ޗާގޯސް މޮރިޝަސްއާ ހަވާލުކުރުން މަޑުޖައްސާލައި، އެމެރިކާއާއެކު މަޝްވަރާ ފަށައިފި

ޗާގޯސް ޖަޒީރާތަކުގެ މިލްކުވެރިކަން މޮރިޝަސްއާ ހަވާލުކުރުމަށް އިނގިރޭސިވިލާތުން ނިންމާފައިވާ ނިންމުން ގާނޫނީ ގޮތުން ކަށަވަރުކުރުމުގެ މަސައްކަތް، އެމެރިކާއާއެކު ކުރިއަށްދާ މަޝްވަރާތަކަށްޓަކައި "މެދުކަނޑާލާފައިވާ" ކަމަށް އިނގިރޭސި ސަރުކާރުގެ ވަޒީރަކު ވިދާޅުވެއްޖެއެވެ.

އިނގިރޭސިވިލާތުން މި ފިޔަވަޅު އަޅާފައިވަނީ، ޗާގޯސް ހަވާލުކުރުމުގެ އެއްބަސްވުމަށް ކުރިން ތާއީދުކުރެއްވުމަށްފަހު، އެ އެއްބަސްވުން އުވާލުމަށް އެމެރިކާގެ ރައީސް ޑޮނަލްޑް ޓްރަމްޕް މިދިޔަ ހަފުތާގައި އިނގިރޭސި ބޮޑުވަޒީރު ސަރ ކިއަރ ސްޓާމަރަށް ބާރުއެޅުއްވުމާ ގުޅިގެންނެވެ.

މި އެއްބަސްވުމުގެ ދަށުން ޗާގޯސްގެ ސިޔާދަތީ ބާރު މޮރިޝަސްއަށް ދޫކޮށްލުމަށް ވަނީ ނިންމާފައެވެ. އަދި އެ ޖަޒީރާތަކުގެ ތެރެއިން އެންމެ ބޮޑު ރަށުގައި ގާއިމުކޮށްފައިވާ އިނގިރޭސިވިލާތާއި އެމެރިކާގެ ގުޅިފައިވާ އަސްކަރީ މަރުކަޒު ކުއްޔަށް ހިފުމަށް، އަހަރަކު އެވްރެޖްކޮށް 101 މިލިއަން ޕައުންޑް މޮރިޝަސްއަށް ދެއްކުމަށް ވެސް މި އެއްބަސްވުމުގައި ކަނޑައަޅާފައިވެއެވެ.

އިނގިރޭސި ފޮރިން އޮފީހުގެ މިނިސްޓަރު ހާމިޝް ފޯކްނަރ ގާނޫނު ހަދާ މަޖިލީހުގެ މެންބަރުންނަށް މައުލޫމާތު ދެއްވަމުން ވިދާޅުވީ، އެމެރިކާގެ ފަރާތުން ހުށަހެޅި ކަންބޮޑުވުންތަކާ ގުޅިގެން، އެމެރިކާ އާ އެކު ސީދާ ގޮތެއްގައި މިހާރު މަޝްވަރާ ކުރަމުންދާ ކަމަށެވެ.

މިނިސްޓަރު އިތުރަށް ވިދާޅުވީ، މިދިޔަ އަހަރު އިނގިރޭސިވިލާތާއި މޮރިޝަސްއާ ދެމެދު މި މުއާހަދާގައި ސޮއިކުރިއިރު އެމެރިކާއިން އެކަމަށް ތާއީދުކުރި ނަމަވެސް، ދާދި ފަހުން އެމެރިކާގެ ރައީސް ދެއްވި ބަޔާނަކީ ވަރަށް ބޮޑު އަހަންމިއްޔަތުކަމެއް ދޭންޖެހޭ ބަޔާނެއް ކަމަށެވެ.

މީގެ އިތުރުން އޭނާ ވިދާޅުވީ، މި މުއާހަދާއާ ގުޅޭ ގާނޫނީ މަރުހަލާތައް ޕާލަމަންޓުގައި ކުރިއަށްދާ ކަމަށެވެ.

ނަމަވެސް، އެމެރިކާގެ ކަމާބެހޭ ފަރާތްތަކާއެކު ކުރިއަށްދާ މަޝްވަރާތަކަށްޓަކައި މިވަގުތު އެ މަސައްކަތް މެދުކަނޑާލާފައިވާ ކަމަށާއި، އެންމެ މުނާސަބު ވަގުތެއްގައި އެ މައްސަލަ އަލުން ޕާލަމަންޓަށް ހުށަހަޅުއްވާނެ ކަމަށް ވެސް މިނިސްޓަރު ވިދާޅުވިއެވެ.