ބިދޭސީއަކު މަރާލުން: ޤިސާސް ހިފަން ބޭނުންނުވާކަމަށް 5 އަހަރުކުރިން ވާރިސުން ބުނެފައިވީނަމަވެސް، ދިފާއުން އެދެނީ އަލުން ވާރިސުންގެ ބަސް ނަގަން!
ދިފާއީ ވަކީލު ވިދާޅުވީ، ދިފާއުން އެދެނީ މިހާރު ވާރިސުން އެދޭ ގޮތް އިތުރަށް ޔަޤީން ކުރުމަށް ކޯޓުން އެ ފަރާތްތަކުގެ ބަސް ނެގުމަށް ކަމަށް. އަދި އެގޮތަށް އެދޭ ސަބަބަކީ މިއީ ފަހުގެ މަރުޙަލާތަކަށް ވެސް ދާނެ މައްސަލައަކަށްވާތީ ހުރިހާ އިޖުރާއަތު އެންމެ ފުރިހަމައަށް ގެންދިއުމަށްކަމަށް.
ބަންގްލަދޭޝްގެ ރައްޔިތެއް ކަމުގައިވާ މުހައްމަދު ޝާހީން މަރާލުމުގެ ކުށުގެ ދައުވާ އުފުލާފައިވަނީ ބަންގްލަދޭޝްގެ އެހެން ރައްޔިތެއް ކަމުގައިވާ މުހައްމަދު މަސްއޫދުގެ މައްޗަށް | ރާއްޖެ އެމްވީ
މަސް ދޯންޏެއްގައި މާރާމާރީ ހިންގާ ބިދޭސީއަކު މަރާލި މައްސަލައިގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ބުރާސްފަތި ދުވަހުގެ މި އަޑުއެހުމަކީ މައްސަލައިގެ ޙުކުމް ކުރެއްވުމަށް ބޭއްވި އަޑުއެހުމެކެވެ.
މި މައްސަލައިގަ ބަންގްލަދޭޝްގެ ރައްޔިތެއް ކަމުގައިވާ މުހައްމަދު ޝާހީން މަރާލުމުގެ ކުށުގެ ދައުވާ އުފުލާފައިވަނީ ބަންގްލަދޭޝްގެ އެހެން ރައްޔިތެއް ކަމުގައިވާ މުހައްމަދު މަސްއޫދުގެ މައްޗަށެވެ. އެގޮތުން މައްސަލައާ ގުޅިގެން އޭނާ ގެ މައްޗަށް އުފުލީ ޤަޞްދުގައި މީހަކު މެރުމުގެ ކުށުގެ ދަޢުވާއެވެ.
އެ ދައުވާ ސާބިތުވެފައިވާކަމަށް މި މައްސަލައިގައި އެންމެ ފަހުން ބޭއްވި އަޑުއެހުމުގައި ވަނީ ކަނޑައަޅާފައެވެ. އޭނާގެ މައްޗަށް ޤަސްދުގައި މީހެއްގެ މަރު ސާބިތުވިނަމަވެސް މި މައްސަލައިގައި ވާރިސުން އެދިފައިވަނީ ހަމައެކަނި މަރުގެ ދިޔަ ނަގައިދިނުމަށެވެ.
މައްސަލަ ބައްލަވާ ގާޒީ އެ ދުވަހު ވިދާޅުވީ، ނިޔާވި މީހާގެ ދެ ވާރިސަކު އެބަ ތިބި ކަމަށާއި، ބަންގްލަދޭޝްގެ ހައިކޮމިޝަން މެދުވެރިކޮށް މިހާރު ވާރިސުން ފޮނުވާފައިވާ ލިއުމުގައި ވަނީ އެމީހުން ބޭނުންވަނީ މަރުގެ ދިޔަ ކަމަށެވެ. އަދި މަސްއޫދަށް ޖަލުގެ އަދަބު ދޭން އެމީހުން ބޭނުން ނުވާކަމަށްވެސް ބުނެފައިވެއެވެ. އޭނާ ގެ ވާރިސުންނަކީ އޭނާ ގެ މަންމައާއި ބައްޕައެވެ.
އެ ލިއުމަކީ ވަކީލަކު މެދުވެރިކޮށް "ނޮޓޮރައިޒް" ވެސް ކޮށްފައިވާ ލިއުމެއްކަން ގާޒީ ފާހަގަ ކުރެއްވިއެވެ.
އެހެންކަމުން ބުރާސްފަތި ދުވަހުގެ މި އަޑުއެހުމަކީ މައްސަލައިގެ އަދަބު ކަނޑައެޅުމަށް ބޭއްވި އަޑުއެހުމެކެވެ.
މި އަޑުއެހުމުގައި ދިފާއީ ވަކީލު ވިދާޅުވީ، ދިފާއުން އެދެނީ މިހާރު ވާރިސުން އެދޭ ގޮތް އިތުރަށް ޔަޤީން ކުރުމަށް ކޯޓުން އެ ފަރާތްތަކުގެ ބަސް ނެގުމަށް ކަމަށެވެ. އަދި އެގޮތަށް އެދޭ ސަބަބަކީ މިއީ ފަހުގެ މަރުޙަލާތަކަށްވެސް ދާނެ މައްސަލައަކަށްވާތީ ހުރިހާ އިޖުރާއަތު އެންމެ ފުރިހަމައަށް ގެންދިއުމަށްކަމަށްވެސް ވަކީލު ވިދާޅުވިއެވެ. މިހާރު އޮތް ލިއުމަކީ 2021 ގެ ލިއުމެއްކަންވެސް ވަކީލު ފާހަގަ ކުރެއްވިއެވެ.
ހަމައެއާއެކު، މަރުގެ ދިޔަ މިހާރު އެމީހުން ބޭނުން ނުވުމުގެ ފުރުސަތުވެސް އެބައޮތްކަމަށް ވަކީލު ވިދާޅުވިއެވެ.
އެހިސާބުން ގާޒީ ވިދާޅުވީ، މިހާރު ވާރިސުންގެ ބަސް އޮތީ ދައުވާލިބޭ މީހާގެ މަސްލަހަތާ އެއްކޮށް ކަމަށާއި، އަލުން ވާރިސުންގެ ބަސް ނަގާއިރު އެމީހުން މަރަށް މަރު ހިފަން އަލުން ބޭނުންވުމަކީ ވެސް ވެދާނެ ގޮތެއް ކަމަށެވެ. ދައުލަތުގެ ވަކީލުވެސް އެ ވާހަކަ ތަކުރާރު ކުރެއްވިއެވެ.
އެހެންނަމަވެސް ދިފާއީ ވަކީލު ވިދާޅުވީ، މިހާރު އޮތް ގޮތުން ފަހުންވެސް ވާރިސުންނަށް މަރަށް މަރު ހިފަން ބޭނުންވާކަމަށް އެދުމުގެ ފުރުސަތު އޮންނާނެ ކަމަށާއި، އެހެންކަމުން ނިހާއީ ޙުކުމަކަށްދާއިރު، ވާރިސުންގެ ބަސް ސާފުކޮށް ނެގުމަކީ ތުހުމަތު ކުރެވޭ މީހާއަށް އެންމެ އިންސާފުވެރި ގޮތް ކަމަށެވެ.
އެ ހުރިހާ ވާހަކަތައް ތަރުޖަމާ ކޮށްދިނުމުން ދައުވާލިބޭ މަސްއޫދުވެސް ބުނީ އޭނާވެސް ބޭނުންވަނީ ވާރިސުންގެ މިހާރުގެ ބަސް ނެގުމަށް ކަމަށެވެ. އަދި 5 އަހަރުވެގެންދާއިރު މައްސަލަ ނިންމުން މިހާ ލަސްވެފައިވާތީ އޭނާ ވަނީ މި އަޑުއެހުމުގައި ނުރުހުން ފާޅުކޮށްފައެވެ. އަދި އެ މައްސަލަ މިހާރު ބައްލަވާ ގާޒީ ވަނީ އެކަމަށް މާފަށް ވެސް އެދިފައިވެއެވެ.
އެހެންކަމުން ގާޒީ ވަނީ ވާރިސުންގެ ކިބައިން ދިފާއުން ސާފުކުރަން ބޭނުންވާ ކަންކަން ލިއުމުން ކޯޓަށް ހުށަހެޅުމަށް އަންގަވާފައެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިބްރާހިމް އިޙްސާންއެވެ.
