ޗާގޯސްގެ ސިޔާދަތީ ބާރު ހޯދުމަށް ބައިނަލްއަގުވާމީ ކޯޓަށް މައްސަލަ ހުށަހަޅަން ރާއްޖެ އިން ތައްޔާރުވަމުންދާ ކަމަށް ނައިޖެލް ފަރާޖް އިނގިރޭސި ޕާލިމެންޓުގައި ވިދާޅުވެއްޖެ
އިނގިރޭސި ޕާލަމެންޓުގައި ވާހަކަދައްކަވަމުން ފަރާޖް ވިދާޅުވީ ޗާގޯސްއަކީ ތާރީޚީ އަދި ސަގާފީ ގޮތުން ރާއްޖެއާ ގުޅުން އޮތް ތަނެއް ކަމަށާއި، އެހެންކަމުން މޮރިޝަސް އާ އެތަން ހަވާލު ކުރަން މިހާރު ކުރިއަށްދާ މަސައްކަތްތައް މަޑުޖައްސާލަން ޖެހޭ ކަމަށް. މީގެ އިތުރުން، އޭނާ ޗާގޯސްއަށް ކުރަން އުޅުނު ދަތުރަށް ހުރަސްއެޅުމަށް އިނގިރޭސި ސަރުކާރުން ރާއްޖެއަށް ޕްރެޝަރު ކުރި ކަމަށްވެސް އޭނާ ވަނީ ތުހުމަތު ކުރައްވާފައި.
ރާއްޖޭގައި ހުންނަވައި ރިފޯމް ޔޫކޭގެ ލީޑަރު ފަރާޖް ނަގާފައިވާ ވީޑިއޯގެ ސްކްރީން އިމޭޖެއް. | ސޯޝަލް މީޑިއާ
ޗާގޯސް ޖަޒީރާތަކުގެ މިލްކުވެރިކަމާ ގުޅޭގޮތުން ރާއްޖޭގެ ފަރާތުން "މި ކުރިއަށް އޮތް މަދު ދުވަސްކޮޅެއްގެ ތެރޭގައި" ބައިނަލްއަގުވާމީ ކޯޓް އޮފް ޖަސްޓިސް (އައިސީޖޭ) އަށް ރައްދު ދައުވާއެއް ހުށަހަޅަން ތައްޔާރުވަމުންދާ ކަމަށް ނައިޖެލް ފަރާޖް ވިދާޅުވެއްޖެއެވެ.
އިނގިރޭސިވިލާތުގެ ރިފޯމް ޔޫކޭ ޕާޓީގެ ލީޑަރު، މިދިޔަ ހަފުތާ ބަންދުގައި ރާއްޖެ އަށް ކުރެއްވި ދަތުރުފުޅަށްފަހު، އެކްސް (ކުރީގެ ޓްވިޓާ) ގައި އާންމުކުރެއްވި ވީޑިއޯއެއްގައި ތުހުމަތު ކުރެއްވި ގޮތުގައި، އޭނާ ޗާގޯސް ޖަޒީރާތަކަށް ދިއުމަށް އިނގިރޭސި ސަރުކާރުން ވަނީ ހުރަސް އަޅާފައެވެ.
ބުދަ ދުވަހު ބޭއްވި ހައުސް އޮފް ކޮމަންސްގެ ޖަލްސާގައި ފަރާޖް އިތުރަށް ވިދާޅުވީ، ޗާގޯސްގެ ސިޔާދަތީ ބާރު މޮރިޝަސްއާ ހަވާލުކުރުމަށް އިނގިރޭސި ސަރުކާރުން ނިންމާފައިވާ ނިންމުމާ މެދު ދިވެހިރާއްޖެއިން "ހިތްހަމަނުޖެހުން" ފާޅުކުރަމުންދާ ކަމަށެވެ. އިނގިރޭސި ސަރުކާރުން ބުނާ ގޮތުގައި މި އެއްބަސްވުމުގެ މަގްސަދަކީ، ޑިއޭގޯ ގާސިއާގައި އޮންނަ އިނގިރޭސިވިލާތާއި އެމެރިކާގެ ގުޅިފައިވާ އަސްކަރީ މަރުކަޒު މަދުވެގެން 99 އަހަރަށް ހިންގޭނެކަން ކަށަވަރުކުރުމާއި، ޗާގޯސްގެ ރައްޔިތުން އެ އަތޮޅުގެ އެހެން ރަށްތަކަށް އަނބުރާ ދިއުމަށް މަގުފަހިކޮށްދިނުމެވެ.
ފަރާޖް ވިދާޅުވީ، "މިދިޔަ ހަފުތާ ބަންދުގައި އަޅުގަނޑު ރާއްޖެއަށް ކުރި ދަތުރުން އެނގުނު ކަމެއް ހިއްސާކޮށްލާނަން. މިއީ އަޅުގަނޑަށް ކުރިން އެނގިފައިވާ ކަމެއް ނޫން، އަދި އިނގިރޭސި ސަރުކާރަށް މިކަން އެނގޭ ކަމެއްވެސް އަޅުގަނޑަކަށް ނޭނގެ.
"ޗާގޯސް ޖަޒީރާތަކާ ތާރީޚީ ގޮތުން ގުޅުން އޮތީ ރާއްޖެއާ. އެއީ ވިޔަފާރީގެ ގޮތުންނާއި އާސާރީ ގޮތުން ބެލިޔަސްމެ. ހަގީގަތުގައި ފަރަންސޭސިން ކޮށްފައިވާ ކަމަކީ، ދިވެހި ބަހުން އެ ރަށްތަކަށް ކިޔާފައިވާ ނަންތައް ބަދަލުކޮށްލުން އެކަނި.
"ތާރީޚީ ގޮތުންނާއި، ސަގާފީ ގޮތުން ނުވަތަ އެހެން އެއްވެސް ގޮތަކުން ބެލިޔަސް، އެ ރަށްތަކުގެ މައްޗަށް ދައުވާ ކުރުމުގެ އެއްވެސް އަސާސެއް މޮރިޝަސްއަކަށް ނެތް.
"އަދި އަޅުގަނޑު ސަރުކާރަށް މައުލޫމާތު ދޭން ބޭނުންވަނީ، އަޅުގަނޑަށް ގަބޫލުކުރެވޭ ގޮތުގައި، މި ކުރިއަށް އޮތް މަދު ދުވަސްކޮޅެއްގެ ތެރޭގައި ރާއްޖެއިން އައިސީޖޭއަށް ރައްދު ދައުވާއެއް ހުށަހަޅާނެ. އެ ދައުވާގައި ބުނާނީ އެ ރަށްތަކުގެ ސިޔާދަތީ ބާރުގެ ހައްގުވެރިއަކީ މޮރިޝަސް ނޫން ކަމަށާއި، އެއީ ރާއްޖެ ކަމަށް.
"އެހެންކަމުން މިހާރު ކުރިއަށްދާ ހުރިހާ ކަމެއް މަޑުޖައްސާލުމަށް އަޅުގަނޑު އިލްތިމާސް ކުރަން."
ރިފޯމް ޕާޓީގެ ލީޑަރު ހޮނިހިރު ދުވަހު ވިދާޅުވީ، އޭނާ ރާއްޖެ ވަޑައިގަތީ ޗާގޯސްގެ ރަށެއްގައި ވަޒަންވެރިވާން މަސައްކަތްކުރާ އެ ތަނުގެ ރައްޔިތުންނަށް "އިންސާނީ އެހީ" ފޯރުކޮށްދިނުމަށް ދިޔަ ވަފުދަކާ ގުޅުމަށް ކަމަށެވެ. އޭނާ އެކްސްގައި ލިޔުއްވާފައިވަނީ، "އިނގިރޭސި ސަރުކާރުން ވަނީ އަޅުގަނޑު ޗާގޯސް ޖަޒީރާތަކަށް ވަނުން މަނާކޮށްފައި،" ކަމަށެވެ.
އެ ޕޯސްޓާއެކު އާންމުކުރި ވީޑިއޯގައި އޭނާ ވިދާޅުވީ، "އަޅުގަނޑު ބޯޓަށް އަރައިގެން ޗާގޯސްއަށް ދިޔަ ނުދިނުމަށްޓަކައި، އިނގިރޭސި ސަރުކާރުން ދަނީ ރާއްޖޭގެ ރައީސުލްޖުމްހޫރިއްޔާއަށާއި ސަރުކާރަށް ލިބިފައިވާ ހުރިހާ ބާރެއްގެ ބޭނުންކުރުމަށް ޕްރެޝަރު ކުރަމުން،" ކަމަށެވެ. ފޮރިން އޮފީހުގެ މިނިސްޓަރު ހާމިޝް ފަލްކޮނާ ވަނީ މިއީ "ދަތުރުފަތުރުގެ އިރުޝާދުތަކަށް ފާޅުގައި އަމަލުނުކުރުމުގެ އަމަލެއް" ގޮތުގައި ސިފަކުރައްވާފައެވެ.
ހައުސް އޮފް ކޮމަންސްގައި ފަރާޖަށް ރައްދު ދެއްވަމުން މިނިސްޓަރު ވިދާޅުވީ، "އަޅުގަނޑު އޭނާއަށް ހަނދާންކޮށްދޭން ބޭނުންވަނީ، ލިންކަންޝަޔާގައި ހުންނަ އާރްއޭއެފް ވެޑިންގޓަން ފަދަ ނާޒުކު އަސްކަރީ މަރުކަޒަކަށް ސެލްފީ ސްޓިކެއް ހިފައިގެން އޭނާ ދިޔަ ނަމަވެސް، އެތަނުންވެސް އޭނާ ފޮނުވާލާނެކަން،" ކަމަށެވެ.
