110 މީހުންގެ އުމްރާ ދަތުރު ކެންސަލްކުރި މައްސަލައިގައި އަލް އަބްރާރު ކުންފުނީގެ ހުއްދަ ވަގުތީ ގޮތުން ހިފަހައްޓައިފި
މަގުބޫލު ސަބަބެއް ނެތި 110 މީހުންގެ އުމްރާ ދަތުރު ކެންސަލްކުރި މައްސަލައިގައި، އުސޫލާ ހިލާފުވެފައިވާތީ އަލް އަބްރާރް ގްރޫޕުގެ ހުއްދަ އިސްލާމިކް މިނިސްޓްރީން ވަގުތީ ގޮތުން ވަނީ ހިފަހައްޓާފައި. މި މައްސަލަ އިތުރަށް ތަހުގީގުކޮށް ފިޔަވަޅު އަޅާނެކަމަށް މިނިސްޓްރީން ބުނެފައިވޭ. އަދި ނުފުރި ތިބި މީހުންނަށް އެހީތެރިވުމުގެ މަސައްކަތް ކުރަމުންދާ ކަމަށާއި، މިހާތަނަށް 28 މީހަކަށް ހައްޖު ކޯޕަރޭޝަން މެދުވެރިކޮށް އުމްރާއަށް ދިއުމަށް ފުރުސަތު ފަހިކޮށްދީފައިވާ ކަމަށް މިނިސްޓްރީން ބުނޭ.
އިސްލާމިކް މިނިސްޓްރީ. މި މައްސަލަ އިތުރަށް ތަހުގީގުކޮށް ފިޔަވަޅު އަޅާނެކަމަށް މިނިސްޓްރީން ބުނެފައިވޭ. | ރާއްޖެއެމްވީ
އަލް އަބްރާރް ހައްޖު އަދި އުމްރާ ގްރޫޕުގެ ހަވާލުގައި އުމްރާއަށް ދިއުމަށް ފައިސާ ދެއްކި 110 މީހުންގެ ދަތުރު ފަހުވަގުތު ކެންސަލް ކުރި މައްސަލައިގައި އެ ކުންފުނީގެ ހުއްދަ ވަގުތީ ގޮތުން ހިފަހައްޓައިފި އެވެ.
އިސްލާމިކް މިނިސްޓްރީން ބުނީ، އެކުންފުނިން 3 މާރިޗް 2026 ން 26 މާރިޗް 2026 ނިޔަލަށް (ރަމަޟާން އުމްރާ) ކުރުމަށް ހަމަޖައްސާފައިވާ އުމްރާ ދަތުރަށް ސައުދީ އަރަބިއްޔާއަށް ފުރުމަށް އެންމެ ފަހުގެ ތައްޔާރީތައް ވަމުންދަނިކޮށް އެ ދަތުރު ކެންސަލް ކޮށްފައިވާ ކަމުގެ ޝަކުވާ މިނިސްޓްރީއަށް ލިބުމާއި ގުޅިގެން މިމައްސަލައިގައި މިހާތަނަށް ސާފުކުރި މައުލޫމާތުތަކަށް ބަލާއިރު، އެކުންފުނިން އިސްވެ ބަޔާން ކުރެވުނު މުއްދަތުގައި ފުރަން އޮތް އުމްރާ ދަތުރު ކެންސަލް ކޮށްފައިވަނީ މަގުބޫލު އެއްވެސް ސަބަބެއް ނެތި، ދިވެހިރާއްޖެއިން އުމްރާއަށް މީހުން ގެންދިއުމާ ބެހޭ އުސޫލާ ހިލާފަށް ކަމަށެވެ.
މި ސަބަބަށްޓަކައި އަލް އަބްރާރް ހައްޖު އަދި އުމްރާ ގްރޫޕަށް ދޫކުރެވިފައިވާ ރާއްޖެއިން މީހުން އުމްރާއަށް ގެންދިއުމާބެހޭ ހުއްދަ ވަގުތީ ގޮތުން ހިފަހައްޓައި އެކަން އެ ކުންފުންޏަށް އަންގާފައިވާ ކަަމަށް މިނިސްޓްރީން ބުނެ އެވެ. އަދި މިކަމާ ގުޅޭގޮތުން އިތުރަށް ސާފު ކުރަންޖެހޭ މައުލޫމާތުތަކާއި ބަލަންޖެހޭ ކަންކަން ބެލުމަށްފަހު އުސޫލުގެ ތެރެއިން އަޅަންޖެހޭ ފިޔަވަޅުތައް ކުންފުންޏާ ދެކޮޅަށް އަޅާނެ ކަމަށް އިސްލާމިކް މިނިސްޓްރީން ބުނެ އެވެ.
މީގެ އިތުރުން އިސްލާމިކް މިނިސްޓްރީން ބުނީ، މި މައްސަލައާ ގުޅިގެން އެ ކުންފުނީގެ އުމްރާވެރިންގެ ތެރެއިން މިހާތަނަށް އުމްރާގެ އަޅުކަމަށް ނުފުރިތިބި އުމްރާވެރިންނަށް އެހީތެރިކަން ފޯރުކޮށްދެވެންހުރި ގޮތްތަކަކީ ކޮބައިތޯ ބަލައި އެ ޚިދުމަތްތައް ފަހިކޮށްދިނުމުގެ މަސައްކަތް ކުރަމުންދާ ކަަމަށެވެ.
އެގޮތުން އަލް އަބްރާރް ގުރޫޕުގެ ހަވާލުގައި އުމްރާ އަށް ފުރުމަށް ހަމަޖެހުނު މީހުންގެ ތެރެއިން ނުފުރުނު 28 މީހަކަށް ހައްޖު ކޯޕަރޭޝަނުން ޖާގަ ހަމަޖައްސައިދީފައިވެ އެވެ.
