ޝަރުތު ހަމަ ނުވެގެން ލިސްޓުން ކެންސަލްވި މީހުންގެ އަދަދު މިނިސްޓަރަށް މިއަދުވެސް ވިދާޅުވެނުދެއްވުނު

ގެދޮރުވެރިޔާ ފްލެޓުން ޝަރުތު ހަމަނުވާ ފަރާތްތައް އުނިކުރުމުގެ މަސައްކަތް ކުރިއަށް ގެންގޮސްފައިވާނެކަމަށާއި، ނަމަވެސް މިހާތަނަށް އުނިވެފައިވަނީ ކިހާ މީހުންނެއްކަން މިވަގުތު އެނގިވަޑައިނުގަންނަވާކަމަށް ކޮންސްޓްރަކްޝަން މިނިސްޓަރ ޑރ އަބްދުﷲ މުއްތަލިބު ވިދާޅުވެއްޖެއެވެ.

ބުދަ ދުވަހު އޮތް ނޫސްވެރިންގެ ބައްދަލުވުމުގައި މިނިސްޓަރ ވިދާޅުވީ، ސަރުކާރުން ނިންމާފައިވަނީ މިދިޔަ ސަރުކާރުގައި ދޫކުރި ލިސްޓާ އެއްގޮތަށް ފްލެޓުތައް ޙަވާލު ކުރުމަށް ކަމަށާއި، އޭގެ ތެރެއިން އުނިވެގެންދާނީ ހަމައެކަނި ޝަރުތު ހަމަނުވާ ފަރާތްތައް އެކަނި ކަމަށެވެ. އަދި އެގޮތުގެ މަތިން ފްލެޓުތައް ހަވާލު ކުރުމުގެ މަސައްކަތް ކުރިއަށްދާކަން މިނިސްޓަރ ފާހަގަ ކުރެއްވިއެވެ.

ވީއިރު، ޝަރުތު ހަމަނުވެގެން  ފްލެޓު ލިސްޓުން އުނިވެފައިވަނީ ކިހާ މީހުންނެއްތޯ ރާއްޖެޓީވީން ސުވާލު ކުރުމުން މިނިސްޓަރ ވިދާޅުވީ، މިހާތަނަށް ސަރުކާރުން ފްލެޓުތައް ހަވާލު ކުރަމުންދަނީ މިދިޔަ ސަރުކާރުގައި އާންމު ކުރި ލިސްޓުގައި ފްލެޓު ލިބޭނެކަމަށް ކަނޑައަޅާފައިވާ ފަރާތްތަކަށް ކަމަށެވެ.

އަދި ކަނޑައެޅިފައިވާ އަދަދަށްވުރެ މަދުން ޕޮއިންޓު ލިބިފައިވާ އެއްވެސް ފަރާތެއް ލިސްޓުގައި ހިމެނިފައިނުވާނެކަމަށްވެސް މިނިސްޓަރ ވިދާޅުވިއެވެ.

އެހެންނަމަވެސް، ފްލެޓު ހުރި އަދަދަށްވުރެ ގިނައިން ޝަރުތު ހަމަވާ މީހުން ތިބޭއިރު ކޮންމެވެސް ބަޔަކު ބާކީވެސް ވާނެކަމަށް މިނިސްޓަރ ވިދާޅުވިއެވެ.

 އެހެންކަމުން ޝަރުތު ހަމަނުވާ ފަރާތްތައް އުނިކުރުމުގެ މަސައްކަތް ކުރިއަށް ގެންގޮސްފައިވާނެކަމަށް މިނިސްޓަރ ވިދާޅުވިއެވެ. ނަމަވެސް މިހާތަނަށް އުނިވެފައިވަނީ ކިހާ މީހުންނެއްކަން މިނިސްޓަރަށް ވިދާޅެއް ނުވެވުނެވެ.

މިނިސްޓަރ ވިދާޅުވީ އެ އަދަދު ޗެކް ކުރެއްވުމަށްފަހު ފަހުން ޖަވާބެއް ދެއްވާނެ ކަމަށެވެ.

  ދެން އެހެންވިމާ އެއަށްވުރެ ގިނައިން ލިސްޓުގައި ހިމެނިފައިވަންޏާ ކޮންމެވެސް ބަޔަކު ބާކީ ވާނެތާ، އެހެންވެ އަޅުގަނޑުމެން ބެލީ 76 އަކަށްވުރެ މަތިން ޕޮއިންޓު ލިބުނު ފަރާތްތަކަށްވެސް ނުދެވި ހުރުމާއެކު ޝަރުތު ހަމަނުވާ ފަރާތެއް ވާނަމަ އެ ބަޔަކު އުނިކުރަން، އޭގޮތުން ވަރަށް ސްޕެސިފިކް ކަންކަމުގައި ޝަރުތު ހަމަ ނުވާކަމަށް ކަނޑައަޅާފައިވާނީ.

ކޮންސްޓްރަކްޝަން މިނިސްޓަރ ޑރ އަބްދުﷲ މުއްތަލިބު

މިނިސްޓަރ އިތުރަށް ވިދާޅުވީ، ޝަރުތު ހަމަނުވެގެން ބަޔަކު ކެންސަލްވިނަމަވެސް، މި ސަރުކާރުން އެ ލިސްޓަށް ބަދަލެއް ނުގެންނާތީ އައު ލިސްޓެއް އިއުލާނު ކުރާކަށް ނުޖެހޭނެ ކަމަށެވެ.

ޝަރުތު ހަމަނުވެގެން އުނިކުރެވުނު މީހުންގެ އަދަދާ ގުޅޭގޮތުން މީގެ ކުރިންވެސް  މިނިސްޓަރަށް ސުވާލު އަމާޒުވުމުން މިނިސްޓަރ ވަނީ އެކަން ސާފު ކުރައްވާނެކަމަށް ވިދާޅުވެފައެވެ.