ރިފޯމް ޔޫކޭގެ ލީޑަރު ފަރާޖު ރާއްޖެ ވަޑައިގެންނެވިކަން ނޭނގޭ ކަމަށް އިނގިރޭސި ސަރުކާރުން ބުނެފި

ބްރިޓިޝް އިންޑިއަން އޯޝަން ޓެރިޓަރީ ނުވަތަ ޗާގޯސް ޖަޒީރާއަށް އިންސާނީ އެހީގެ މިޝަނެއްގައި ދިއުމަށް އިނގިރޭސި ސަރުކާރުން ހުރަސްއަޅާފައިވާ ކަމަށް ބުނެ، ރިފޯމް ޔޫކޭގެ ލީޑަރު ނައިޖެލް ފަރާޖް ދެއްކެވި ވާހަކަތަކާ ގުޅިގެން، އޭނާއަކީ "މެގާ  ސްޓަންޓްތައް" ޖައްސަވާ ބޭފުޅެއްގެ ގޮތުގައި ތުހުމަތުކޮށްފިއެވެ.

ރިފޯމް ޔޫކޭގެ ލީޑަރު ވިދާޅުވީ، ޗާގޯސްގެ ކޮންޓްރޯލް މޮރިޝަސްއާ ހަވާލުކުރުމަށް އިނގިރޭސިވިލާތުން ގެންގުޅޭ ސިޔާސަތާ ދެކޮޅަށް އިހުތިޖާޖުކޮށް، އެ އަތޮޅުގެ ރަށެއްގައި ވަޒަންވެރިވުމަށް މަސައްކަތްކުރާ ހަތަރު ޗާގޯސް ރައްޔިތަކަށް އެހީތެރިކަން ފޯރުކޮށްދޭ ވަފުދާ ގުޅުމަށް އޭނާ ދިވެހިރާއްޖެ އަށް ވަޑައިގެންނެވި ކަމަށެވެ.

ހޮނިހިރު ދުވަހު އެކްސްގައި އާންމުކުރި ވީޑިއޯއެއްގައި ފަރާޖް ބުނެފައިވަނީ، އޭނާ ކުރަން އުޅުނު ދަތުރަށް އިނގިރޭސި ސަރުކާރުން ހުރަސްއަޅާފައިވާ ކަމަށެވެ.

ފަރާޖް ވިދާޅުވީ، އޭނާ ބޯޓެެއްގައި ޗާގޯސް ޖަޒީރާއަށް ދިޔަ ނުދިނުމަށްޓަކައި، ދިވެހިރާއްޖޭގެ ރައީސުލްޖުމްހޫރިއްޔާއަށާއި ދިވެހި ސަރުކާރަށް އިނގިރޭސި ސަރުކާރުން ނުފޫޒު ފޯރުވަމުންދާ ކަމަށެވެ.

ފަރާޖް އިތުރަށް ވިދާޅުވީ، އޭނާ އަކީ އިނގިރޭސިވިލާތުގެ ޑޯވާ ކަނޑުއޮޅި ހުރަސްކުރާ އައިސިސްގެ ހަނގުރާމަވެރިއެއް ނަމަ، އިނގިރޭސި ސަރުކާރުން އެކަމާ އަޅައެއް ނުލާނެ ކަމަށާއި އޭގެ ބަދަލުގައި އޭނާ ބަހައްޓާނީ ހޮޓަލެއްގައި، ދުވާލަކު ތިން އިރު ކާންދީފައި ކަމަށެވެ.

ނަމަވެސް، ފަރާޖް ޗާގޯސްއަށް ދަތުރުކުރަން އުޅޭކަމުގެ އެއްވެސް މައުލޫމާތެއް ކުރިން ލިބިފައި ނުވާ ކަމަށާއި، ހޮނިހިރު ދުވަހު އޭނާ އެ ވާހަކަތައް ދެއްކުމުގެ ކުރިން އޭނާ ރާއްޖޭގައި ހުރިކަން ވެސް އިނގިރޭސި ސަރުކާރަށް އެނގިފައި ނުވާކަން ވަނީ ހާމަވެފައެވެ.

ފަރާޖް ރާއްޖެއަށް ވަޑައިގަތީ ޕްރައިވެޓް ޖެޓެއްގައި ކަމަށް ރިޕޯޓްތައް ބުނާއިރު، ރާއްޖޭގައި އެއް ދުވަހަށް ވުރެ ކުޑަ ވަގުތުކޮޅެއް ހޭދަކުރުމަށްފަހު، ގްރޭޓަރ މެންޗެސްޓާގެ ގޯޓަން އެންޑް ޑެންޓަންގައި ބާއްވާ ބައި-އިލެކްޝަނަށް އޭނާ ވަނީ އެނބުރި އިނގިރޭސިވިލާތަށް ވަޑައިގެންފައެވެ.

ފަރާޖްގެ މި ދަތުރު މި ދިމާވީ، ޗާގޯސް ޖަޒީރާގެ މައްސަލައިގައި އިނގިރޭސިވިލާތުން ވެފައިވާ އެއްބަސްވުމާ މެދު ޑޮނަލްޑް ޓްރަމްޕް ސުވާލު އުފައްދާފައިވާ ދަނޑިވަޅެއްގައެވެ. އެމެރިކާގެ ރައީސް ވަނީ، އިނގިރޭސިވިލާތާއި އެމެރިކާގެ އަސްކަރީ މަރުކަޒެއް އޮންނަ ޗާގޯސްގެ އެންމެ ބޮޑު ރަށް ކަމަށްވާ ޑިއޭގޯ ގާސިއާ "ދޫކޮށްނުލުމަށް" ކިއަރ ސްޓާމަރަށް ގޮވާލައްވާފައެވެ.

ސަރުކާރުގެ މަސްދަރުތަކުން ގަބޫލުކުރާ ގޮތުގައި، އީރާނަށް ދޭން އުޅޭ ހަމަލާއެއްގައި އިނގިރޭސިވިލާތުގެ އަސްކަރީ މަރުކަޒުތައް ބޭނުންކުރުމުގެ ހުއްދަ ނުދިނުމުން، އެމެރިކާގެ ރައީސް ވަނީ މި އެއްބަސްވުމާ މެދު ހިތްހަމަނުޖެހުން ފާޅުކޮށްފައި ކަމަށް ދަ ގާޑިއަން އިން މިދިޔަ ހަފުތާގައި ރިޕޯޓްކޮށްފައިވެއެވެ.

1960 އާއި 1970 ގެ އަހަރުތަކުގައި އަސްކަރީ މަރުކަޒު ހެދުމަށްޓަކައި ޗާގޯސްގެ 2،000 އެއްހާ ރައްޔިތުން ވަނީ މަޖުބޫރުން އެ ރަށްތަކުން ބޭރުކޮށްފައެވެ. އެމީހުން ދިރިއުޅެމުންދަނީ މޮރިޝަސް އާއި އިނގިރޭސިވިލާތުގައެވެ. އޭގެ ތެރެއިން ގިނަ ބަޔަކު ބޭނުންވަނީ އެނބުރި އަމިއްލަ ވަޒަނަށް ދިއުމަށެވެ.

ފަރާޖް ވިދާޅުވީ އޭނާ ދާން އުޅުނީ ޗާގޯސް ގައި ވަޒަންވެރިވުމަށް ދިޔަ އެތަނުގެ އަސްލު ދަރިކޮޅަށް ނިސްބަތްވާ ތިން އެކްޓިވިސްޓުން ހޯމަ ދުވަހު ދިޔަ ރަށަށެވެ.

އިނގިރޭސިވިލާތުގެ ކުރީގެ ޑިފެންސް ސެކްރެޓަރީ ބެން ވޮލަސް، ފަރާޖްގެ މި އަމަލަކީ "އަގުހެޔޮ ސްޓަންޓެއް" ކަމަށް ސިފަކުރައްވައި، އޭނާއަކީ "މެގާ ސްޓަންޓްތައް" ޖައްސަވާ ބޭފުޅެއްގެ ގޮތުގައި ތުހުމަތުކުރެއްވިއެވެ. އަދި ބްރިޓިޝް އިންޑިއަން އޯޝަން ޓެރިޓަރީއަށް ވަނުމަށް އޮންނަ ހަރުކަށި ގަވާއިދުތަކަށް އޭނާ އިހުތިރާމް ކުރަންޖެހޭނެ ކަމަށް ވިދާޅުވިއެވެ.

އިނގިރޭސި ފޮރިން އޮފީހުގެ ވެބްސައިޓުގައި ބަޔާންކޮށްފައިވާ ގޮތުގައި، ބްރިޓިޝް އިންޑިއަން އޯޝަން ޓެރިޓަރީއަކީ ފަތުރުވެރިން ދާ މަންޒިލެއް ނޫނެވެ. އެ ސަރަހައްދަށް ދަތުރުކުރާ ކޮމާޝަލް ފްލައިޓްތަކެއް ނޯންނަ އިރު، އެތަނަށް ވަނުމަކީ މަނާކަމެކެވެ. އަދި އެތަނަށް ދަތުރުކުރެވޭނީ ކުރިން ހުއްދަ ހޯދައިގެންނެވެ.

ދިވެހި ސަރުކާރުގެ މަސްދަރަކުން އޭނާއަށް ފޯނުން ގުޅައި، ޗާގޯސް ޖަޒީރާތަކަށް އޭނާ ދަތުރުކުރުމަށް އިނގިރޭސި ކަމާބެހޭ ފަރާތްތަކުން ބޭނުން ނުވާކަމުގެ އިންޒާރު ދީފައިވާކަމަށް ނައިޖެލް ފަރާޖް ހޮނިހިރު ދުވަހު ޑެއިލީ ޓެލެގްރާފް ނޫހަށް ވިދާޅުވެފައިވެ އެވެ.

އެކްސްގައި އާންމުކުރި ދެ މިނެޓާއި ބައިގެ ވީޑިއޯ ކްލިޕެއްގައި ފަރާޖް ވިދާޅުވީ، އޭނާއަކީ އިނގިރޭސި ޕާލަމަންޓް މެންބަރެއްގެ އިތުރުން، ހިޔާލު ހޯދުމުގެ ވޯޓުތަކުގެ ކުރީގައި އޮތް ސިޔާސީ ޕާޓީއެއްގެ ލީޑަރު ކަމަށެވެ. އަދި އިނގިރޭސި ސަރުކާރާއި ރާއްޖޭގައި ހުންނަވާ ހައި ކޮމިޝަނަރު އޭނާއަށް ހުރަސްއެޅުމަށް ކުރެވެން ހުރި ހުރިހާ މަސައްކަތެއް ކުރަމުންދާ ކަމަށާއި، އޭނާ ހޯދުމަށް ގްރޫޕްތައް ނެރެފައިވާ ކަމަށާއި، އެމީހުން ބޭނުންވަނީ އޭނާ އެތަނުން ފުރައިގެން ދިޔަ ނުދިނުމަށް ކަމަށްވެސް ފަރާޖް ވިދާޅުވިއެވެ.

އިނގިރޭސި ފޮރިން، ކޮމަންވެލްތް އެންޑް ޑިވެލޮޕްމަންޓް އޮފީހުގެ ތަރުޖަމާނަކު ވިދާޅުވީ، މިވަގުތު އެންމެ ބޮޑު އިސްކަމެއް ދެނީ އިންސާނުން ދިރިއުޅެން އެކަށީގެންނުވާ ރަށެއްގައި ތިބި ބަޔަކު ރައްކާތެރިކަމާއެކު އެތަނުން ފުރުވާލުމަށް ކަމަށެވެ. އަދި އެއީ ސިއްހީ ކުއްލި ނުރައްކަލެއް ނުވަތަ މޫސުމީ ގޯސް ހާލަތެއް މެދުވެރިވެއްޖެނަމަ ފުރާނައަށް ނުރައްކާވެދާނެ ފަދަ ތަނެއްކަންވެސް ތަރުޖަމާނު ފާހަގަކުރެއްވިއެވެ.