އިންތިޚާބުތަކަކީ ގާނޫނު އަސާސީގެ އަސާސީ ޖައުހަރީ ކަންތައްތަކެއް. އިންތިޚާބު އެއް ކުރުމަށް އެއްވެސް ކަހަލަ ޖަސްޓިފިކޭޝަނެއް ނުގެނެވޭނެ: ކުރީގެ އުއްތަމަ ފަނޑިޔާރު

އިންތިޚާބުތަކަކީ ގާނޫނު އަސާސީގެ އަސާސީ ޖައުހަރީ ކަންތައްތަކެއް ކަމަށާއި، އިންތިޚާބު އެއްކުރުމަށް އެއްވެސް ކަހަލަ ޖަސްޓިފިކޭޝަނެއް ނުގެނެވޭނެ ކަމަށް ކުރީގެ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ ވިދާޅުވެއްޖެ އެވެ. 

 "ދެ އިންތިޚާބު އެއްކުރަން ނުފެނޭ" ނަމުގައި އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ކުރީގެ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ ވަނީ ގާނޫނު އަސާސީއަށް ކުއްލިކުއްލި އަށް ގެންނަ ބަދަލުތައް ގެނައުން ހުއްޓާލުމަށް ގޮވާލާފަ އެވެ.

ޑރ.އަހުމަދު އަބްދުﷲ ދީދީ ވިދާޅުވީ، ގާނޫނު އަސާސީއަކީ ލީގަލް ހައިރާކީގެ އެންމެ މަތީގައިވާ އެއަށް ޚާއްސަ ސްޓޭޓަސް ދެވިފައިވާ ސުޕްރީމިސީ ޑޮކިއުމަންޓެއް ކަމަށާއި، ކުޅޭކުޅޭ އެއްޗެއްގެ ގޮތަށް ނުވަތަ އާދައިގެ ގާނޫނުތައް ފާސްކުރާ ކުއްލި ކުއްލި އަށް ބަދަލު ގެނެވޭނެ އެއްޗެއް ނޫން ކަމަށެވެ. 

އެންމެ މުހިންމު ދެ ބާރު ކަމުގައިވާ ވެރިކަން ހިންގުމުގެ ބާރާއި، ރައްޔިތުންގެ މަޖިލީހުގެ ގާނޫނީ ހުވާގައި ގާނޫނު އަސަސީއަށް އިހުތިރާމް ކުރުމާއި، ގާނޫނު އަސާސީ ނަގަހައްޓަން ބަޔާން ކޮށްފައިވާކަން ފާހަގަކުރައްވައި ޑރ. އަހުމަދު އަބްދުﷲ ދީދީ ވިދާޅުވީ ގާނޫނު އަސާސީއަށް ބަދަލު ގެނައުމުގެ ބާރު ރައްޔިތުންގެ މަޖިލީހަށް ވެސް ލިބިފައިވަނީ އިސްތިސްނާ ގޮތަކަށް ކަމަށެވެ. އަދި ވިދާޅުވީ ގާނޫނު އަސާސީއަކީ ލެޖިޓް އެއްޗަކަށްވާއިރު، ސަރުކާރަށް ރައްޔިތުންގެ މަޖިލީހުގައި މެޖޯރިޓީ އޮތް ނަމަވެސް ބަދަލު ގެނެވިގެން ނުވާނެ ކަމަށެވެ. މިހާރު މި ސަރުކާރުން ކަންކަން ކުރަނީ، ދުނިޔޭގެ އެހެން ގައުމުތަކުގައި ކަންކަން ކުރާ އުސޫލު ނޫން ކަމަށާއި، ގާނޫނު އަސާސީއަށް މިގޮތަށް ބަދަލު ނުގެންނަ ކަމަށެވެ. 

މީގެ އިތުރުން ޑރ. އަހުމަދު އަބްދުﷲ ދީދީ ވިދާޅުވީ ދެ އިންތިޚާބު އެއްކޮށްލުމަށް ސަރުކާރުން މަސައްކަތް ކުރަނީ ރައްޔިތުން ބޭނުން ވެގެން ނޫން ކަމަށާއި، އެކަމަށް ރައްޔިތުން ޑިމާންޑް ނުކުރާ ކަމަށެވެ. ގާނޫނު އަސާސީއަކީ ރައްޔިތުންގެ މިލްކެއް ކަމަށާއި، ކުރިއަށް އޮތް ޖެނަރޭޝަންތަކުގެ މިލްކެއް ކަމަށެވެ. އަދި ވަކި ފަރުދެއްގެ މިލްކަކަށް ނުވާއިރު، ރައީސުލްޖުމްހޫރިއްޔާ ބޭނުންފުޅުވުމުން ގާނޫނު އަސާސީއަށް ބަދަލު ނުގެނެވޭނެ ކަމަށް ޑރ. އަހުމަދު އަބްދުﷲ ދީދީ ވިދާޅުވި އެވެ.

ރައީސުލްޖުމްހޫރިއްޔާ ރައްޔިތުންނާ ބައްދަލު ކުރައްވާ ކޮންމެ ފަހަރަކު ދެ އިންތިޚާބު އެއްކޮށް ބޭއްވުމާ ބެހޭ ގޮތުން އާ ސަބަބެއް ގެންނަވާ އެބަ. އެގޮތުން ވަރަށް ފަހުން ދެއްކެވި ވާހަކަފުޅެއްގައި ވިދާޅުވީ ރިޔާސީ އިންތިޚާބުގައި ޓާންއައުޓް ގިނަވެގެންދާ ދިއުން ގިނައިން ރައްޔިތުން ވޯޓު ދޭން ނުކުންނަ އިންތިޚާބަކަށްވާތީއޭ ތިމަންމަނިކުފާނު ދެ އިންތިޚާބު އެއްކޮށްލަވައްނީ. ދެން އަންނަ ހަ މަސް ތެރޭގައި ނޯ ކޮންފިޑެންސް ނޫނީ އިންޕީޗްމަންޓް ޕްރޯސަސްއެއް މަޖިލީހުން ހިންގާފާނެތީ ކަމަށް. ހަގީގަތުގައި އިންޕީޗްމަންޓަކީ އެއީ ރައީސުލްޖުމްހޫރިއްޔާ ޕަވަރ ކޮންސިއުނަޝަލް ބާރުތޯ އެބިއުސް ކުރައްވަނީ. އެއީ މެޖޯރިޓީ އޮތީމަ. މިދެންނެވީ ޕާލިމަންޓްގެ މެޖޯރިޓީ އޮތީމަ. ހަގީގަތުގައި އެހެނޭ ކިޔާފައި ވިދާޅުވާ ވިދާޅުވުން ވެސް އެދޭހަވަނީ އަޅުގަނޑުމެން މިދަންނަވާ ކޮންސިއުޝަނަލް ލެގަމެސީ ގެއްލިފައިވާކަން. އެއީ އަމިއްލަ ކަންތައްތަކެއް ވާހަކަ އެ ދައްކަވަނީ. މިއީ ރައްޔިތުންގެ މިލްކެއް. 

ކުރީގެ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ

އެއްދުވަހެއްގައި އިންތިޚާބު ބޭއްވުމަށް މަސައްކަތް ކުރަނީ ހަރަދު ކުޑަ ކުރުމަށް ކަމަށް ދެކެވޭ ވާހަކަތަކަށް ރައްދު ދެއްވައި، ޑރ. އަހުމަދު އަބްދުﷲ ދީދީ ވިދާޅުވީ ޕޮލިޓިކަލް ސިސްޓަމްގެ ތެރެއިން ވަރަށް ގިނައިން އިސްރާފު ކުރާ ކަމަށާއި، އެއިސްރާފު ކުރުން ހުއްޓާލަން ޖެހޭ ކަމަށެވެ. 

މީގެ އިތުރުން ޑރ.އަހުމަދު އަބްދުﷲ ދީދީ ވިދާޅުވީ އިންތިޚާބުތަކަކީ ގާނޫނު އަސާސީގެ އަސާސީ ޖައުހަރީ ކަންތައްތަކެއް ކަމަށާއި، މިކަންތައްތައް ހަރަދާ އަޅާ ކިޔުމަށްފަހު އެއްވެސް ކަހަލަ ޖަސްޓިފިކޭޝަނެއް ނުގެނެވޭނެ ކަމަށެވެ. އަދި ވިދާޅުވީ ހަރަދު ކުރަން ޖެހޭ ވަރަށް ހަރަދު ކުރަން ޖެހޭ ކަމަށާއި، ބަޖެޓު އޮންނަން ޖެހޭނީ ފާސް ކުރެވިފައި ކަމަށެވެ.