ކުށްކުރާ ކަމަށް ފާހަގަވާ ސަރަހައްދުތަކަށް އިސްކަންދީގެން ޕެޓްރޯލް ކުރަނީ
ކުށުގެ ވެށީގައި އުޅޭ ފަރާތްތައް ހުއްޓުވައި ސުވާލުކުރުމުގެ މަސައްކަތް ކޮށްފައިވޭ
ކުށްކުރާ ކަމަށް ބެލެވޭ ސަރަހައްދެން ފުލުހުން ބަލައި ދެމީހަކު ޗެކްކުރަނީ
ކުށް ކުރާ ކަމަށް ފާހަގަވާ ސަރަހައްދުތަކަށް އިސްކަންދީގެން ޕެޓްރޯލް ކުރުމުގެ މަސައްކަތް ފުލުހުން ފަށައިފިއެވެ.
ފުލުހުން އާންމުކޮށްފައިވާ މައުލޫމާތުގައި ވާގޮތުން މާލެއަކީ އަމާން ރައްކާތެރި ތަނަކަށް ހެދުމަށް ކުރަމުންދާ މަސައްކަތްތަކުގެ ތެރެއިން، ވޭތުވެދިޔަ 24 ގަޑިއިރުގެ ތެރޭގައި ކުށް ހިނގާ ކަމަށް ފާހަގަކުރެވިފައިވާ ސަރަހައްދުތަކަށް ޚާއްސަ ސަމާލުކަމެއް ދީގެން ޕެޓްރޯލްކޮށް ބެލެހެއްޓުމާއި ކުށުގެ ވެށީގައި އުޅޭ ފަރާތްތައް ހުއްޓުވައި ސުވާލުކުރުމުގެ މަސައްކަތް ވަނީ ކޮށްފަ އެވެ.
މީގެއިތުރުން، ވަގަށްނަގާފައިވާ ތަކެތި ހޯދުމާއި ރައްޔިތުން ހޭލުންތެރިކަން އިތުރުކުރުމަށް ފިހާރަތަކަށް ޒިޔާރަތްކޮށް މައުލޫމާތު ދިނުމުގެ އިތުރުން ރައްޔިތުންގެ ކޯލްތަކަށް އެޓެންޑްވެ، ރައްޔިތުންގެ ކަންބޮޑުވުންތައް ހައްލުކުރުމަށާއި މަގުމަތި ތަރުތީބުކުރުމުގެ މަސައްކަތްތަކުގައިވެސް މާލެ ފްރަންޓްލައިން ޕޮލިސްގައި މަސައްކަތްކުރާ ފުލުހުން ހަރަކާތެރިވެފައިވާކަން ފުލުހުން ފާހަގަކުރެ އެވެ.
އަދި ފުލުހުންގެ ކޮންމެ ދުވަހެއްގެ މަސައްކަތުގެ ތެރެއިން ކުރެވޭ މިފަދަ ކޮންމެ ކަމަކުންވެސް މުޖުތަމައުގެ އަމާންކަމާއި ރައްކާތެރިކަން ކަށަވަރުކުރެވިގެންދާނެ ކަމަށް ފުލުހުންގެ ޚިދުމަތުން ދެކެއެވެ.
ގޭންގު ކުށްމަދުކުރުމަށްޓަކައި ޚާއްސަ ވިންގެއް އުފައްދާފައިވާއިރު، ގޭންގެއްގެ ގޮތުގައި ބަލަނީ، މަގުމަތީގައި ނުވަތަ އެކިތަންތަނުގައި އެއްވެގެން ތިބެ ޖިނާއީ އެކިއެކި ކުށްތައްކުރަމުންދާ، އަދި އާންމުންގެ ހިތްތަކުގައި ބިރުވެރި އުފެދޭފަދަ އަމަލުތައް ކުރަމުންދާ، ވަކި ނަމެއްދީގެން ވަކި ބައެއްގެ ގޮތުގައި ދައްކުވައިގެން ހަރަކާތްތެރިވާ މީހުންނެވެ.
ދިވެހި ފުލުހުންގެ ޚިދުމަތުގައި އަލަށް ޤާއިމުކުރި، ގޭންގް ކްރައިމް އެންފޯސްމަންޓާއި، ޑިޖިޓަލް ޑޭޓާ އެންޑް ޓެކްނޮލޮޖީ ޑިޕާޓްމަންޓާއެކު ދިވެހި ފުލުހުންގެ ޚިދުމަތުގެ ކުރިއަށް އޮތް 4 އަހަރުގެ ސްޓްރެޓެޖިކް އެކްޝަން ޕްލޭން ތަންފީޒުކުރުމަށް ފުލުހުންގެ އިދާރީ ހިންގުމުގެ އޮނިގަނޑަށް ވަނީ މިމަހުގެ ފުރަތަމަދުވަހުން ފެށިގެން ބަދަލުތަކެއް ގެނެސްފައެވެ.
ކުށް ކުރާ ކަމަށް ފާހަގަވާ ސަރަހައްދުތަކަށް އިސްކަންދީގެން ޕެޓްރޯލް ކުރުމުގެ މަސައްކަތް ފަށާފައިވާ ކަމަށް ފުލުހުން ބުނެފައިވަނީ، އެމްޑީޕީ އިން މި މަހުގެ 3 ވަނަ ދުވަހު ސަރުކާރާ ދެކޮޅަށް މާލޭގައި ބޮޑު އެއްވުމެއް ބޭއްވުމަށް ތައްޔާރުވަމުން އަންނަނިކޮށެވެ. އަދި ފުލުހުން ވަނީ ފުލުހުންގެ ޚިދުމަތުން ހުއްދަ ދީފައިވާ ރޫޓާ ޚިލާފަށް، މި ހިނގާލުން ކުރިއަށް ގެންދިއުމަށާއި އެކި ބައިބަޔަށް ބެހި ކުށްކުރާ ގްރޫޕްތައް މަގުމައްޗަށް ނެރެ މާލެތެރެ ހަލަބޮލިކޮށް ތަންތަނަށް ގެއްލުން ދިނުމަށް ރާވާފައިވާކަމުގެ މައުލޫމާތު ލިބިފައިވާ ކަމަށް ފުލުހުންގެ ބަޔާނުގައި ބުނެފައިވެއެވެ. އަދި މިފަދަ އަމަލުތަކަކީ މާލޭގެ އަމަން އަމާންކަމާއި އާންމު މަސްލަހަތު ގެލިދާނެ ކަންކަން ކަމަށް ފުލުހުން ބުނެފައިވެއެވެ.
އާންމުންގެ މެދުގައި ބިރުވެރިކަން އުފެދޭ ގޮތަށް ފުލުހުން މިފަދަ ވާހަކަތަކެއް ދެއްކި ނަމަވެސް އެމްޑީޕީ އިން ވަނީ މި އެއްވުމަކީ ސުލްހަވެރި އެއްވުމެއް ކަމަށް ބުނެފައެވެ. އަދި މި އެއްވުމާއި ގުޅޭގޮތުން އެމްޑީޕީ އިން އިސްވެ ފުލުހުންނާއި ބައްދަލުކޮށް އެއްވުމުގެ ތަފްސީލު ހިއްސާކޮށް އެއްބާރުލުން ހޯދުމަށް އެދުނެވެ. އަދި ފުލުހުން މި އެއްވުމަށް ހުއްދަވެސް އޮތީ ދީފައެވެ.
