ވެލާނާ އިންޓަނޭޝަނަލް އެއާޕޯޓަށް ވަދެ, ބީއެމްއެލް ގެ މުވައްޒަފުން އަތުން ގިނަ އަދަދެއް ގެ ޑޮލަރު ތަކެއް ފޭރުނު މައްސަލާގައި ޑޮލަރުތައް ފެނިފައިވޭތޯ ސުވާލުކުރުމުން އެކަމުގެ އަޕްޑޭޓެއް ނެތް ކަމަށް ފުލުހުން ބުނެފި އެވެ.

މި ދިޔަ އޮކްޓޫބަރު މަހު ގެ 27 ވަނަ ދުވަހުގެ ފަތިހު 4:45 ހާއިރު ވެލާނާ އިންޓަރނޭޝަނަލް އެއަރޕޯޓު ޓަރމިނަލް އެކަކަށް ވަންނަން ދިޔަ ބޭންކެއްގެ ދެ މުވައްޒަފެއްގެ އަތުން ފައިސާ ހުރި ސޫޓް ކޭހެއް ފޭރިގަތް މައްސަލައެއް ވަނީ ފެންމަތިވެފަ އެވެ.

ފުލުހުން ބުނީ އެމީހުންނަށް ބިރު ދައްކައި، ފައިސާ ހުރި ސޫޓް ކޭސް ފޭރިގަނެފައިވަނީ މޫނު ނިވާކޮށްގެން ތިބި ބައެއް ކަމަށެވެ.

ފޭރިގަނެފައިވާ ސޫޓްކޭސް ގައި 130،000 ޑޮލަރު ހުރިކަމަށް މައުލޫމާތު ލިބެ އެވެ. އަދި އެ ފައިސާ އަކީ ރާއްޖެއިން ބޭރަށް ފުރާ މީހުންނަށް އާ ޓާމިނަލްގެ ކައުންޓަރުން އެ ދުވަހު ދޫކުރަން ހަމަޖެހިފައިވާ ޑޮލަރެވެ.

މި މައްސަލައާއި ގުޅިގެން ފުލުހުން ވަނީ 4 މީހަކު ވެސް ހައްޔަރު ކޮށްފަ އެވެ. އެ މީހުންނަކީ ލ. މާވަށް / ރޭޝަމް، މާޒިން މޫސާ (25އ) އާއި މާލެ / މ. ކޯރަސް، އަޙްމަދު ރައިހާން ނަޢީމް (20އ)، ކ. ގުރައިދޫ / އަޅިވިލާގެ، އިބްރާހީމް އަނޫފް (24އ) އަދި ކ. ގުރައިދޫ / އަޅިވިލާގެ، ޙުސައިން ޝަހުދު (30އ) އެވެ.

ފޭރުނު ސޫޓޫ ކޭހުގައި ހުރި ޑޮލަރުގެ އަދަދު ލައްކައަކަށް ވުރެ ގިނަ އެވެ. މިހާތަނަށް އައި އިރު ގެއްލިފައިވާ ފައިސާއާ ގުޅޭގޮތުން ފުލުހުން އެއްޗެއް ބުނެފައި ނުވެ އެވެ. މީގެ ކުރިން އެކި ފަހަރު މަތިން އެހުމުން ވެސް ފުލުހުން ބުނީ އަދި މީޑިއާ އާ މިވަގުތު ހިއްސާ ކުރާނެ އިތުރު މައުލޫމާތެއް ނެތް ކަމަށެވެ.

އޭގެ ފަހުން ގާތްގަނޑަކަށް މަސް ދުވަސް ފާއިތުވެފައިވާއިރު ރާއްޖެއެމްވީ އިން އެ ފައިސާ ފެނިފައިވޭތޯ ފުލުހުންނާ ސުވާލު ކުރުމުން ފުލުހުންގެ މީޑިއާ އޮފިޝަލް ވިދާޅުވީ އެ މައްސަލައިގެ "އަޕްޑޭޓެއް ނެތް" ކަމަށެވެ.

މިފަދަ މައްސަލަތަކުގައި ފުލުހުން ކުރަންޖެހޭ ތަހުގީގުތައް ކުރިއަށް ގެންދިއުމުގައި ހުރި ލަސްކަމާއި، ފުލުހުންގެ މައްޗަށް ތުހުމަތުކުރެވޭ މައްސަލަތަކުގައި އިންސާފު ހޯދުމުގައި ހުރި ދަތިތަކާ ގުޅިގެން ގިނަ ބަޔަކު ދަނީ ކަންބޮޑުން ފާޅު ކުރަމުންނެވެ.

އެއާއެކު ފުލުހުން ވަނީ އެ މުއައްސަސާގެ އިތުބާރު ގެއްލުވާލަން ފުރުސަތު ނުދޭނެ ކަމަށް ވެސް ބުނެފަ އެވެ. ނަމަވެސް ފުލުހުންގެ ބަޔާންތަކުގައި ފާހަގަ ކުރާ ކަންކަމާ ރައްޔިތުންނަށް ދޭ ޔަގީން ކަމަށް މިހާރު އެއްވެސް ރައްޔިތަކު އިތުބާރު ނުކުރާ ކަމަށް ވެސް ގިނަ ބަޔަކު ދަނީ ބުނަމުންނެވެ.