ރައްޔިތުންނަށް ދޮގާއި އޮޅުވާލުމުން، މުއިއްޒުގެ ރައީސްކަމުގެ ޝަރުޢީ އަދި ޤާނޫނީ ހައިސިއްޔަތާމެދު ސުވާލު އުފެދޭ: މައުރޫފު
ރައީސް މުހައްމަދު މުއިއްޒުގެ ރައީސްކަމުގެ ޝަރުޢީ އަދި ޤާނޫނީ ހައިސިއްޔަތާމެދު ސުވާލު އުފެދެމުންދޭ
ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު
މިހާރުގެ ސަރުކާރުން ރައްޔިތުންނަށް އޮޅުވާލާއި، ދޮގާއި މަކަރު ހަދާފައިވާ ކަމަށާއި، އެހެންކަމުން މިއަދު ރައީސް ޑރ. މުހައްމަދު މުއިއްޒުގެ ރައީސްކަމުގެ ޝަރުޢީ އަދި ޤާނޫނީ ހައިސިއްޔަތާމެދު ސުވާލު އުފެދޭ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެ އެވެ.
"ލޫޓުވައިފި ލޫޓުވައިފި" މިނަމުގައި ހައުސިން މިނިސްޓްރީ ކައިރީގައި އެމްޑީޕީން ކުރިއަށްގެންދިޔަ އެއްވުމުގައި ވާހަކަ ދައްކަަވަމުން މައުރޫފު ވިދާޅުވީ، ރައީސް މުއިއްޒު ވެރިކަމަށް ވަޑައިގެންނެވުމަށް ރައްޔިތުންނަށް ވައުދުތަކެއް ވެފައި ކަމަށާއި ނަމަވެސް މިއަދު އެވައުދުތައް ވެވަޑައިގެންނެވި ކަމަށްވެސް އެމަނިކުފާނު އެއްބަސްވެވަޑައިނުގަންނަވާ ކަމަށެ އެވެ. އަދި ވެރިކަމަށް ވަޑައިގެންނެވި އިރު ފްލެޓްތަކާއި ގޯތިތައް، ލިބިފައިވާ ތަނަކުން ދޭނެ ކަމަށް ވިދާޅުވެ ވައުދުވުމަށްފަހު، ވެރިކަމުގެ ހުވާ ކުރެއްވުމަށްފަހު އެހުރިހާ ކަމެއް ބަދަލުކޮށް ރައްޔިތުން ގަނަ ތަޅުވައިފި ކަމަށެ އެވެ.
މިކަމުގެ އެންމެ ބޮޑު ހެއްކެއްގެ ގޮތުގައި ފާހަގަކުރެވެނީ ސޯޝަލް ހައުސިންގ ފްލެޓްތަކާ ގުޅޭ މައްސަލައެވެ. ސަރުކާރުން ފުރަތަމަ، އެމްޑީޕީ ސަރުކާރުގެ ފްލެޓް ދޫކުރުމުގެ ލިސްޓަށް ފާޑުކިޔައި، އެއީ ގޯސްކޮށް ކޮށްފައިވާ ކަމެއްކަމަށް ބުނެ ރައްޔިތުންނަށް އެތައް ތަކުލީފެއް ޖެއްސުމަށްފަހު، ފަހުން އެ ލިސްޓަކީ ރަނގަޅު ލިސްޓެއްކަމަށް ބުނެ، 3000 އަށްވުރެ ގިނަ ރައްޔިތުންނަށް ފްލެޓް ދޫކޮށް ސޮއިކުރުވާފައިވާ ކަމަށް މައުރޫފު ވިދާޅުވި އެވެ.
މި ހުރިހާ ކަމަކުން ދޭހަވަނީ ރައީސް މުއިއްޒުއަކީ ރައްޔިތުންނަށް ދޮގު ވަޢުދުތަކާއި އޮޅުވާލުންތަކުގެ މައްޗަށް ބިނާކޮށް ވެރިކަމަށް ވަޑައިގެންނެވި ބޭފުޅެއް ކަމަށާއި، މިފަދަ ގޮތަކަށް ވެރިކަމަށް އައުމަކީ ޤާނޫނީ އަދި ޝަރުޢީ ގޮތުން ހުއްދަވެގެންވާ ކަމެއް ނޫން ކަމަށް މައުރޫފު ވިދާޅުވި އެވެ. މިކަމުގެ ސަބަބުން ރައްޔިތުންގެ މެދުގައި ސަރުކާރާމެދު އިތުބާރު ގެއްލިފައިވާއިރު، މިސަރުކާރުން ރައްޔިތުން ބިކަ ކުރުމަށް ކުރަމުންދާ ކަންކަމާ ދެކޮޅަށް ހުރިހާ ފަރާތްތަކުން އޮކްޓޯބަރު 3 ވަނަ ދުވަހު ބާއްވާ އެއްވުމުގައި ބައިވެރިވުމަށްވެސް މައުރޫފުވަނީ ގޮވާލައްވާފަ އެވެ.
