ޗާގޯސް މައްސަލަ ގޯސްވެ، މޮރިޝަސް އިން ރާއްޖެއާ އެކު ހާރިޖީ ގުޅުންތައް ކަނޑާލައިފި
ޗާގޯސްގެ މައްޗަށް މޮރިޝަސްގެ ސިޔާދަތީ ބާރު އޮތްކަމަށް ރާއްޖެއިން ގަބޫލުނުކުރާތީ، އެ ގައުމުން ރާއްޖެއާއެކު އޮތް ހާރިޖީ ގުޅުންތައް ކަނޑާލުމަށް ވަނީ ނިންމާފަ. މި ނިންމުން ނިންމާފައިވަނީ މިއަދު ބޭއްވި އެ ގައުމުގެ ވަޒީރުންގެ މަޖިލީހުގެ ޖަލްސާގައި.
އިންޑިއާ ކަނޑުގައި އޮންނަ ޗާގޯސް އާކިޕެލާގޯ ނުވަތަ ފޯޅަވަހީގެ ރަށްތަކުގެ ތެރެއިން އެންމެ ބޮޑު އަތޮޅަކީ ޑިއޭގޯ ގާސިއާ. މި ރަށް އޮންނަނީ އިންޑިއާގެ ދެކުނުން 1600 ކިލޯމީޓަރު ދުރުގައި އަދި ދިވެހިރާއްޖޭގެ ދެކުނުން 1200 ކިލޯމީޓަރު ދުރުގައި. | އާޓެމްޖޫ.އާރުޔޫ
ޗާގޯސް ރަށްތަކުގެ މައްޗަށް މޮރިޝަސްގެ ސިޔާދަތީ ބާރު ނުހިނގާ ކަމަށް ރާއްޖެ އިން ބުނަމުންދާތީ ރާއްޖެ އާއި އެކު އޮތް ހާރިޖީ ގުޅުންތައް އެ ގައުމުން ކަނޑާލައިފި އެވެ.
ރާއްޖެ އާއި އެކު އޮތް ހާރިޖީ ގުޅުން ކަނޑާލަން މޮރިޝަސް އިން ނިންމާފައި ވަނީ ހުކުރު ދުވަހު ބޭއްވި ވަޒީރުންގެ މަޖިލީހުގެ ޖަލްސާގަ އެވެ. އެ ގައުމުން ވަނީ އެކަން ރަސްމީކޮށް ހާމަވެސް ކޮށްފަ އެވެ.
އެ ގައުމުގެ ބޮޑުވަޒީރުގެ އޮފީހުން ހާމަކުރި ގޮތުގައި، ޗާގޯސް އާކިޕެލަގޯގެ މައްޗަށް މޮރިޝަސްގެ ސިޔާދަތީ ބާރު އޮތްކަން ދިވެހި ސަރުކާރުން ގަބޫލުނުކުރުމާއި، އިނގިރޭސިވިލާތާއި މޮރިޝަސްއާ ދެމެދު ވެފައިވާ އެއްބަސްވުމަށް ރާއްޖެއިން އިއުތިރާޒުކުރާތީ، އެ ކަންކަމަށް ރިއާޔަތްކޮށް ދިވެހިރާއްޖެ އާއެކު ބާއްވަމުން އައި ގުޅުން ކަނޑާލުމަށް ވަނީ ނިންމާފަ އެވެ.
މިއަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، ޗާގޮސް މައްސަލައިގައި ކުރީގެ ރައީސް އިބްރާހިމް މުޙައްމަދު ސޯލިހު މޮރިޝަސް އަށް ފޮނުއްވި ސިޓީފުޅު އަނބުރާ ގެންނެވުމަށް ނިންމަވާފައިވާކަން ހާމަކުރައްވާފަ އެވެ. މީގެއިތުރުން، ރާއްޖޭގެ ދެކުނު ކަނޑުގެ އިން ވަކިކުރުމާ ގުޅޭގޮތުން ބައިނަލްއަޤްވާމީ ކަނޑުތަކާ ބެހޭ ޓްރައިބިއުނަލް (އިޓްލޮސް) އިން ނިންމާފައިވާ ނިންމުން ބަލައިނުގަންނަވާނެ ކަމަށާއި، އެ ސަރަޙައްދު ހިމާޔަތްކޮށް ބެލެހެއްޓުމަށްޓަކައި ކޯސްޓްގާޑުގެ އުޅަނދުފަހަރު އެ ސަރަހައްދަށް ފޮނުއްވާނެ ކަމަށްވެސް ރައީސް ވިދާޅުވި އެވެ.
މީގެއިތުރުން، ޗާގޯސްގެ ރަށްތަކަކީ ތާރީޚީ ގޮތުން ދިވެހިރާއްޖޭގެ މިލްކުވެރިކަން އޮތް ސަރަހައްދެއްކަން ފާހަގަކުރައްވައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އިނގިރޭސިވިލާތުގެ ބޮޑުވަޒީރަށް ސިޓީފުޅެއް ފޮނުއްވާފަ އެވެ. އެ ސިޓީފުޅުގައި ރައީސް ބަޔާންކުރައްވާފައިވަނީ، ޗާގޯސްގެ ރަށްތަކުގެ މިލްކުވެރިކަން ރާއްޖެއަށް ލިބިއްޖެ ހާލަތެއްގައި، އެ ތަނުގައި މިހާރުވެސް ގާއިމުކޮށްފައިވާ އެމެރިކާގެ އަސްކަރީ މަރުކަޒު ކުރިއެކޭވެސް އެއްފަދައިން ހިންގުމުގެ ފުރުސަތު ދެއްވާނެ ކަމަށެވެ.
މީގެ 44 އަހަރު ކުރިން މޮރިޝަސް އާއި ރާއްޖެ އާއި ދެމެދު ހާރިޖީ ގުޅުން ޤާއިމްކޮށްފައި ވަނީ 15 ޖެނުއަރީ 1981ގަ އެވެ.
