ބަންޑާރަ މިސްކިތް ތަޅާނުލުމަށް ގިނަ ބަޔަކު ގޮވާލަނީ، މިނިސްޓަރ ވިދާޅުވީ އެއީ މުޤައްދަސް ތަނެއް ނޫންކަމަށް!

ބަންޑާރަ މިސްކިތް ނުވަތަ މަސްޖިދުއްސުލްތާން މުހައްމަދު ޝަމްސުއްދީން ހުންނަ ބިމުގައި ޒަމާނީ ބޮޑު މިސްކިތެއް އެޅުމަށް ނިންމާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ހާމަ ކުރެއްވުމާ ގުޅިގެން ގިނަ ބައެއްގެ ފާޑުކިއުން އަމާޒުވެއްޖެއެވެ.

އެ ތަނުގައި އާ މިސްކިތެއް އެޅުމުގެ މަސައްކަތް ކުރުމަށް ނިންމާފައި ވަނީ ރޯދަމަހުގެ ފަހުން ކަމަށާއި، އެކަމަށް ބޭނުންވާ އެހީތެރިކަން ދީލަތި ފަރާތަކުން ހަމަޖެހިފައިވާ ކަމަށް މިނިސްޓަރ ވަނީ ހާމަ ކުރައްވާފައެވެ.

އެއާއެކު ވަރަށް ގިނަ ބަޔަކު ގެންދަނީ ސޯޝަލް މީޑީއާގައި އެކަމާ ދެކޮޅަށް އަޑުއުފުލަމުންނެވެ. އެގޮތުން "ސޭވް ބަންޑާރަމިސްކިތް" ނަމުގައި މީސްމީޑީއާ ކެމްޕޭނެއް ވެސް ވަނީ ފަށާފައެވެ.

އެކަމާ ގުޅޭގޮތުން އެކްސްގައި ހިއްސާ ކުރެއްވި ޕޯސްޓެއްގައި ތާރީހު ދިރާސާ ކުރައްވާ ބޭފުޅެއް ކަމަށްވާ ނާޖިހު ދީދީ ވިދާޅުވީ، މިއީ އެއްގޮތަކަށް ވެސް ކޮށްގެންވާނެ ކަމެއް ނޫން ކަމަށެވެ. އަދި ވިދާޅުވީ، އެތަނަކީ ދިވެހިރާއްޖޭގެ ޚާއްޞަ ތާރީޚީ ކަމަކާ ގުޅުން ހުރި އަދި މިހާރު 98 އަހަރުވެފައިވާ  ތަނެއް ކަމަށެވެ.

އޭނާ ވިދާޅުވީ، މިފަދަ ތަނެއް ނައްތާލުމަކީ ތާރީޚަށް ދެވޭނެ އިއާދަނުކުރެވޭ ފަދަ ބޮޑު ގެއްލުމެއް ކަމަށެވެ. އަދި އެއީ ދިވެހިރާއްޖޭގެ ސަގާފީ ތަރިކަ ރައްކާތެރިކުރުމަށް ހަދާފައިވާ ގާނޫނާ ވެސް ޚިލާފުކަމެއްކަން ފާހަގަ ކުރައްވައި އޭނާ ވަނީ އެކަން ނުކުރުމަށް އިސްލާމިކް މިނިސްޓްރީއަށް ގޮވާލާފައެވެ.

އަދި ތަރިކައާ ބެހޭ ވުޒާރާއަށް ވެސް މިކަން ހުއްޓުވުމަށް ގޮވާލާކަމަށް އޭނާ ވިދާޅުވިއެވެ.

މިކަމާ ގުޅިގެން އެންމެ ފުރަތަމަ އިސްލާމިކް މިނިސްޓަރ، އެކްސްގައި ހިއްސާކުރެއްވި ޕޯސްޓުގައި ލިޔުއްވާފައި ވަނީ، މާލެ ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމުގެ މަސައްކަތް ރޯދަމަސް ފަހުން ފެށިގެންދާނެކަމަށެވެ. ނަމަވެސް ފާޑުކިއުންތައް އަމާޒުވާން ފެށުމުން ފަހުން މިނިސްޓަރ ކުރެއްވި ޕޯސްޓުގައި ވަނީ ސަރުކާރުން މަސައްކަތް ކުރަނީ އެތަނުގެ އަސްލު ނުގެއްލޭނެހެން ދިވެހި ސަޤާފަތާ އެއްގޮތަށް ބޮޑު ކުރުމަށް ކަމަށެވެ.

ފާޑުކިޔުންތަކަށް ރައްދު ދެއްވައި މިނިސްޓަރ އެކްސްގައި ހިއްސާ ކުރެއްވި ޕޯސްޓެއްގައި ވިދާޅުވީ، އެތަނަށްވުރެ ދުވަސްވީ މިސްކިތްތައް ވެސް ބޮޑުކޮށް، ޒަމާނީކޮށް އާކޮށްފައިވާ ކަމަށެވެ. އަދި އެތަނުގެ އަސްލު ނުގެއްލޭނެހެން ދިވެހި ސަޤާފަތާ އެއްގޮތަށް ބޮޑު ނުކުރެވެންވީ އެއްވެސް އަސާސެއް ނެތްކަމަށް މިނިސްޓަރ ވިދާޅުވިއެވެ.

މީގެ އިތުރުން، އެއީ މުޤައްދަސް ތަނެއް ނޫން ކަމަށާއި، މުޤައްދަސް ތަންތަންވެސް ބޮޑުކޮށްފައިވާކަމަށް މިނިސްޓަރ ވިދާޅުވިއެވެ.

 ތީ މުޤައްދަސް ތަނެއް ނޫން، މުޤައްދަސް ތަންތަންވެސް އެއޮތީ ބޮޑު ކުރަނީ، އިބްރާހިމްގެފާނު ބިނާކުރި ގެފުޅުވެސް އެވަނީ ތަރައްޤީ ކޮށްފައި، މަސްޖިދުލް ޙަރަމްވެސް މަސްޖިދުލް ނަބަވީވެސް.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު 

މިނިސްޓަރ ވިދާޅުވީ، އެ މިސްކިތަށް މިހާރު 98 އަހަރު ކަމަށާއި، 100 އަހަރު ފުރޭއިރު އެތަން ހުންނަންވާނީ ބޮޑުކޮށްފައި ކަމަށެވެ.

މިނިސްޓަރު ގެ އެ ނިންމެވުމަށް އެކި ފަރާތްތަކުން ގެންދަނީ ފާޑުކިޔަމުންނެވެ. އެގޮތުން ކުރީގެ ނައިބްރައީސް ފައިސަލް ނަސީމް ވިދާޅުވީ، މާލޭގައި 98 އަހަރު ވެފައިވާ ތާރީޚީ މިސްކިތެއް ތަޅާލަން ސަރުކާރުން ނިންމި ނިންމުމަކީ، ކަންބޮޑުވެވަޑައިގަންނަވާ ކަމެއް ކަމަށެވެ. އަދި އެ މިސްކިތަކީ ރާއްޖޭގެ ސަގާފީ، ތާރީޚީ މުހިންމު ބިނާއެއްކަންވެސް ފައިސަލް ފާހަގަ ކުރެއްވިއެވެ.

މިފަދަ ބިނާތައް އަޅުގަނޑުމެންގެ ކުރިއަށް އޮތް ޖީލު ތަކަށް ފެނިގެންދާ ގޮތަށް ބެހެއްޓުމަކީ، ޤައުމިއްޔަތު ދިރުވައި އާލާ ކުރުމާ އެކު، ޒުވާނުން ސަގާފަތާއި ތާރީޚަށް އޮންނަ ލޯބި އިތުރު ކުރުމަށް ކުރެވޭނެ މުހިއްމު މަސައްކަތަކަށް ވާނެ. ބަންޑާރަ މިސްކިތް ހުރި ބިމަކީ ޖާގަ ތަނަވަސް ބިމަކަށް ނުވާއިރު، މާލޭގެ އުތުރު ހާބަރު ރީޑިޒައިން ވެގެންދާއިރު، ޒަމާނީ ފެންވަރުގެ މިސްކިތެއް އެޅުމަށް މި ސަރަހައްދުން ޖާގަ ހޯދުމަކީ މުހިންމު ކަމެއް.

ކުރީގެ ނައިބްރައީސް ފައިސަލް ނަސީމް

މިކަމާ ގުޅޭގޮތުން ޤައުމީ ޔުނިވަރސިޓީގެ ކުރީގެ ޗާންސެލަރ ޑރ ޙަސަން ޙަމީދު އޭނާ ގެ ބްލޮގްގައި ލިއުއްވާފައިވަނީ، މި މިސްކިތަކީ ދިވެހިރާއްޖޭގެ ތާރީޚާ ވަރަށް ބޮޑަށް ގުޅިފައިވާ މިސްކިތެއް ކަމަށެވެ. އޭނާ ވިދާޅުވީ، ދިވެހީން، ސަރުކާރުތަކުން ކުރާ ކަންތައްތަކާ މެދު ވަރަށް ބޮޑަށް ފާރަވެރިވާން ޖެހޭނޭ ކަމަށާއި، ޒަމާނީ ބައެއް މިސްކިތްތަކަކީ މިސްކިތަށް ވުރެ ނައިޓްކްލަބްގެ ސިފަ ޖަހާ ތަންތަން ކަމަށެވެ.

މިކަންކަމުން އެނގެނީ، ދިވެހީން، ސަރުކާރުތަކުން ކުރާ ކަންތައްތަކާ މެދު ވަރަށް ބޮޑަށް ފާރަވެރިވާން ޖެހޭނޭ ކަމެއް. ޒަމާނީ ބައެއް މިސްކިތް އަޅުގަނޑު ދެކެފީމެވެ. މިއިން ބައެއް ތަންތަނަކީ، މިސްކިތަށް ވުރެ ނައިޓްކްލަބްގެ ސިފަ ޖަހާ ތަންތަނެވެ. މަޢާފުކުރައްވާށެވެ! މިސްކިތަށް ޢާއްމުކޮށް ނާރާ ބަޔަކަށް މިސްކިތް ކުރަހަން ހަވާލުކުރީމާ ވަރަށް ޒަމާނީ ވާނެ. ވޭތިވެދިޔަ ދެ އަހަރެއްގެ ތެރޭގައި، ސަރުކާރުގެ ހާމަކޮށްފައިވާ ސިޔާސަތާ ކަނޑައެޅިގެން ޚިލާފު ކަންތައްތައް، އިސްލާމީ ކަންތައްތަކާ ބެހޭ ވުޒާރާއިން ކޮށްފައިވޭ.

ޑރ ޙަސަން ޙަމީދު

ޑރ ޙަސަން ހަމީދު ވިދާޅުވީ، ސަރުކާރުން ހާމަކޮށްފައިވާ ސިޔާސަތާ ކަނޑައެޅިގެން ޚިލާފު ކަންތައްތައް، އިސްލާމީ ކަންތައްތަކާ ބެހޭ ވުޒާރާއިން ވޭތުވެދިޔަ ދެ އަހަރެއްގެ ތެރޭގައި ކޮށްފައިވާ ކަމަށެވެ. އޭގެ ތެރޭގައި ޒަކާތާ ބެހޭ އޮފީހަށް ”ޒަކާތު ހައުސް“ ކިއުމާއި، މަދަރުސާތަކުގައި އިސްލާމް މާއްދާ، އިނގިރޭސި ބަހުން ކިޔަވައިދިނުން އެންމެ ރަނގަޅު ކަމަށް ވަޒީރު ވިދާޅުވުން ހިމެނޭކަމަށް އޭނާ ފާހަގަ ކުރެއްވިއެވެ. 

މީގެ އިތުރުންވެސް ގިނަ ބަޔަކު ގެންދަނީ ބަންޑާރަ މިސްކިތް ފަދަ އާސާރީ ބިނާއެއް ނެތިކޮށްލުމުގެ ބަދަލުގައި، ސަރުކާރުން އެކަމާ މެދު އަލުން ވިސްނުމަށް ގޮވާލަމުންނެވެ.

ހަމައެއާއެކު، ފާޑުކިޔުންތަކަށް އަމާޒުވުމުން މިނިސްޓަރު ގެ ރާގު ބަދަލުވެފައިވާތީވެސް ގިނަ  ބަޔަކު ދަނީ ފާޑުކިޔަމުންނެވެ. އެގޮތުން ރޯދަމަސް ނިންމާފައި ފަށާ ތަނެއްގެ ކުރެހުންވެސް މިހާރު އޮންނާނީ ނިމިފައިކަމަށާއި، އެ ޢާއްމުންނާ ޙިއްޞާކުރުމަށް ވެސް މިކަމުގައި ޝުއޫރު ފާޅުކުރި ބައެއް ފަރާތްތަކުން ބުނެފައިވެއެވެ.