ވަޤުފް އިމާރާތުގެ މަސައްކަތް ފެށުމަށް ތައްޔާރުވާ ކަމަށް ޝަހީމް ވިދާޅުވިތާ އަހަރެއް ފަހުން ބިޑަކާއި ނުލާ 39 މިލިއަން ރުފިޔާ އަށް މަޝްރޫޢު އާރުސީސީ އާ ހަވާލުކޮށްފި
އިސްލާމިކް މިނިސްޓްރީން ދާރުލްއަރުގަމް ވަޤުފު އިމާރާތް އެޅުމުގެ މަސައްކަތް އާރުސީސީ އާ ހަވާލު ކުރީ 39.4 މިލިއަން ރުފިޔާ އަށް
މާލޭގައި އިމާރާތް ކުރުމަށް ހަމަޖެހިފައިވާ ދާރުލްއަރުގަމް ވަގުފް އިމާރާތުގެ މަސައްކަތް ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އާ ހަވާލުކުރުން
ވަޤުފް އިމާރާތުގެ މަސައްކަތް ފެށުމަށް ތައްޔާރުވާ ކަމަށް ޝަހީމް ވިދާޅުވިތާ އަހަރެއް ފަހުން ބިޑަކާއި ނުލާ މަޝްރޫޢު އާރުސީސީ އާ ހަވާލުކޮށްފި އެވެ.
މާލޭގައި އިމާރާތް ކުރުމަށް ހަމަޖެހިފައިވާ ދާރުލްއަރުގަމް ވަގުފް އިމާރާތުގެ މަސައްކަތް، ސަރުކާރުގެ ގިނަ މަޝްރޫއުތައް ދެމުންދާ ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އާ ހަވާލު ކުރީ އާދިއްތަ ދުވަހުއެވެ.
އިސްލާމީ ކަންތައްތަކާ ބެހޭ ވުޒާރާ އިން ކުރިއަށް ގެންދިޔަ މީޑިއާ މައުރަޒު ހުޅުވުމުގެ ރަސްމިއްޔާތުގައި 2024 ވަނަ އަހަރުގެ ޖުލައި މަހުގެ 23 ވަނަ ދުވަހު ވާހަކަ ދައްކަވަމުން ޝަހީމް ވަނީ އޭރު ވަގުފު އިމާރާތްތައް އެޅުމުގެ މަސައްކަތް ފެށުމަށް ތައްޔާރުވަމުންދާ ކަަމަށް ފާހަގަކުރައްވާފައެވެ.
އޭގެ ފަހުން މިހާރު ވަނީ އަހަރަކަށް ވުރެ ގިނަ ދުވަސް ހޭދަވެފައެވެ. އާދިއްތަ ދުވަހު އިސްލާމީ މަރުކަޒުގައި ބޭއްވި ރަސްމިއްޔާތެއްގައި މާލޭގައި އިމާރާތް ކުރުމަށް ހަމަޖެހިފައިވާ ދާރުލްއަރުގަމް ވަގުފް އިމާރާތް އާރުސީސީ އާ ހަވާލު ކުރީ 540 ދުވަހުގެ ތެރޭގައި ނިންމާ ގޮތަށް ބީއެމްއެލްގެ އިސްލާމިކް ފައިނޭސް އިން ހަރަދު ކުރާ ގޮތަށެވެ. މަޝްރޫއުގެ އަގަކީ 39،462،545.08ރ. އެވެ.
މި އެއްބަސްވުމުގައި ސޮއިކުރެއްވީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އާއި އާރްސީސީގެ ޑެޕިއުޓީ މެނޭޖިން ޑިރެކްޓަރު އާދަމް ރަހީމް އެވެ. އެ އެއްބަސްވުމުގައި ސޮއިކުރުމަށް ފަހު ވާހަކަދައްކަވަމުން، ޝަހީމް ވަނީ މި އިމާރާތުން 100 މިލިއަން ރުފިޔާ އާމްދަނީގެ ގޮތުގައި ހޯދުމަށް އަމާޒު ހިފާފައިވާ ކަމަށް ވިދާޅުވެފައެެވެ. ކުރިން އެ ވުޒާރާ އިން ބުނިގޮތުގައި އެ ތަނުން އަހަރަކު މަދުވެގެން 10 މިލިއަން ރުފިޔާ އާމްދަނީގެ ގޮތުގައި ލިބޭނެ ކަަމަށް އަންދާޒާކުރެވެއެވެ.
12 ފްލޯ ހިމެނޭ އެ އިމާރާތުގައި ޒަމާނީ ވަސީލަތްތައް އެކުލެވޭނެ ކަމަށް އިސްލާމިކް މިނިސްޓްރީ އިން ހާމަކޮށްފައިވެއެވެ. އަދި އެ އިމާރާތުގެ ބޭސްމަންޓާއި ގްރައުންޑުގައި ޕާކު ކުރެވޭނެ އިންތިޒާމްތައް ހަމަޖެހިފައި ވާއިރު އެ އިމާރާތުގެ ފުރަތަމަ ފަންގިފިލާ ޚާއްސަކުރުމަށް ހަމަޖެހިފައި ވަނީ ރިސެޕްޝަންގެ ގޮތުގައެވެ.
މީގެ އިތުރުން އެ ތަނުގެ ދެ ވަނަ ފަންގިފިލާ އިން ފެށިގެން 12 ވަނަ ފަންގިފިލާ އާއި ހަމައަށް އޮފީސް ހިންގުމަށާއި އަދި ބައްދަލުވުންތަކަށް ބޭނުން ކުރެވޭނެ އެކި ބައިތައް ހިމެނޭހެން ތަރައްޤީކުރުމަށް ވެސް ވަނީ ނިންމާފައެވެ.
އިމާރާތުގެ ދެވަނަ ފްލޯގައި ކޮންފަރެންސް ހޯލެއް އަދި ފުރަތަމަ ފްލޯއިން ފެށިގެން 12 ވަނަ ފްލޯ އަށް ޒަމާނީ އޮފީސް ބައިތަކާއި މީޓިން ރޫމުތައް ހުންނާނެ ކަމަށް އިސްލާމިކް މިނިސްޓްރީން ބުންޏެވެ.
