މުސްލިމަކާ ދިމާއަށް ކާފިރެކޭ ބުނުމަކީ ނުރައްކާތެރި ކަމެއް ކަމަށް ހުކުރު ޚުތުބާގައި ބުނެފިއެވެ.

''މުސްލިމަކު ކާފިރުކުރުމުގެ ނުބައިކަން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ ކާފިރުކުރުމަކީ މުސްލިމަކު ނުވަތަ މުސްލިމް ޖަމާއަތެއް ކުފުރަށް ނިސްބަތް ކުރުން ކަމަށާއި، އެމީހުންގެ ފުރާނައާއި، މުދާ ހިފުން ހުއްދަ ކުރުން ކަމަށެވެ.

މިއީ އެހައި ފަސޭހައިން ކުރެވިގެންވާނެ ކަމެއް ނޫންކަން ފާހަގަކޮށް ޚުތުބާގައި ބުނީ އެއްވެސް މީހަކަށް އިސްލާމްކަމުގެ މަތިވެރި ޝަރަފު ލިބުމަށް ފަހު އޭނާ އެ ދާއިރާއިން ބޭރު ކުރުމަކީ ވަރުގަދަ ހުއްޖަތާއި ސާބިތު ހެތްކާއި ރޯމާ ދުވާލުފަދަ އަލިގަދަ ދަލީލުތަކެއް ނެތި ކުރުން ހަރާމް ކަމެއް ކަމަށެވެ.

ޝަރުއީ ނައްޞުތަކުން ސާފުކޮށް އެނގޭ ގޮތުގައި މުސްލިމަކާ ދިމާލަށް ބަދު ބަސް ބުނުމާއި ގަޒްފު ކުރުމަކީ ހަރާމްކަންތައް ކަމުގައިވީއިރު، ހީއެއް ނުވަތަ އަމިއްލަ ވިސްނުމުގެ މައްޗަށް ބިނާކޮށް މުސްލިމަކު ކާފިރުކުރުން ހުއްދައެއް ނުވާނެ ކަމަށް ޚުތުބާގައި ބުނެފައިވެއެވެ. އަދި މިއީ ނުރައްކާތެރި ކަމެއް ކަމަށާއި، މިފަދަ ކަންކަމުން ދުރުވުމަށް ޚުތުބާގައި ގޮވާލާފައިވެއެވެ.

ޚުތުބާގައި ބުނީ މުސްލިމުން ކާފިރުކުރުމަކީ ޖާހިލުކަމާއި، ޝަރުއީ ހުކުމްތައް ދޭހަނުވުމާއި ޝުބުހަތަކަށް ހެއްލުމުގެ ނަތީޖާ ކަމަށެވެ. އަދި ޚަވާރިޖުން ޞިއްފީނު ހަނގުރާމައިގައި އަސްހާބުބޭކަލުން ކާފިރުކޮށް ޝަރީއަތުގެ މަގުސަދުތައް އޮޅުވައިލައި ޝުބުހަތަކަކަށް ހެއްލުނުކަން ޚުތުބާގައި ފާހަގަކޮށްފައިވެއެވެ.

ޚުތުބާގައި ބުނީ، މިކަމުގެ ހައްލަކީ ސުންނަތް ޖަމާއަތުގެ މަންހަޖަށް އެނބުރި ރުޖޫއަވުން ކަމަށާއި، އިންޓަނެޓް ދަސްވެނިވުމުގެ ބަދަލުގައި ބޮޑެތި އާލިމުންގެ އަރިހުން ދަރިވަރުވުން ކަމަށެވެ. އެހެނީ ދީނުގެ ކަންކަން ރަނގަޅަށް ނޭނގޭ މީހުންގެ ގާތުން އިލްމު ހޯދާން ފެށުމަކީ ގިޔާމަތުގެ އަލާމަތެއް ކަމަށް ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ހަދީސް ކުރައްވާފައިވާކަން ފާހަގަކޮށްފައިވެއެވެ.