ޖަޕާނުގެ އިންތިޚާބުގައި ބޮޑު ވަޒީރު ޓަކައިޗީގެ ޕާޓީ އިން ސުޕަ މެޖޯރިޓީ ހޯދައިފި

ޖަޕާނުގައި ކުރިއަށް ދިޔަ އާންމު އިންތިޚާބު ބޮޑު އަޣުލަބިއްޔަތަކުން ކާމިޔަބުކޮށް، އެ ޤައުމުގެ ބޮޑު ވަޒީރު ސަނައޭ ޓަކައިޗީގެ ލިބަރަލް ޑިިމޮކްރަޓީކް ޕާޓީ (އެލްޑީޕީ) އިން ޤާނޫނު ހަދާ މަޖިލީހުގެ ތިރިގެ، ޑައެޓްގެ ސުޕަ މެޖޯރިޓީ ހޯދައިފި އެވެ. 

އާންމު ކޮށްފައިވާ ރަސްމީ ނަތީޖާ ތަކަށް ބަލާއިރު، ތިރިގޭގައި ހިމެނޭ 465 ގޮނޑީގެ ތެރެއިން، ޓަކައިޗީގެ އެލްޑީޕީ އިން ވަނީ 316 ގޮނޑި ކާމިޔާބު ކޮށްފަ އެވެ. މިއީ ސަރުކާރެއް އެކުލަވާލުމަށް ބޭނުންވާ 233 ގޮނޑިއަށް ވުރެ މާ ގިނަ އަދަދެކެވެ. 

އިންތިޚާބުގެ ބޮޑު ކާމިޔާބީއާ ގުޅިގެން ނޫސްވެރިންނާ ވާހަކަ ދައްކަވަމުން ބޮޑު ވަޒީރު ޓަކައިޗީ ވިދާޅުވީ، އެކަމަނާގެ ސަރުކާރުން އަބަދު ވެސް އިސްކަން ދޭނީ ޒިންމާދާރު، އަދި ޚަރުދަނާ މާލީ ސިޔާސަތު ތަކެއް ކުރިއަށް ނެރުމަށް ކަމަށެވެ. އަދި ޤައުމުގެ މާލީ ކަންކަން ދެމެހެއްޓުމަށް އިސްކަންދީ، ޤައުމަށް ބޭނުންވާ މުހިންމު އިންވެސްޓްމަންޓުތައް ކަށަވަރު ކޮށްދެއްވާނެ ކަމަށް ވެސް އެކަމަނާ ވިދާޅުވި އެވެ. 

ފާއިތުވި ހަތް ދިހަ ވަރަކަށް އަހަރުގެ ތެރޭގައި، ގިނަ ދުވަސް ތަކެއް ވަންދެން ޖަޕާނުގައި ވެރިކަން ކުރަމުން އަންނަ އެލްޑީޕީ އަށް، ފހަކަށް އައިސް ވަނީ ފައިސާގެ މައްސަލަ ތަކާއި، ދީނީ ޖަމާއަތްތަކާ ގުޅުން ހުރި ބޮޑެތި ފާޑު ކިޔުންތައް އަމާޒުވެފަ އެވެ. ބޮޑު ވަޒީރު ކަމާ ހަވާލުވެ ވަޑައިގަތްތާ އެންމެ ތިން މަސް ދުވަހުގެ ތެރޭގައި ޓަކައިޗީ ވަނީ ކުއްލި އިންތިޚާބެއް އިއުލާން ކުރައްވައިފަ އެވެ. އެއީ ޕާޓީ އަށް ގެއްލިފައިވާ އިތުބާރު އަލުން ހޯދުމާއި، ސިޔާސީ މަޝްރަހު ބަދަލު ކޮށްލުމުގެ މަޤުސަދުގަ އެވެ. 

މި އިންތިޚާބުގެ ކެމްޕެއިންގެ ތެރޭގައި ޓަކައިޗީ އެންމެ ބޮޑަށް ވެވަޑައިގެންނެވި އެއް ވައުދަކީ، ތަކެތީޣެ އަގު އުފުލުމުގެ ސަބަބުން އާންމުންނަށް ކުރިމަތިވެފައިވާ ދަތި ތަކަށް ޙައްލެއް ހޯދައި ދިނުމުގެ ގޮތުން، ކާބޯ ތަކެތިން ނަގާ އަށް އިންސައްތައިގެ ސޭލްސް ޓެކްސް ކަނޑާލުމެވެ. ނަމަވެސް، ދުނިޔޭގެ ކުރިއަރާފައިވާ ޤައުމު ތަކުގެ ތެރެއިން އެންމެ ދަރަނި ބޮޑު ޤައުމުގެ ގޮތުގައި އޮތް ޖަޕާން އިން މިފަދަ ފިޔަވަޅެއް އެޅުމުން، އެކަމަށް ބޭނުންވާ ފައިސާ ހޯދާނެ ގޮތަކާ މެދު އިންވެސްޓަރުންގެ މެދުގައި ވަނީ ކަންބޮޑުވުން އުފެދިފަ އެވެ. 

އާންމު އިންތިޚާބު ބޭއްވި ދުވަސްވަރަކީ ޖަޕާންގެ ބައެއް ސަރަހައްދު ތަަކަށް ރެކޯޑު މިންވަރަކަށް ސްނޯ ފޭބި ދުވަހެއް ކަމަށް ވިޔަސް، ގިނަ އަދަދެއްގެ ރައްޔިތުން ވަނީ ވޯޓުލާާން ނިކުމެފަ އެވެ. ބައެއް ސަަރަހައްދު ތަކުގައި ދަތުރުފަތުރަށް ހުރަސް އެޅި، ވޯޓުލާ މަރުކަޒުތައް މާ އަވަހަށް ބަންދު ކުރަން ޖެހުނު ނަމަވެސް، އާންމުންގެ ތަރުހީބު ވަނީ އިންތިޚާބަށް ލިބިފަ އެވެ. އެކަމާ ގުޅޭ ގޮތުން ވާހަކަ ދެއްކި ބައެއް އާންމުން ބުނެފައި ވަނީ، ބޮޑު ވަޒީރު ޓަކައިޗީ ޤައުމަށް ދައްކުވައި ދެއްވަނީ އުންމީދީ މިސްރާބެއް ކަމަށެވެ. 

އިންތިޚާބުގެ ނަތީޖާއާ ގުޅޭ ގޮތުން ހޯސެއި ޔުނިވާސިޓީގެ ލެކްޗަރާ ކްރެއިގް މާކް ވިދާޅުވީ، މި ކާމިޔާބީ އަކީ އިދިކޮޅު ޕާޓީ ތަކުގެ އެއްވެސް ދައުރެއް އަދި ބޭނުމެއް ނެތި، ބޭނުންވާ ކޮންމެ ޤާނޫނެއް ފާސް ކުރުމުގެ ބާރު ބޮޑު ވަޒީރު ޓަކައިޗީ އަށް ލިބިފައިވާ ކާމިޔާބެއް ކަމަށެވެ.