މެދުއިރުމަތީގެ ހާލަތާ ގުޅިގެން ޖަޕާނުގެ އަސްކަރީ މަތިންދާ ބޯޓެއް ރާއްޖެއަށް އަތުވެއްޖެ

އެމެރިކާއާއި، އިޒްރޭލުން އީރާނަށް ދެމުންދާ ހަމަލާތަކާ އެކު މެދުއިރުމަތީގައި ހިނގަމުންދާ ހަމަނުޖެހުންތައް އިތުރަށް ވަރުގަދަވަމުންދާތީ، ސަރަހައްދުގައި ތިބި ޖަޕާނުގެ ރައްޔިތުން އަނބުރާ ގައުމަށް ގެންދިއުމުގެ މަސައްކަތަށް އެހީތެރިވުމަށްޓަކައި ޖަޕާނުގެ އެއަރ ސެލްފް-ޑިފެންސް ފޯސް (އޭ.އެސް.ޑީ.އެފް) ގެ މަތިންދާބޯޓެއް އާދީއްތަ ދުވަހު ރާއްޖެ އަތުވެއްޖެއެވެ.

ޖަޕާނު ސަރުކާރުން ރައްޔިތުން އަނބުރާ ގެންދިއުމަށް ހަމަޖައްސާފައިވާ ޗާޓަރު ފްލައިޓްތަކަށް ދިމާވެދާނެ ފަންނީ މައްސަލައެއް ނުވަތަ ކުއްލި ހާލަތަކަށް ތައްޔާރުވުމުގެ ގޮތުން، ސެލްފް-ޑިފެންސް ފޯސް (އެސް.ޑީ.އެފް) ގެ މި ބޯޓު އޮންނާނީ ރާއްޖޭގެ އެއާޕޯޓެއްގައި ތައްޔާރީ ހާލަތުގައެވެ.

ޖަޕާނުގެ އައިޗީ ޕްރިފެކްޗަރގެ ކޮމާކީ އެއަރ ބޭހުން އާދީއްތަ ދުވަހުގެ ފަތިހު 2:55 ހާއިރު ފުރި ކޭ.ސީ-767 މަރުކާގެ މި ބޯޓު ރާއްޖެއަށް އައީ ޖަޕާނު ގަޑިން އާދީއްތަ ދުވަހުގެ މެންދުރުފަހުގެ ވަގުތެއްގައެވެ. ޖަޕާނުގެ ޑިފެންސް މިނިސްޓްރީން ބުނި ގޮތުގައި، މެދުއިރުމަތީގެ ގައުމުތަކަށާއި ޔޫރަޕަށް ދަތުރުކުރާ އެސް.ޑީ.އެފްގެ ބޯޓުތަކަށް ތެޔޮ އެޅުމަށާއި އެހެނިހެން ބޭނުންތަކަށް މަޑުކުރާ މަންޒިލްތަކުގެ ތެރޭގައި ރާއްޖެ ހިމެނެއެވެ.

ގާތްގަނޑަކަށް 200 މީހުންގެ ޖާގަ އޮންނަ މި ބޯޓުގައި އެސް.ޑީ.އެފްގެ 30 މުވައްޒަފުން ދަތުރުކުރެއެވެ. މި މިޝަން ކުރިއަށްދާނީ އެއްގަމާއި، ކަނޑާއި، ވައިގެ ސިފައިން ހިމެނޭ އެސް.ޑީ.އެފްގެ ޖޮއިންޓް އޮޕަރޭޝަންސް ކޮމާންޑްގެ ވެރިޔާ، ލެފްޓިނެންޓް ޖެނެރަލް ކެނީޗިރޯ ނަގޫމޯގެ ބެއްލެވުމުގެ ދަށުންނެވެ.

ޖަޕާނުގެ ފޮރިން މިނިސްޓަރު ތޮޝިމިޓްސޫ މޮޓެގީ ހުކުރު ދުވަހު ވަނީ، އެސް.ޑީ.އެފްގެ ގާނޫނުގެ 84 ވަނަ މާއްދާގެ ދަށުން ބޭރު ގައުމުތަކުގައި ތިބި ޖަޕާނު ރައްޔިތުން އުފުލުމަށް ބޭނުންވާ ތައްޔާރީތައްވުމަށް ޑިފެންސް މިނިސްޓަރު ޝިންޖީރޯ ކޮއިޒޫމީގެ ކިބައިން އެދިވަޑައިގެންފައެވެ. އެއާއެކު މިނިސްޓަރު ކޮއިޒޫމީ ވަނީ ނަގޫމޯއަށް އޮޕަރޭޝަނަލް އަމުރެއް ނެރުއްވާފައެވެ.

މީގެ އިތުރުން، މެދުއިރުމަތީގައި ތިބި ޖަޕާނު ރައްޔިތުންނާއި އެމީހުންގެ އާއިލާތައް ގޮވައިގެން އޮމާނުން ފުރި ޖަޕާނު ސަރުކާރުގެ ޗާޓަރު ފްލައިޓެއް އާދީއްތަ ދުވަހުގެ ރޭ ޗީބާ ޕްރިފެކްޗަރގެ ނަރީޓާ އިންޓަނޭޝަނަލް އެއާޕޯޓަށް ޖެއްސުމަށް ވަނީ ހަމަޖެހިފައެވެ. އަދި ހޯމަ ދުވަހު ސައުދީ އަރަބިއްޔާއިން އިތުރު ޗާޓަރު ފްލައިޓެއް ފުރުމަށް ވެސް ވަނީ ތާވަލުކޮށްފައެވެ.

ޗީފް ކެބިނެޓް ސެކްރެޓަރީ ކިހާރާ މިނޯރޫ ހުކުރު ދުވަހު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، އެސް.ޑީ.އެފްގެ މަތިންދާބޯޓު ފޮނުވީ މަސްރަހު އިތުރަށް ގޯސްވެދާނެ ހާލަތަކަށް ނުވަތަ ބޯޓަކަށް ދިމާވެދާނެ ފަންނީ މައްސަލައަކަށް ރިއާޔަތްކޮށް، ރައްކާތެރިކަމުގެ ފިޔަވަޅެއްގެ ގޮތުން ކަމަށެވެ.

ޖަޕާނުގެ ފޮރިން މިނިސްޓްރީން ބުރާސްފަތި ދުވަހު ވަނީ މެދުއިރުމަތީގެ ހަ ގައުމަކަށް ދަތުރުކުރުމުގައި ސަމާލުވުމަށް ނެރޭ އެލާޓް ލެވެލް 3 އަށް މަތިކޮށްފައެވެ. މިއީ އެ ގައުމުގެ ހަތަރު ދަރަޖައިގެ އެލާޓް ނިޒާމުގައި ދެވަނައަށް އެންމެ މަތީ ދަރަޖައެވެ. އަދި އެ ގައުމުތަކަށް ދަތުރު ނުކުރުމަށް ޖަޕާނު ސަރުކާރުން ވަނީ ރައްޔިތުންނަށް އިލްތިމާސްކޮށްފައެވެ.