"ސްކޫޕު" ގެ ނަމުގައި ހަރަކާތްތެރިވާ ގްރޫޕަކީ ގޭންގެއް ކަމަށް ކަނޑަޅާ މައްސަލައިގެ އަޑުއެހުން މިރޭ

އައްޑޫ ސިޓީ ހިތަދޫގައި "ސްކޫޕު" ގެ ނަމުގައި ހަރަކާތްތެރިވާ ގްރޫޕަކީ އިންތިޒާމުވެފައިވާ ކުށްކުރާ ގްރޫޕެއް ނުވަތަ ގޭންގެއްގެ ގޮތުގައި ކަނޑައަޅައިދިނުމަށް އެދި ޕްރޮސެކިއުޓާ ޖެނެރަލް (ޕީޖީ) އޮފީހުން ހައިކޯޓަށް ހުށަހެޅި މައްސަލައިގެ އަޑުއެހުން ހޯމަ ދުވަހުގެ ރޭ ފެށުމަށް ތާވަލުކޮށްފި އެވެ.

ޕީޖީ އޮފީހުން މި މައްސަލަ ހައިކޯޓަށް ހުށަހަޅާފައިވަނީ މިއަހަރުގެ ޖެނުއަރީ މަހުގެ 15 ވަނަ ދުވަހު އެވެ. މި މައްސަލައިގެ ފުރަތަމަ އަޑުއެހުން ފެބްރުއަރީ މަހުގެ ތެރޭގައި ތާވަލުކުރިނަމަވެސް ފަހުން އަޑުއެހުން ވަނީ ކެންސަލްވެފަ އެވެ.

މިހާރު މި އަޑުއެހުން ތާވަލުކޮށްފައިވަނީ ހޯމަ ދުވަހުގެރޭ 21:15 އަށެވެ. މައްސަލަ ބައްލަވާ ބެންޗުގައި ހިމެނިވަޑައިގަންނަވަނީ ފަނޑިޔާރު އަލްއުސްތާޛު މުޙައްމަދު ޝަނީޒް ޢަބްދުﷲ, ފަނޑިޔާރު އަލްއުސްތާޛު ޢަބްދުލްމާނިޢު ޙުސައިން, އަދި ފަނޑިޔާރު އަލްއުސްތާޛު އިބްރާހީމް މާހިރު އެވެ. 

މި މައްސަލައަކީ ފުލުހުން ހުށަހެޅި ހުށަހެޅުމާއި ހެކިތައް ދިރާސާކުރުމަށްފަހު ޕީޖީ އޮފީހުން ކޯޓަށް ހުށަހެޅި މައްސަލައެކެވެ. ޕީޖީ އޮފީހުން ވިދާޅުވީ "ސްކޫޕު" ގްރޫޕަކީ ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނުގެ ދަށުން "އިންތިޒާމުވެފައިވާ ކުށްކުރާ ގްރޫޕެއް" ގައި ހުންނަންޖެހޭ ޝަރުތުތައް ފުރިހަމަވާ ގްރޫޕެއް ކަމަށެވެ. އަދި އެ ގްރޫޕަކީ މިހާރުވެސް ކުށްކުރުމުގައި އަމަލީގޮތުން ހަރަކާތްތެރިވާ ބައެއް ކަމަށް ފެންނަ ކަމަށްވެސް ޕީޖީން ވިދާޅުވި އެވެ.

މީގެ އިތުރުން، އެ ގްރޫޕަށް ނިސްބަތްވާ މީހުންގެ ގޮތުގައި ފާހަގަކުރެވިފައިވާ 9 މީހަކީ އެ ގްރޫޕްގެ މެންބަރުން ކަމަށް ކަނޑައަޅައިދިނުމަށް ވެސް ވަނީ އެދިފަ އެވެ. މިއީ ގޭންގުތަކާ ބެހޭ އާ ގާނޫނަށް އަމަލުކުރަން ފެށި ފަހުން، ވަކި ގްރޫޕަކީ ގޭންގެއް ކަމަށް ކަނޑައަޅައިދިނުމަށް އެދި ފުލުހުން ޕީޖީ އޮފީހަށް ހުށަހެޅި ދެވަނަ މައްސަލަ އެވެ.