ވީއައިއޭ އިން 1 ލައްކަ ޑޮލަރު ފޭރުނު މައްސަލައިގެ ތަހުގީގު ލަސް، އެކަމާ ގުޅޭ ސުވާލު މިހާރު ކުރަން ޖެހޭނީ ފުލުހުންނާ: މިނިސްޓަރު އަމީން
ވެލާނާ އިންޓަނޭޝަނަލް އެއަރޕޯޓުގައި ބޭންކް މުވައްޒަފުންގެ އަތުން ގިނަ އަދަދެއްގެ ޑޮލަރު ފޭރުނު މައްސަލައިގެ ތަހުގީގު ލަސްކަމަށް ޓްރާންސްޕޯޓް މިނިސްޓަރު މުހައްމަދު އަމީން އެއްބަސްވެވަޑައިގެންފި. މިނިސްޓަރު ވިދާޅުވީ މިއީ ސީދާ އެއަރޕޯޓުގެ ސެކިއުރިޓީއާ ގުޅުންހުރި ކަމެއް ނޫން ކަމަށާއި، ފުލުހުން ބަލަމުންދާ މައްސަލައަކަށްވާތީ އިތުރު ތަފްސީލު ދެވެން ނެތް ކަމަށް. މި ހާދިސާގައި ފޭރުނު ފައިސާ ފެނިފައިވޭތޯ ފުލުހުންނާ ތަކުރާރުކޮށް ސުވާލު ކުރުމުން ވެސް އެކަމުގެ އެދެވޭ އަޕްޑޭޓެއް މިހާތަނަށް ދީފައެއް ނުވޭ.
ރައީސް ޑރ. މުހައްމަދު މުއިއްޒުގެ ޓްރާންސްޕޯޓް މިނިސްޓަރު މުހައްމަދު އަމީން | ރައީސް އޮފީސް
ވެލާނާ އިންޓަނޭޝަނަލް އެއަރޕޯޓް (ވީއައިއޭ) ޓަރމިނަލް އެކަކަށް ވަންނަން ދިޔަ ބޭންކެއްގެ ދެ މުވައްޒަފެއްގެ އަތުން، ލައްކަ އަކަށްވުރެ ގިނަ ޑޮލަރު ހުރި ސޫޓް ކޭސް އެއް ފޭރިގަތް މައްސަލަ ކުރިއަށް ދަނީ ލަސް ކޮށް ކަމަށް ގަބޫލު ކުރައްވާ ކަމަށް ރައީސް ޑރ. މުހައްމަދު މުއިއްޒުގެ ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.
ވީއައިއޭ އިން މި ފައިސާ ފޭރުނީ މިދިޔަ 2025 ވަނަ އަހަރުގެ އޮކްޓޫބަރު މަހުގެ 27 ވަނަ ދުވަހު އެވެ. އެ މައްސަލަ ފުލުހުންނަށް ރިޕޯޓު ކޮށްފައި ވަނީ އެ ދުވަހުގެ ފަތިހު 4:45 ގައި ކަމަށް ފުލުހުން ވަނީ ބުނެފަ އެވެ. އެ ދުވަހުގެ 09:00 ގައި އޮތް މަޖިލީހުގެ ޖަލްސާއަށް މިިނިސްޓަރު ހާޒިރުވެ ވަޑައިގެންފައިވާ އިރު އެކަމާ ގުޅިގެން ސުވާލު ކުރުމުން މިނިސްޓަރު ވިދާޅުވީ އެކަމުގެ މައުލޫމާތު ލިބިވަޑައިގެންފައި ނުވާ ކަމަށެވެ.
އެއަރޕޯޓުގެ ސެކިއުރިޓީ ވަރުގަދަ ކޮށްފައިވާ ކަމަށް ސަރުކާރުން އެތައް ފަހަރެއްގެ މަތިން ބުނެފައި ވާއިރުވެސް އެއަރޕޯޓަށް ވަންނަން ދަނިކޮށް ފައިސާ ސޫޓް ކޭސްއެއް ފޭރިގަނެ، އަދި އެކަން ހިނގައި އެތައް އިރެއް ވި އިރުވެސް މިނިސްޓަރަށް އެކަމުގެ މައުލޫމާތު ލިބިފައި ނުވާ ސަބަބާ ގުޅިގެން ރާއްޖެޓީވީން ވަނީ މިނިސްޓަރާ ސުވާލު ކޮށްފަ އެވެ.
އެ ސުވާލަށް ޖަވާބުދެއްވައި މިނިސްޓަރު އަމީން ވިދާޅުވީ އެ މައްސަލަ މިހާރު ބަލަމުން ދަނީ ފުލުހުން ކަމަށެވެ. އަދި އެކަމަކީ ހިނގައިގެން ވާނެ ކަމެއް ނޫން ކަމަށާ އެ މައްސަލަ ދަނީ ލަސްކޮށް ކަން ވެސް ގަބޫލު ކުރައްވާ ކަމަށެވެ.
އެ މައްސަލަ މިހާރު ބަލަމުން ދަނީ ޕޮލިހުން. އެހެންވީމަ ޕޮލިހުން މިހާރު ބަލަމުން ގެންދާ މައްސަލައެއް އަޅުގަނޑު ސްޕެސިފިކް ކޮށް އެއްޗެއް މިވަގު ދަންނަވައިފިއްޔާ އޭގަ ނުކުމެދާނެ ބައެއް ކަންތައްތަކެއް އެބަހުރި. އަޅުގަނޑު ވެސް ގަބޫލު ކުރަން ދާންވީ ސްޕީޑަށް ވުރެ ދަށް، ސަބަބުތަކެއް ވެސް ހުރުން އެކަށީގެންވޭ. އަޅުގަނޑަށް ރަނގަޅީ ތި ސުވާލު ޕޮލިހުންނާ، ނޫނީ ހޯމް މިނިސްޓްރީގެ ޕްރެސްގައި އެއްސެވިއްޔާ.ރައީސް ޑރ. މުހައްމަދު މުއިއްޒުގެ ޓްރާންސްޕޯޓް މިނިސްޓަރު މުހައްމަދު އަމީން
މިނިސްޓަރު އަމީން ވިދާޅުވީ އެހެންކަމުން ސީދާ ސެކިއުރިޓީ އާ ގުޅިގެން ވެސް އެއްޗެއް ދަންނަވަން މިވަގުތު އުނދަގޫ ކަމަށެވެ. އަދި މިއީ ސީދާ އެއަރޕޯޓް ސެކިއުރިޓީ އާ ގުޅުން އޮތް މައްސަލައެއް ނޫން ކަމަށް ވެސް މިނިސްޓަރު ވިދާޅުވި އެވެ.
އަމީން ވިދާޅުވީ އެއަރޕޯޓުގައި ދިމާވާ ކޮންމެ ކަމަކީ އެއަރޕޯޓްގެ ޓޯޓަލް ސެކިއުރިޓީ އާ ވެސް ސުވާލު އުފެދޭ ކަންކަން ނޫން ކަމަށެވެ.
އެއަރޕޯޓަށް ވަދެ, ބީއެމްއެލް ގެ މުވައްޒަފުން އަތުން ގިނަ އަދަދެއް ގެ ޑޮލަރު ތަކެއް ފޭރުނު މައްސަލާގައި ޑޮލަރުތައް ފެނިފައިވޭތޯ ތިން ފަހަރު މަތިން ފުލުހުންނާ ސުވާލުކުރުމުން ވެސް ފުލުހުން ބުނީ އެކަމުގެ އަޕްޑޭޓެއް ނެތް ކަމަށެވެ.
