޢުމަތްތަކު ގެ ތެރޭގައި އަހަރެމެން ވިސްނައި ފިކުރުކުރުމުގެ ބާރުކަމުގައިވާ ބުއްދި ހިމެނޭ ކަމަށެވެ. ހެޔޮ ގޮތުގައި ވިސްނައި ފިކުރު ކުރުމަކީ، އެ ނިޢުމަތަށް ޝުކުރުކޮށް ޤަދަރުކުރުން ކަމަށް ހުތުބާގައި ބުނެފައި ވެ އެވެ.
" މުސްލިމް އަޚުންނޭވެ! އެއްގަމާއި، ކަނޑާއި، ވައިގެ ދަތުރުތަކުގައި ވިސްނުންތެރިކަމާ އެކު ލޮލުގެ ބޭނުންހިފާން ޖެހެ އެވެ. އެއްގަމު އުޅަނދުތައް ދުއްވާ މީހުން ދަތުރުފަތުރާ ގުޅޭ ނިޝާންތަކާއި، އުޅަނދު ދުއްވާންވީ ބާރުމިން އަންގައިދޭ ބޯޑުތަކާއި، ޓުރެފިކް ލައިޓުތަކާއި، ޓުރެފިކް ޕޮލިހުގެ އިރުޝާދަށް ތަބަޢަވާން ޖެހޭނެ އެވެ. މަގުހިނގާ މީހުންނާއި، މަގުގެ ބޭނުންކުރާ މީހުން، މަގުމަތީގެ އަދަބުތަކާއި، ޙައްޤުތަކަށް ރައްކާތެރިވާންޖެހޭނެ އެވެ. " ހުތުބާގައި ބުނެފައި ވެ އެވެ.
އެއްވެސް މީހަކަށް އަނެކާއާ ހުރެ އުނދަގުލެއް ފޯރިއަނުދިނުމުގެ މުހިންމު ކަމަށް ހުތުބާގައި އަލިއަޅުވާލާފައި ވެ އެވެ. މުދަލާއި، ފަރުދުންނާއި، ޖަމާޢަތުގެ ރައްކާތެރިކަމަށް ޓަކައި، ހެދިފައިވާ ޓްރެފިކް އުސޫލުތަކަށް ވެސް ތަބާވާން ޖެހޭ ކަން ހުތުބާގައި ބަޔާންކޮށްފައި ވެ އެވެ.
"ގެއްލުންދިނުމެއް އަދި ގެއްލުންލިބިގަތުމެއް ވެސް ނުވެއެވެ. މި ޙަދީޘުން ދޭހަވާ ގޮތުގައި، މީހަކަށް ގެއްލުމެއް ވާނެ ކަމެއް ކުރުމަކީ، އިސްލާމް ދީނުގައި މަނާ ކަމެކެވެ. ޓުރެފިކް ޤަވާޢިދާ ޚިލާފުވުމަކީ، އޭގެ ސަބަބުން ތިމާގެ އަމިއްލަ ނަފުސަށާއި، އެހެން މީހުންނަށާއި މުދަލަށް ގެއްލުން ލިބިދާނޭ ކަމެކެވެ. އިސްލާމީ ޝަރީޢަތުގައި ގެއްލުމެއް ލިބޭ ފަދަ އެއްވެސް ކަމެއް ކުރުމަކީ ހުއްދަ ކަމެއް ނޫނެވެ." ހުތުބާގައި ބުނެފައި ވެ އެވެ.
ހުތުބާގައި ބުނެފައި ވަނީ މަގުމަތި، އަމާން ތަނަކަށް ހެދުމަށް ޓަކައި ހުރި އިރުޝާދުތައް ކީރިތި ރަސޫލާ ގެ ސުންނަތުން ފެންނާން އެބަހުރި ކަމަށެވެ. މަގުމަތީގައި މީހަކަށް އުނދަގުލެއްވާ ގޮތަށް، ހުންނަ ތަކެތި އެއްފަރާތް ކޮށްލުމަކީ އީމާންކަމުގެ ތެރެއިންވާ ކަމެއް ކަން ހުތުބާގައި ހަނދާން ކޮށްދީފައި ވެ އެވެ.
މީގެ އިތުރުން ކަނޑުދަތުރެއް ކަމުގައި ވިއަސް، ވައިގެ ދަތުރެއް ނުވަތަ އެއްގަމުގައި ކުރާ ދަތުރެއްކަމުގައި ވިއަސް ދަތުރުދުޢާ ކިއުމަކީ، ކޮންމެ ދަތުރުވެރިއެއްގެ ވެސް އާދައަކަށް ހަދާން ޖެހޭ ކަމަށް ހުތުބާގައި ބުނެފައި ވެ އެވެ.
